„ქვეყანა არის სრულ ტურბულენტურ მდგომარეობაში, როგორც სავალუტო მოცემულობით, ისე ეკონომიკური პარამეტრებით და პოლიტიკური გარემოთი, - ამის შესახებ ეკონომისტმა ოთო აბესაძემ რადიო „პალიტრისა“და „პალიტრანიუსის“ გადაცემაში „საქმე“ განაცხადა.

მისი თქმით, ასეთ ვითარებაში, 6 თვეში ან 1 წელში ინფლაციის მიზნობრივ მაჩვენებლამდე შემცირება, წარმოუდგენელია, თუმცა ეტაპობრივად და სწორი ნაბიჯებით ამის მიღწევა შესაძლებელია.

„ვინც იმას ამბობს, რომ ინფლაციას დაამარცხებს 6 თვეში ან ერთ წელში, უბრალოდ უვიცია, პირდაპირ შემიძლია ამის თქმა. როგორი ტემპითაც ინფლაცია იზრდება, იგივე ტემპით უნდა მოხდეს მისი დაგდება. უხეშად რომ ავიღოთ, საშუალო პარამეტრებით, მომდევნო 4 წლის განმავლობაში, წელიწადში მინიმუმ 3 მლრდ ვალუტის ინვესტირებაა საჭირო, რომ ეს სწორად „აიზელოს“ ეკონომიკას და მივიღოთ შედეგი, ინფლაცია წამოვიყვანოთ მინუსში. ამას ვაკეთებთ როგორ, პირველი, უპირობო პირობა, საგადასახადო და საინვესტიციო გარემო. დღეს ქვეყანაში ეს არ გვაქვს იმიტომ, რომ გვაქვს ნამახვანჰესის ქეისი, გემბლინგის ქეისი, ანუ რომლის შედეგადაც ძალიან ცუდი მესიჯი გავუშვით საქართველოდან, რომ აქ მსხვილი ინვესტიციის ჩადება დამოკიდებულია პოლიტიკურ ნიავზე.

მეორე, ეს არის საგადასახადო პოლიტიკა, მესამე სავალუტო კრიზისი და მეოთხე პოლიტიკური გარემო - სასამართლო გარემო და აშ.

მე მაქვს ძალიან აქტიური შეხება საერთაშორისო ორგანიზაციებთან, საფინანსო ინსტიტუტებთან და ყველა, ვინც კი ახორციელებს მსხვილ ინვესტიციას, პირველ რიგში, რეკომენდაციას იღებს მსოფლიო ბანკისგან, გარკვეული საერთაშორისო ორგანიზაციებისგან და თავს იკავებენ კაპიტალის დაბანდებისგან, რადგან საქართველოს ვეღარ აღიქვამენ მყარ ეკონომიურ პარტნიორად. იმიტომ, რომ ქვეყანა არის სრულ ტურბულენტურ მდგომარეობაში, როგორც სავალუტო მოცემულობით, ისე ეკონომიკური პარამეტრებით და პოლიტიკური გარემოთი. ერთიან სინქრონში ეს ყველაფერი რომ წარმოვიდგინოთ, ამის ფონზე მე პირადად, ძალიან ვწუხვარ, რომ წინასაახალწლოდ ამაზე საუბარი მიწევს, მაგრამ მინიმუმ 3 მლრდ ვალუტის შემოდინება, წარმოუდგენელია. ვრჩებით ისევ ემიგრირების იმედზე“,- განაცხადა ოთო აბესაძემ.

BPN.GE