ქუთაისში USAID-ის ეკონომიკური უსაფრთხოების პროგრამისა და სახელმწიფო ქონების ეროვნული სააგენტოს დაკვეთით 7 ჰექტარ ფართობზე მრავალფუნქციური ჰაბი იქმნება. პროექტს კომპანია Cushman & Wakefield Georgia ახორციელებს, რომელმა ლადო ასათიანის ქუჩაზე მდებარე, 7 ჰექტარი ტერიტორიის კონცეფცია და განვითარების გეგმა უკვე შეიმუშავა.

ტერიტორიაზე განთავსდება 100 ნომრიანი სასტუმრო, საცხოვრებელი კომპლექსი,“ფუდ ჰოლი“ , სავაჭრო ცენტრი და სამუშაო სივრცე.

„ჩვენმა გუნდმა სიღრმისეულად შეისწავლა საპროექტო ნაკვეთი და მისი საუკეთესო გამოყენებისა და ათვისების პერსპექტივა, როგორც საინვესტიციო, ისე ქალაქის საზოგადოებრივ-კულტურული განვითარების თვალსაზრისით. შემუშავებული კონცეფცია მოიცავს თანამედროვე, მრავალფუნქციური ჰაბის შექმნას, სადაც ერთ ტერიტორიაზე გაერთიანებული იქნება საცხოვრებელი კომპლექსი, 100 ნომრიანი, ბუტიკური ტიპის სასტუმრო, “ფუდ ჰოლი”, საერთო სამუშაო სივრცე და თანამედროვე სავაჭრო ცენტრი. პროექტის კონცეპტუალური გენერალური გეგმის შექმნაზე არქიტექტურულმა კომპანია “სტუდიო 21”-მა იმუშავა.

ჩვენი მიზანი იყო, შეგვექმნა კონცეპტუალურად და საინვესტიციოდ საინტერესო პროექტი, რომელიც როგორც ადგილობრივების, ისე ვიზიტორების მიზიდვის წერტილად იქცევა. ძველი ქალაქის თანამედროვე ნაწილი, რომელიც ქუთაისის ეკონომიკას მნიშვნელოვნად გარდაქმნის და გაამყარებს,“ - წერს კომპანია C&W Georgia ოფიციალურ გვერდზე.