დღეისათვის, თითოეულ მორიგეობაზე სასწრაფოს ექიმს 10%-იანი ზრდით აქვს 250 ლარი დარიცხული. აღნიშნულის შესახებ დღეს მთავრობის სხდომის დასრულების შემდეგ ჯანდაცვის მინისტრმა ზურაბ აზარაშვილმა განაცხადა. მისი თქმით, ჯანდაცვის სამინისტრო სასწრაფოს ექიმებისთვის პირობების გაუმჯობესების მიზნით, შესაძლებლობის ფარგლებში, ყველაფერს აკეთებს.

მინისტრის თქმით, იქიდან გამომდინარე, რომ სხვადასხვა სამედიცინო სფეროს წარმომადგენლებს, სამწუხაროდ, ძალიან დაბალი ხელფასები აქვთ, მიმდინარე წელს სამინისტრო იძულებული გახდა, მინიმალური ხელფასები დაეწესებინა.

„და განვსაზღვრეთ მინიმალური ხელფასები. არ ვფიქრობ, რომ ეს მათთვის ადეკვატური, ღირსეული ხელფასია, თუმცა არის მინიმუმი ექთნის შემთხვევაში, 800 ლარამდე, ექიმის შემთხვევაში – 1 200 ლარის ფარგლებში.

რაც შეეხებათ სასწრაფოს ექიმებს, თითოეულ მორიგეობაზე სასწრაფოს ექიმს უკვე ათპროცენტიანი ზრდით აქვს 250 ლარი დარიცხული დღეში. ვგულისხმობ თითოეულ მორიგეობას;

ასევე, გასული წლის განმავლობაში სამჯერ მივეცით მათ ეგრეთ წოდებული პრემია. ჩვენს უწყებაში შემავალ არც ერთ სხვა სამსახურს სამჯერ ასეთი პრემია, ბონუსი არ აუღია; დაზღვევასთან დაკავშირებით იყო სხვადასხვა სპეკულაცია. ჯერ კიდევ ნოემბრის ბოლოს დავიწყეთ მათთვის ახალი სადაზღვევო პაკეტის შემუშავება. სულ მცირე, საშუალოდ ორჯერ არის გაუმჯობესებული პირობები. ზუსტად ამ გაუმჯობესებული პირობების და შესაბამისად, მნიშვნელოვნად გაძვირებული სადაზღვევო პრემიუმის გამოა, რომ სადაზღვევო კომპანიებს შორის ძალიან დიდი კონკურენციაა. უკვე მეორე თვეა, მიმდინარე ტენდერი გასაჩივრებულია და დავების საბჭოზე ელოდება განხილვას. ეს არის მხოლოდ და მხოლოდ იქით მიმართული, რომ მათთვის გაუმჯობესდეს როგორც სადაზღვევო პაკეტი, ისე ხელფასი, რასაც ჩვენ ვუხდით. ასევე ოფისების უდიდეს ნაწილში დავიწყეთ რემონტი, კარგი სამუშაო პირობების შექმნა. ცალკე ვაკეთებთ თბილისის სასწრაფოსთვის ოფისს, რომელიც რამდენიმე თვეში გაიხსნება. მიმდინარეობს ავტოპარკის განახლება. ერთი ტენდერი ჩატარდა, მეორე ტენდერიც გამოცხადებულია და მიმდინარე წელს მანქანებსაც მიიღებენ. ეს ყველაფერი ერთობლიობაში არის მაქსიმუმი, რაც ჩვენ შეგვიძლია. ეს არის, რასაც ვაკეთებთ და არ მინდა, ისეთი განცდა დარჩეს საზოგადოებას, რომ ვართ ოფისებში და არაფერს ვაკეთებთ. ეს არის, რაც შეგვიძლია, რასაც ვაკეთებთ და კიდევ ბევრს გავაკეთებთ. ჩვენთან შემოდის კიდევ ცხრა სიპი, ყველამ რომ ხელფასის გაორმაგება მოითხოვოს, რასაკვირველია, ყველას შეუძლია, მაგრამ უნდა იყოს იმისი ადეკვატური, რა შესაძლებლობაც გვაქვს“, – განაცხადა ზურაბ აზარაშვილმა.