მეოთხე დღეა ქუთაისში უკრაინის მხარდასაჭერი აქცია იმართება. მოქალაქეები და აქტივისტები თავდაპირველად ცენტრალურ მოედანზე შეიკრიბნენ უკრაინას სოლიდარობა გამოუცხადეს. აქციის მონაწილეებმა უკრაინის დროშით ქალაქის ქუჩებში მსვლელობა მოაწყვეს, რის შემდეგაც მერიასთან მივიდნენ და ადგილობრივ ხელისუფლებას უკრაინის მხარდაჭერისკენ მოუწოდეს.
დიდება უკრაინას, დიდება მოძმე ხალხს!- ამ სლოგანით გაიმართა სოლიდარობის აქცია დღეს ფოთშიც.
პოლიტიკური პარტიების წარმომადგენლები და რიგითი მოქალაქეები 8 აგვისტოს ომში დაღუპულთა მემორიალთან შეიკრიბნენ და დაგმეს რუსული აგრესია.
აქციის მონაწილეებმა დაგმეს რუსეთის ქმედებები და მხარდაჭერა გამოუცხადეს უკრაინელ ხალხს. აქციაზე უკრაინის ჰიმნი გაჟღერდა.
,,ეს არის მხარდაჭერა და სოლიდარობის გამოხატვა უკრაინელი ხალხისადმი, უკრაინელი გმირებისადმი. დიდი მადლობა იმ ადამიანებს ვინც უკრაინაში იბრძვის, გარდა უკრაინელებისა სხვა ეროვნების ადამიანები იბრძვიან დიდება მათ, დიდება და გამარჯვება უკრაინას, - განაცხადა აქციის ერთ-ერთმა მონაწილემ, ლაშა ბერაიამ.
უკრაინის მხარდამჭერი აქცია ჩატარდა ზუგდიდშიც, სკეიტ პარკის ტერიტორიაზე.
აქცია ახალგაზრდების ორგანიზებულია და მას არასამთავრობო ორგანიზაციის წარმომადგენლები, ადგილობრივები და ოპოზიციური პარტიის წევრები შეუერთდნენ.
ისინი უკრაინას სოლიდარობას უცხადებენ და ომის შეწყვეტას მოითხოვენ.
უკრაინის მხარდამჭერი აქცია, დღეს ჩხოროწყუსა და მარტვილშიც გაიმართა. მსგავსი აქციები ზუგდიდში წინა დღეებშიც ჩატარდა.
ადგილობრივმა მოსახლეობამ უკრაინის სოლიდარობის აქცია გამართა ტყიბულშიც.
მოქალაქეებმა რუსეთის სამხედრო ინტერვენცია უკრაინაში გააპროტესტეს. აქციის მონაწილეების თქმით, უკრაინა ახლა განსაცდელშია და საქართველოს მეგობარი ქვეყნისთვის სოლიდარობის გამოცხადება მნიშვნელოვანია.