თბილისში სასტუმროების დიდი ნაწილი  დროებით დაიხურა, ნაწილი კი განახევრებული პერსონალით აგრძელებს მუშაობას.  მიზეზი კორონავირუსით გამოწვეული გაუქმებული ჯავშნებია.

სასტუმროების და რესტორნების ფედერაციის დამფუძნებელი შალვა ალავერდაშვილი „კომერსანტთან“ აცხადებს, რომ  სასტუმროს ბიზნესი მთავრობას სექტორისთვის შეღავათების ამოქმედებას სთხოვს. კერძოდ, იმ სასტუმროების შემთხვევაში, ვინც  იჯარას იხდის, კარგი იქნება, თუ საბანკო ვალდებულებები ორი თვით გადავადდება. 

„ბოლო ერთი წელია ტურიზმის სექტორი სერიოზული პრობლემის წინაშე დგას. უწყლოდ დარჩენილი ზამთრის კურორტების შემდეგ,  როდესაც  ტურისტებმა ჯავშნების 90% გააუქმეს, სექტორი  ახალი  კორონავირუსით გამოწვეული პრობლემების წინაშე დადგა.  სასტუმროების უმეტესობას რამდენიმე თვის  ჯავშნები გაუუქმნდათ, ნაწილმა კი რამდენიმე კვირით მუშაობა შეაჩერა.“-ამბობს შალვა ალავერდაშვილი.

შემცირებული ჯავშნების გამო,  „აჭარა ჯგუფმა“ დასაქმებულთა 50% ანაზღაურებად შვებულებაში გაუშვა. ამის შესახებ „კომერსანტს“ კომპანიაში განუცხადეს.

„იმის გამო, რომ ჯავშნების დიდი ნაწილი გაგვიუქმდა და ეს არის საერთაშორისო პრობლემა და არა ლოკალური, გადავწყვიტეთ ჩვენს თანამშრომლებს არ შევუქმნათ საფრთხე. შესაბამისად, ისინი ანაზღაურებად შვებულებაში გავუშვით. ბოლო 10 დღეში სასტუმროებში ჯავშნების 90% გაგვიუქმდა. ჩვენი სასტუმროები, თბილისისა და ყაზბეგში  20%-იანი დატვირთვით მუშაობს.“ - აცხადებენ „აჭარა ჯგუფში“.

თბილისში აფხაზის ქუჩაზე მდებარე სასტუმრო „კალასი“ ორი კვირით მუშაობას წყვეტს და ქვეყანაში მდგომარეობის დასტაბილურებას ელოდება. სამუშაო პროცესის შეჩერების მთავარ მიზეზად „კალასის“ შესყიდვების მენეჯერი ტატა სარჯველაძე გაუქმებულ ჯავშნებს ასახელებს.  

„ორი კვირით შევწყვიტეთ მუშაობა. ბოლო სამი თვეა რაც  ჯავშანი აღარ გავქვს და წაგებაზე მიდიოდა სასტუმრო. სწორედ ამის გამო გადავწყვიტეთ დროებით შეგვეჩერებინა სამუშაო პროცესი. ორი კვირის შემდეგ კი ჩვეულ რეჟიმში გავაგრძელებთ მუშაობას.“-ამბობს ტატა სარჯველაძე.

 სასტუმრო „მუზეუმის“ მარკეტინგის დეპარტამენტის ხელმძღვანელი სალომე გულორდავა, კორონავირუსისგან გამოწვეულ პრობლემებზე საუბრობს, თუმცა აცხადებს, რომ მათი სასტუმრო ჩვეულ რეჟიმში აგრძელებს მუშაობას.

„ჯავშნების დიდი ნაწილი გაგვიუქმდა, მაგრამ სასტუმრო არ დახურულა, ჩვეულებრივ რეჟიმში ვმუშაობთ. ვითვალისწინებთ ყველა რჩევას, რომელსაც გასცემენ შესაბამისი ორგანოები, თუ როგორ უნდა მოვიქცეთ არსებულ სიტუაციაში, სასტუმროში  ვატარებთ დეზინფექციას. სამომავლოდ რა როგორ იქნება,  პროგნოზს ვერ გავაკეთებთ, რადგან ეს არის გლობალური პრობლემა და არ ვიცით, როდემდე გაგრძელდება,“-ამბობს გულორდავა სალომე.  

შეგახსენებთ, რომ საქართველოში კორონავირუსით ინფიცირებულთა რიცხვი 23-მდე გაიზარდა. კარანტინის რეჟიმში ამ დროისთვის 126 ადამიანი იმყოფება, სტაციონარში მეთვალყურეობის ქვეშ კი 46 პაციენტი რჩება.

საქართველოში კორონავირუსით ინფიცირების პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

ნათია ლომიძე