„ქვეყანაში დასაქმების ყველაზე დიდი მაჩვენებელი ინფრასტრუქტურულ პროექტებს უჭირავს  და მისი შეჩერება თუნდაც კორონავირუსის გამო  არ შეიძლება,“- ამის შესახებ „კომერსანტს“ ინფრასტრუქტურის მშენებელთა ასოციაციის დირექტორმა ანა საბახტარიშვილმა განუცხადა. 

„თუმცა, თუ შეფერხდება ინფრასტრუქტურის დაფინანსება რა შედეგი შეიძლება მოჰყვეს ამას განვიხილავ.  ის წილი, რომელიც მთლიან შიდა პროდუქტს უჭირავს მშენებლობის სახით და ის წილი, რომელიც ინფრასტრუქტურულ პროექტებს აქვს საკმაოდ მნიშვნელოვანია.დიდია იმ დასაქმებულების რაოდენობა, რომელიც ინფრასტრუქტურულ პროექტებში არიან ჩართულები. თუ რეგიონში რამე პროექტზე მიდის მუშაობა ყველაზე მსხვილ დამსაქმებელს სწორედ სამშენებლო კომპანია წარმოადგენს, რომელიც ადგილობრივ მოსახლეობას ასაქმებს.

ინფრასტურქტურაზე მუშაობას ძალიან ბევრი ჯაჭვური ეფექტი, საქმეშია ჩართული არა მხოლოდ კომპანია რომელიც უშუალოდ მშენებლობას ახორციელბს არამედ მასალის მიმწოდებელი, ასევე ქვეკონტრაქტორები და სწორედ ამიტომ მნიშვნელოვანია მისი შეუფერხებლად განხორციელება.“-ამბობს ანა საბახტარიშვილი.

აკადემიკოსი  ავთანდილ სილაგაძე მიიჩნევს, რომ  ინფრასტრუქტურული პროექტების ნაწილის შეჩერება იმ მნიშვნელოვანი საქმეებისთვის თანხის დაზოგვაა, რომელიც კორონავირუსის გამო ქვეყანაში შეიქმნა. 

“როდესაც ვეძებთ თანხებს სხვადასხვა საშუალებით და თანხების დეფიციტი გაგვაჩნია,  შეიძლება გადაიხედოს ზოგიერთი ინდფრასტრუქტურული პროექტი რომლის გაჩერებით განსაკუთრებული არაფერი დაზიანდება და  ამ თანხით უფრო სარგებლიანი საქმე  გაკეთდება.მე არ ვამბობ, რომ საერთოდ გაჩერდეს ინფრასტრუქტურული პროექტები. მიმდინარე სამუშაოები რასაკვირველია უნდა გაგრძელდეს, თუმცა, რაც არის დაგეგმილი და არ წარმოადგენს გადაუდებელი მნიშვნელობის პროექტს, ეს შეიძლება შეჩერდეს და აქ დაიზოგოს თანხები.“-აცხადებს ავთანდილ სილაგაძე.

აკადემიკოსი საქართველოში უცხოური ინვესტიციების შემოდინებაზეც საუბრობს და აცხადებს, რომ ქვეყანაში ინვესტიციების რაოდენობა კორონავირუსამდეც შემცირებული იყო და მისი წილი არც სამომავლოდ  გაიზრდება.

„საუბრობენ, რომ უცხოური ინვესტიციები საგრძნობლად შემცირდება. დიდი ხანია ეს ტემპი არსებობს, თუმცა, არ იყო ისეთი სიმძლავრის, რომ გავლენა მოეხდინა ქვეყნის ეკონომიკაზე.ამ პირობებში ინვესტიციების შემოდინება, რა თქმა უნდა შედარებით მოიკლებს, რადგან გლობალური პრობლემაა და ალმოდებულ სახლში ფულს შესანახად არავინ შეიტანს. ასე გაგრძელდება გარკვეული პერიოდი და უნდა შევეგუოთ ამას.“-აცხადებს  ავთანდილ  სილაგაძე.

შეგახსენებთ, ქვეყანაში ინფრასტრუქტურული პროექტების ნაწილი რომ გაგრძელდება ამას პრემიერ-მინისტრის გადაწყვეტილებაც ადასტურებს. ინფრასტრუქტურული პროექტებისთვის სახელმწიფომ სამშენებლო მასალების ფასის ზრდა 200 მლნ ლარის ოდენობით უკვე დააზღვია.

ნათია ლომიძე