საქართველოს საერთაშორისო ბაზრებზე შოკოლადის შესყიდვა გაუძვირდა, ამავდროულად, ქვეყანამ შოკოლადის შეძენა შეამცირა.

საქსტატის მონაცემებით, ქვეყანაში 2022 წლის იანვარ-ივნისში 26 065 790 დოლარის 7,940.88 ტონა შოკოლადი და კაკაოს შემცველი კვების სხვა მზა პროდუქტები შემოვიდა, რაც ღირებულებით მოცულობაში 2021 წლის ანალოგიურ პერიოდთან შედარებით 20,62%-ით მეტია, თუმცა რაოდენობრივი მაჩვენებელი 2.13%-ით შემცირებულია.

საანგარიშო პერიოდში პროდუქტის ყველაზე მსხვილი იმპორტიორი ქვეყანა რუსეთია, სწორედ მასზე მოდის იმპორტირებული შოკოლადისა და კაკაოს შემცველი კვების სხვა მზა პროდუქტების იმპორტის (რაოდენობით გამოსახულებაში) 52.56%, ერთ-ერთი მსხვილი იმპორტიორია ბელგიაც.

საქართველო აშშ-ს შოკოლადის ბაზარზე დამოკიდებული არ არის და აშშ-დან საქართველოში შოლოკადის იმპორტი არ ფიქსირდეა, მაგრამ ამერიკელი მწარმოებლები შოკოლადის დეფიციტზე უკვე ალაპარაკდნენ. აშშ-ის შოკოლადის ფილების მწარმოებელმა The Hershey Company-მ განაცხადა, რომ შემოდგომიდან,  გლობალური მიწოდების ჯაჭვის კრიზისის ფონზე, აშშ-ს შესაძლოა შოკოლადისა და ტკბილეულის დეფიციტი შეექმნას.

The Hershey Company-ის აღმასრულებელმა დირექტორმა მიშელ ბაკმა ბაზარი უკვე გააფრთხილა, რომ კომპანია ვერ შეძლებს დააკმაყოფილოს ჰელოუინის მოთხოვნა წელს.

„ჩვენ ვერ შევძლებთ სრულად დავაკმაყოფილოთ მომხმარებელთა მოთხოვნა“, - თქვა მან.

 ABC News-ის ცნობით, ჰელოუინზე ტკბილეულის გაყიდვები კომპანიის წლიური გაყიდვების თითქმის 10%-ს შეადგენს.

საგულისხმოა, რომ აშშ-ში შოკოლადის გაყიდვები მნიშვნელოვნად გაიზარდა კორონავირუსის პანდემიის დროს, თუმცა, ამჟამად, სხვა საქონელზე ფასების ზრდის გამო, ამერიკელები მიდრეკილნი არიან შეამცირონ საკონდიტრო ნაწარმის შესყიდვები.