საქართველოს პრემიერ-მინისტრის, ირაკლი ღარიბაშვილის განცხადებით, ქუთაისში ელექტროავტომობილების წარმოებისთვის საჭირო ქარხნის დიდი ნაწილი უკვე ჩამოტანილია.
როგორც ღარიბაშვილმა ქუთაისში, საარჩევნო შტაბთან შეხვედრის შემდეგ განაცხადა, პროექტის განსახორციელებლად ყველაფერს გააკეთებს.
„კიდევ ერთი მთავარი რამ მინდა ვთქვა ქუთაისელებისთვის, დაახლოებით, 2 წლის წინ იყო პროექტი, რომელიც ითვალისწინებდა ელექტროავტომობილების წარმოებას. გვყავდა ძალიან სერიოზული ინვესტორი, შემდეგ პანდემიამ შეაფერხა ეს პროცესი და საბოლოოდ, ამ პროექტის განხორციელებამ გადაიწია. ახლა მე მინდა ქუთაისელებს ვაცნობო, რომ ჩემი დავალებით, ჩვენ უკვე განვაახლეთ და დავიწყეთ მოლაპარაკებები ინვესტორ კომპანიასთან. ქარხნის დიდი ნაწილი ჩამოტანილია უკვე ადგილზე და ყველაფერს გავაკეთებ, რომ ეს პროექტი ბოლომდე მივიყვანო იმისთვის, რომ ქუთაისს დავუბრუნოთ ისტორიული მისია. აქ ჩვენ ძალიან მალე დავიწყებთ ავტომობილების გამოშვებასაც, ამისთვის მე პირადად ყველაფერს გავაკეთებ. მე როგორც პრემიერ-მინისტრი, აქტიურად ვიმუშავებ თითოეულ მერთან, მექნება მათთან მჭიდრო ურთიერთობა, გვექნება ძალიან კარგი კოორდინაცია იმისთვის, რომ ეს ამბიციური პროექტები განვახორციელოთ“, - განაცხადა ღარიბაშვილმა.
ცნობისთვის, ქუთაისში ინდუსტრიული კომპლექსის მშენებლობას AIGROUP ახორციელებდა. კომპლექსი100 ჰექტარ ფართობზე განთავსდა. პირველი პროექტი ელექტრომობილების საწარმოა, სადაც, საწყის ეტაპზე, დაახლოებით 300 ადგილობრივის დასაქმება იგეგმებოდა, ხოლო საწარმოს წარმადობა 5 000 ელექტრომობილზე იყო დაგეგმილი. პროექტი ხორციელდებოდა მსხვილი ჩინური კორპორაციის „ჩანგანის“ პარტნიორობით. გეგმის მიხედვით, 2020 წლის დასაწყისისთვის მსოფლიოს პირველი ქართული ელექტრომობილი უნდა ეხილა.
აქამდე არსებული პროექტით, სრული დატვირთვის პირობებში, ყოველწლიურად, 40 ათასი ელექტრომობილის გამოშვების პოტენციალი აქვს. ეს კი 3 ათასზე მეტი ადამიანის დასაქმების შესაძლებლობაა მთელი ქვეყნის მასშტაბით.პროექტის დასაწყისში საწარმოში 4 მოდელის ავტომობილს აწარმოებენ.
ქართული ელექტრომობილი გათვლილია როგორც ადგილობრივ, ისე ევროპისა და აზიის ბაზარზე დასაექსპორტებლად.
ავტორი: ბელა გელაშვილი