ქუთაისის მერია 2023 წელს ქალაქის დღესასწაულის აღნიშვნაში 251 950 ლარს დახარჯავს - ამ თანხის მეხუთედი სტუმრების კვებისთვისაა განკუთვნილი.
„ქუთაისქალაქობა 2023“-ის აღნიშვნა დაიწყება ბაგრატის ტაძარში, სადაც ქუთათელ-გაენათელი მიტროპოლიტი იოანე დალოცავს ქუთაისს. ღონისძიებას დაესწრებიან ქალაქისა და მხარის პირველი პირები. ქალაქისა და მხარის პირველი პირები პატივს მიაგებენ და ყვავილებით შეამკობენ სამი ოთარის ძეგლს. ქუთაისის საერთაშორისო უნივერსიტეტში მოხდება დიპლომატიური კორპუსის მიღება, სადაც გიმნაზიელი გოგონები გვირილების გულსაბნევებს დაამაგრებენ სტუმრებს“, - ასეთია ამ დღის სტუმრებთან დაკავშირებული ინფორმაცია შესყიდვების სააგენტოს სისტემაში.
„ქუთაისქალაქობა“ 2 და 3 მაისს ცენტრალურ ბულვარში, განახლებულ ფალიაშვილის ქუჩასა და ცენტრალურ მოედანზე სპეციალურად მოწყობილ სივრცეებში გაიმართება.
2 მაისს დაგეგმილია საპატიო ქუთაისელების დაჯილდოება ქუთაისის დრამატულ თეატრში, სადაც ასევე კონცერტს გამართავს თბილისის სიმფონიური ორკესტრი ვახტანგ კახიძის დირიჟორობით. კონცერტში „ქართველი კომპოზიტორების კინომუსიკა“ მონაწილეობას მიიღებენ ეკა მამალაძე, დათო ნოზაძე, ნეკა სებისკვერაძე, გედი ჯინჭარაძე, ნატა კახიძე.
„ქუთაისქალაქობა“ დასრულდება გალა-კონცერტით ცენტრალურ მოედანზე, რომელშიც მონაწილეობას მიიღებენ: თბილისის ბიგ-ბენდი, მაია ბარათაშვილი, მარიკო ებრალიძე, ნესტან ჯიბლაძე, ნინი გველესიანი, თემო საჯაია, ზაურ ბოლქვაძე. კონცერტს გაუძღვებიან მანიკა ასათიანი და ზურა გორგაძე.
შესყიდვების საიტზე ამ დროისთვის განთავსებული ინფორმაცია არ მოიცავს შემსრულებლების ჰონორარების შესახებ მონაცემებს - სავარაუდოდ, ეს თანხა მოგვიანებით დაემატება „ქუთაისქალაქობის“ ბიუჯეტს.
radiotavisupleba.ge