გაყინულ რუსულ აქტივებს ომის შემდეგ უკრაინის აღსადგენად გამოიყენებენ. ამის შესახებ უკრაინის ცენტრალური ბანკის მმართველმა, კირილო შევჩენკომ BBC-ის განუცხადა, რომელმაც, უსაფრთხოების მიზეზების გამო, ტელეკომპანიის შეკითხვებს ელექტრონული ფოსტით უპასუხა.

ის კიდევ უფრო ვრცელ, დამატებით სანქციებს მოითხოვს, საბარათე გადახდების შეწყვეტიდან დაწყებული, საერთაშორისო სავალუტო ფონდთან რუსეთის წვდომის შეჩერებით დამთავრებული.

კირილო შევჩენკო ამბობს, რომ უკრაინის აღსადგენად „დიდი ფული იქნება საჭირო“ და მიყენებული ზარალი, ძირითადად, რუსეთმა უნდა აანაზღაუროს.

„ეს შესაძლოა, განხორციელდეს მრავალეროვნული ორგანიზაციების სესხებითა და გრანტებით, ასევე, სხვა ქვეყნების პირდაპირი დახმარებით. თუმცა დაფინანსების დიდი წილი, კომპენსაციის სახით, აგრესორისგან უნდა მივიღოთ, იმ თანხების ჩათვლით, რომლებიც ამჟამად ჩვენს მოკავშირე ქვეყნებში არის გაყინული,” - აცხადებს უკრაინის ბანკის მმართველი.

რუსეთის 630 მლრდ დოლარის სავალუტო რეზერვების დიდი ნაწილი ქვეყნის ფარგლებს გარეთ ინახება და სანქციების გამო აშშ-ში, ევროკავშირსა და სხვა ქვეყნებში გაყინულია. BBC-ის შეფასებით, თუ უკრაინა, ომის დასრულების შემდეგ, მასზე წვდომას შეძლებს, ქვეყანას რეკონსტრუქციისთვის მილიარდობით დოლარი გაუჩნდება.

კირილო შევჩენკო ფინანსური სანქციების ვრცელ სიას ასახელებს, რომელიც დამატებით უნდა დაწესდეს და რუსეთის ეკონომიკის ყველა სექტორს შეეხოს. ესენია:

• სავაჭრო და ფინანსური მონაცემების პლატფორმებმა, Refinitiv-მა და Bloomberg-მა რუს და ბელარუსელ კლიენტებს წვდომა შეუწყვიტონ
• შეერთებულმა შტატებმა და ევროკავშირმა დაავალონ თავიანთ ბანკებს, საკორესპონდენტო ურთიერთობა ყველა რუსულ ბანკთან გაწყვიტონ
• ცენტრალური ბანკების ორგანიზაცია „საერთაშორისო ანგარიშსწორების ბანკმა“ (Bank for International Settlements) რუსეთის ცენტრალური ბანკი ორგანიზაციიდან გარიცხოს
• საერთაშორისო სავალუტო ფონდმა რუსეთი და ბელარუსი თავის სხდომებს აღარ დაასწროს, ასევე, უნდა დაბლოკოს მათ წვდომა სავალუტო ფონდის მიერ გამოშვებულ აქტივებზე, სახელწოდებით, „სესხების სპეციალური უფლებები“ (Special Drawing Rights), რადგან ეს თანხა რუსეთმა შესაძლოა, უკრაინის წინააღმდეგ სამხედრო მოქმედებების დასაფინანსებლად გამოიყენოს.
• ჩინეთის საბარათე გადახდის სისტემა UnionPay-მ რუსული ბანკების მომსახურება შეწყვიტოს
• სომხეთმა, ყაზახეთმა, ყირგიზეთმა, ტაჯიკეთმა, თურქეთმა და ვიეტნამმა რუსული გადახდის სისტემა Mir დაბლოკონ
• ფულის გადარიცხვის საერთაშორისო ოპერატორმა, Western Union-მა რუსული და ბელარუსული ბანკებისთვის ნაღდი ფულის მიწოდება შეწყვიტოს

„მინდა ხაზგასმით აღვნიშნო, რომ დამატებითი სანქციების დაწესების ყოველი დაგვიანებული დღე მშვიდობიანი მოსახლეობისა და ბავშვების სიცოცხლის საფასურია,“ - აცხადებს შევჩენკო.

მისი თქმით, უკრაინის ცენტრალურმა ბანკმა, დაახლოებით, 11 მლრდ გრივნა (350 მლნ დოლარი) ორ სპეციალურ ანგარიშზე გადარიცხა, რომელიც ბანკმა სამხედრო და ჰუმანიტარული მიზნებისთვის შემოწირულობების მისაღებად მრავალ ვალუტაში გახსნა. სამხედროების ანგარიში 24 თებერვალს, ჰუმანიტარული კი 1 მარტს გაიხსნა.

კირილო შევჩენკოს ცნობით, მისი თანამშრომლები 24 საათის განმავლობაში მუშაობენ. ბევრი მათგანი დაბომბვისგან თავს იცავს და მიწისქვეშა ბუნკერებიდან საქმიანობს. ელექტრონული გადახდები და ბანკომატები კვლავ მუშაობენ, ნაღდი ფული კი, აქტიური საბრძოლო ზონების გარდა, ყველგან გაიცემა.

„სიამაყით შემიძლია ვთქვა, რომ უკრაინის საბანკო სისტემა საომარი მდგომარეობის პირობებშიც კი სტაბილური და ლიკვიდური რჩება,“ - აცხადებს შევჩენკო.

bpn.ge