ქართველი არტისტის სანდრო სულაბერიძის წინააღმდეგ სამართალდამცავებმა ქურდობის მუხლით საქმის წარმოება დაიწყეს. ხელოვანმა ეროვნულ გალერეაში გამოფენაზე „ავტოპორტრეტი სარკესთან“ საკუთარი ნამუშევარი ჩამოხსნა და  მის ადგილას საღებავით კედელზე დაწერა ფრაზა - „ხელოვნება ცოცხალი და დამოუკიდებელია!“.

ფაქტს საზოგადოების დიდი ნაწილი უსამართლოდ მიიჩნევს. სანდრო სულაბერიძის მხარდასაჭერად ჯერ ხელოვანები გაერთიანდნენ. ისინი შსს-ს მიმართავენ, რომ სანდრო სულაბერიძის მიმართ აღძრულ საქმეს კვალიფიკაცია შეუცვალონ და მხარი დაუჭირონ საკითხის გარკვევას მოლაპარაკების ფორმატში ხელოვანსა და გალერეის ადმინისტრაციას შორის. ხელმოწერები „დედიკას გალერეასა“ (ივანე თარხნიშვილის 25) გროვდება.

გუშინ საღამოს საქართველოს პენცენტრმა გაავრცელა განცხადება. ქართველი მწერლები შინაგან საქმეთა მინისტრისგან სანდრო სულაბერიძის შეწყალებას კი არა, მის მიმართ ყველა სახის - სისხლის სამართლებრივი და ადმინისტრაციული სამართალწარმოების შეწყვეტას მოითხოვენ.

განცხადებას სრულად გთავაზობთ:

საქართველოს პენცენტრი გმობს მხატვარ სანდრო სულაბერიძის წინააღმდეგ შინაგან საქმეთა სამინისტროს მიერ სისხლის სამართლის საქმის აღძვრას, ეროვნულ გალერეაში შესრულებული საპროტესტო ნამუშევრის გამო. პენცენტრისთვის ასევე კატეგორიულად მიუღებელია შალვა ამირანაშვილის სახელობის ხელოვნების სახელმწიფო მუზეუმის მხრიდან ამ საკითხზე  გავრცელებული სამარცხვინო განცხადება, რაც აჩენს გონივრულ ეჭვს, რომ მხატვრის მიმართ გატარებული ღონისძიებები შინაგან საქმეთა  სამინისტროსა და საქართველოს კულტურისა და სპორტის სამინისტროს ერთობლივი ძალისხმევით განხორციელდა. მიგვაჩნია, რომ ეს ქმედება შეუთავსებელია საქართველოს, როგორც ევროპული სახელმწიფოს ფასეულობებთან და ღირებულებებთან, ასევე წინააღმდეგობაშია ქვეყნის კონსტიტუციასთან.

რეპრესიული თავდასხმა სანდრო სულაბერიძის მიმართ მიზნად ისახავს არა მხოლოდ კონკრეტული მხატვრის დასჯას, არამედ სხვა ქართველი ხელოვანების დაშინებას და მათი თავისუფალი ნების ყოველგვარი გამოვლინების გატეხას.

მხატვრის წინააღმდეგ, მისი ნამუშევრის გამო სისხლის სამართლის საქმის აღძვრა, ასევე ადმინისტრაციული წარმოების დაწყება, თავისი არსით არის პუტინის რუსეთისთვის დამახასიათებელი ქმედება და ცხადყოფს, რომ კულტურის მინისტრი, თეა წულუკიანი და შინაგან საქმეთა მინისტრი, ვახტანგ გომელაური მოქმედებენ საქართველოს სახელმწიფოსთვის შეუთავსებელი ღირებულებებითა  და ფასეულობებით. 

საქართველოს პენცენტრი მიიჩნევს, რომ კულტურის მინისტრი არაკომპეტენტურია და ის მიზანმიმართულად ანგრევს ხელოვანების, მეცნიერების, კულტურის მენეჯერების და ზოგადად, კულტურის ქომაგების მიერ ათწლეულობით გაწეული  შრომის შედეგად შექმნილ ინსტიტუციებს; აზიანებს შემოქმედებით პროცესებს და განგებ ცდილობს საქართველოს მოქცევას კულტურულ იზოლაციაში, რაც, თავის მხრივ, საფრთხეს უქმნის ქვეყნის ეროვნული უსაფრთხოებას. 

აქედან გამომდინარე, ჩვენ არ ვითხოვთ შინაგან საქმეთა მინისტრისგან სანდრო სულაბერიძის შეწყალებას, არამედ მოვითხოვთ, რომ შეწყდეს ნებისმიერი სახის სამართალწარმოება, როგორც სისხლის სამართლებრივი, ასევე ადმინისტრაციული და მომავალშიც, როგორც შინაგან საქმეთა სამინისტრომ, ასევე კულტურის სამინისტრომ და მათდამი დაქვემდებარებულმა უწყებებმა, იმოქმედონ საქართველოს კონსტიტუციის მე-20 მუხლით განმტკიცებული შემოქმედებითი თავისუფლების დაცვის უმაღლესი სტანდარტებით.

ამავდროულად, საქართველოს პენცენტრი მოითხოვს,  კულტურის მინისტრმა, თეა წულუკიანმა ამ გაუგონარი პუტინისტური გამოხდომის გამო, საქართველოს კულტურული მემკვიდრეობის უმნიშვნელოვანესი ძეგლის, გელათის სამონასტრო კომპლექსის დაზიანებისგან დაუცველობის გამო, მუზეუმებიდან კომპეტენტური მეცნიერებისა და თანამშრომლების უკანონოდ, პოლიტიკური ნიშნით გათავისუფლების გამო, რაც სასამართლოს მიერ გამოტანილი არაერთი გადაწყვეტილებით უტყუარადაა დადასტურებული, დაუყოვნებლივ დატოვოს დაკავებული თანამდებობა.

წინააღმდეგ შემთხვევაში, ჩვენ, სხვა ქართველ სახელოვნებო ჯგუფებთან ერთად, გამოვიყენებთ პროტესტის ყველა ფორმას ამ მიზნის მისაღწევად.

ხელოვნება ცოცხალი და დამოუკიდებელია!“ - ნათქვამია პენცეტრის განცხადებაში, რომელსაც 70-ზე მეტი მწერალი აწერს ხელს.