მეტროპოლიების ჰორიზონტალურად და ვერტიკალურად ზრდის მაღალი ტემპით თურქეთი ევროპის რეგიონში პირველი ქვეყანაა. ამის შესახებ მაღალი შენობებისა და ურბანული გარემოს საბჭოს (Council on Tall Buildings and Urban Habitat-CTBUH) მონაცემებში წერია, რასაც Hurriyet ავრცელებს.
CTBUH-ის მონაცემებით, თურქეთში 67 ცათამბჯენია, რომლიდანაც 48 სტამბოლში მდებარეობს. მეტროპოლიაში მოსახლეობის რაოდენობა 16 მილიონზე მეტს შეადგენს. თურქეთში კიდევ რვა ცათამბჯენის მშენებლობა მიმდინარეობს, მათ შორის არის ცენტრალური ბანკის შენობა, რომელიც სტამბოლის ფინანსურ ცენტრში შენდება.
CTBUH-ის რეიტინგში ცათამბჯენი განისაზღვრება შესახლებულ მაღალ შენობად, რომელიც 40 სართულზე მეტია და 150 მეტრზე მაღალია.
რეგიონში თურქეთს რუსეთი მოსდევს, სადაც 51 ცათამბჯენია, ხოლო მესამე ადგილზე 33 საოფისე კოშკით დიდი ბრიტანეთია. მაღალსართულიანი შენობების რაოდენობა გერმანიაში 20-ია, ესპანეთში - 13, ხოლო პოლონეთში - 12. ნიდერლანდებსა და იტალიაში ამ ტიპის შენობა თანაბრად, ექვს-ექვსი აშენდა. ევროპის დანარჩენი ორი ცათამბჯენი შვეიცარიასა და შვედეთში მდებარეობს.
ევროპის ქალაქების კატეგორიაში მოსკოვი და ლონდონი სტამბოლს 46 და 30 ცათამბჯენით მისდევენ. ევროპის ქალაქების ცათამბჯენების სიის ათეულში თურქეთის კიდევ ორი ქალაქი, დედაქალაქი, ანკარა 11 ცათამბჯენითა და ეგეოსის პროვინცია, იზმირი ექვსი ცათმბჯენით მოხვდნენ.
მსოფლიოს ქალაქებს შორის ჩინეთის სპეციალური ადმინისტრაციული რეგიონი, ჰონგ კონგი 150 მეტრზე მაღალი 518 მაღალსართულიანი შენობით ჩემპიონია. ტოპ 100-ეულში თურქეთიდან მხოლოდ ორი ქალაქი შევიდა, სტამბოლი 31-ე და ანკარა 98-ე ადგილზე.
გლობალურად თურქეთი მე-14 ადგილს იკავებს იმ ქვეყნების სიაში, სადაც ყველაზე მეტი ცათამბჯენია.
ცათამბჯენების რაოდენობით მსოფლიო ქვეყნების სია ასეთია:
ჩინეთი (2719)
შეერთებული შტატები (855)
არაბეთის გაერთიანებული საემიროები (311)
სამხრეთ კორეა (275)
იაპონია (270)
მალაიზია (142)
ავსტრალია (138)
ინდონეზია (127)
ტაილანდი (124)
კანადა (122)
ფილიპინები (120)
ინდოეთი (97)
სინგაპური (96)
თურქეთის გარემოს დაცვის, ურბანიზაციისა და კლიმატის ცვლილების სამინისტროს მონაცემებით, სტამბოლში, დაახლოებით, 6,4 მილიონი საცხოვრებელი კორპუსია. მათგან 4,4 მილიონ კორპუსი ოფიციალურად შესახელბულია. მეტროპოლიის ყველაზე მაღალი შენობა 284 მეტრის სიმაღლის Skyland Residential Tower-ია. თუმცა სტამბოლის ათაშეჰირის (Ataşehir) რაიონში ცენტრალური ბანკის ახალი შენობის დასრულების შემდეგ, ის 352 მეტრის სიმაღლით პირველ ადგილს დაიკავებს. სტამბოლის ფინანსურ ცენტრში მაღალ საოფისე კოშკებს, ასევე, თურქეთის სახელმწიფო ბანკები, Ziraat, Vakıfbank და Halkbank აშენებენ.
CTBUH-ის მონაცემებით, 2000 წელს თურქეთში 150 მეტრზე მეტი სიმაღლის მხოლოდ ხუთი მაღალსართულიანი შენობა იყო.
CTBUH-ის „მსოფლიოში ყველაზე მაღალი შენობის“ ტიტული მაღალი შენობების ოფიციალურ სიმაღლეების შესახებ ავტორიტეტულ რეიტინგად ითვლება. საბჭოს გაცხადებული მისია არის „მაღალი შენობების დაგეგმვის, დაპროექტებისა და მშენებლობის ყველა ასპექტის შესწავლა.“
CTBUH 1969 წელს, ლინ ს. ბიდლის მიერ პენსილვანიის შტატის ლეჰაის უნივერსიტეტში დაარსდა, სადაც მისი ოფისი 2003 წლის ოქტომბრამდე მდებარეობდა, ვიდრე ის ჩიკაგოში, ილინოისის ტექნოლოგიურ ინსტიტუტში გადავიდოდა.
ცათამბჯენი
