საქართველო-არაბეთის გაერთიანებულ საამიროებს შორის არსებული ეკონომიკური ურთიერთობების გაღრმავებაზე საქართველო-არაბთა გაერთიანებული საამიროების ბიზნეს საბჭო იზრუნებს, რომელიც ოფიციალურად დღეიდან ამოქმედდება. ამ მიზნით, საქართველოს სავაჭრო პალატის პრეზიდენტმა, გიორგი პერტაიამ, სააგენტოს „აწარმოე საქართველოში“ დირექტორის მოადგილემ, თორნიკე ზირაქიშვილმა და არაბთა გაერთიანებული საამიროების სავაჭრო-სამრეწველო პალატების ფედერაციის თავმჯდომარემ, აბდულა ალ მაზურიმ ხელი მოაწერეს, საქართველო-არაბთა გაერთიანებული საამიროების ბიზნეს საბჭოს ჩამოყალიბების მემორანდუმს.
ბიზნეს საბჭოს შექმნა მიზნად ისახავს ქვეყნებს შორის სავაჭრო-ეკონომიკური კავშირების გაღრმავების კოორდინირებას, ინვესტიციების განხორციელებისა და ვაჭრობის წახალისების გზით.
საბჭო სამომავლოდ დაკომპლექტებული იქნება ორივე ქვეყნის შესაბამისი დარგის მინისტრების, თავად მემორანდუმზე ხელმომწერი სუბიექტებისგან. საბჭოს საბოლოო ფორმირების შემდეგ ჩაინიშნება სხდომები, სადაც ორ ქვეყანას შორის არსებული ბიზნეს და ეკონომიკური ურთიერთობების კიდევ უფრო გაღრმავება და ახალი ინიციატივების განხილვა მოხდება.
მემორანდუმის ხელმოწერის ცერემონია, საქართველოში არაბთა გაერთიანებული საამიროების სამთავრობო დელეგაციის ოფიციალური ვიზიტის ფარგლებში გაიმართა.
აღსანიშნავია, რომ ბოლო წლების განმავლობაში საქართველო-არაბეთის გაერთიანებულ საამიროებს შორის სავაჭრო-ეკონომიკური ურთიერთობები ღრმავდება. 2022 წლის 7 თვეში სავაჭრო ბრუნვა წინა წლის ანალოგიურ პერიოდთან შედარებით 82 პროცენტით, ხოლო ექსპორტი 34 პროცენტით გაიზარდა.
მხარეები თანხმდებიან იმაზე, რომ ვაჭრობის მხრივ ქვეყნებს შორის პოტენციალი დიდია და თავისუფალი ვაჭრობის შეთანხმების ამოქმედების შემდეგ სავაჭრო ბრუნვის მაჩვენებელი მნიშვნელოვნად გაიზრდება.
დღეის მდგომარეობით, საქართველოში დარეგისტრირებულია 190 კომპანია არაბთა გაერთიანებული საამიროებიდან კაპიტალის მონაწილეობით.