მიიღე ინფორმაცია უფრო სწრაფად ჩვენს Telegram-ზე.
არაკომერციულმა საერთშორისო საინფორმაციო ქსელმა რუსი ოლიგარქების მონაცემთა ბაზა, Russian Asset Tracker ჩაუშვა, რომელიც პუტინის მოკავშირე გავლენიანი რუსების აქტივებს თვალყურს ადევნებს. ინფორმაციას CNN ავრცელებს.
ორგანიზებული დანაშაულისა და კორუფციის გაშუქების პროექტის, OCCRP-ის (Organized Crime and Corruption Reporting Project) თანახმად, ეს არის „ოლიგარქების აქტივების ყველაზე სრულყოფილი საჯარო მონაცემთა ბაზა, რაც კი დღემდე შექმნილა.“ Russian Asset Tracker-ის ჩასაშვებად 27 მედიასაშუალება თანამშრომლობდა. ინსტრუმენტი ინტერაქტიულია და ასახავს „უზარმაზარ სიმდიდრეს, რომელსაც პუტინის ოლიგარქები და საკვანძო ფიგურები რუსეთის ფარგლებს გარეთ ფლობენ.“
საგამოძიებო პროექტმა 150-ზე მეტი აქტივი აღმოაჩინა, რომლის ღირებულებაც, დაახლოებით, 17 მლრდ დოლარია. მათ შორის არის უძრავი ქონება, კერძო თვითმფრინავები, კომპანიის აქციები, იახტები, სასახლეები და სხვა. ჟურნალისტებმა ეს აქტივები მიწის ჩანაწერების, კორპორატიული რეესტრისა და ოფშორული გაჟონვის შედეგად აღმოაჩინეს.
„პუტინის რუსეთს ადამიანთა მეტად მცირე ჯგუფი აკონტროლებს, რომელიც მას საშუალებას აძლევს, ხელისუფლება შეინარჩუნოს. ეს ჯგუფი, რუსი ხალხის ხარჯზე, პუტინის მფარველობის სისტემით სარგებლობს,“ - აცხადებს OCCRP-ის გამომცემელი დრიუ სალივანი.
პროექტში ბრიტანული The Guardian-იც მონაწილეობს, რომლის ცნობითაც, იდეა თებერვალში, უკრაინაში რუსეთის შეჭრამდე გაჩნდა. პროექტი 35 ადამიანის სიით დაიწყო, რომელიც შარშან ციხეში მყოფმა ოპოზიციის ლიდერმა, ალექსეი ნავალნიმ დაასაახელა და მათ „კრემლის კლეპტოკრატიის ძირითადი შემქმნელები და ბენეფიციარები“ უწოდა. უკრაინაში შეჭრიდან სამი კვირის შემდეგ, ამ სიიდან 27 პირი აშშ-ისა და ევროპის სანქციების ქვეშ მოექცა, ხოლო კიდევ შვიდი პირი კანადის შავ სიაში მოხვდა.
ამ 35-კაციან სიაში არიან:
რომან აბრამოვიჩი - 55 წლის ოლიგარქი, რომლის ქონება 13,5 მლრდ დოლარს შეადგენს. მიუხედავად იმისა, რომ ის გაერთიანებული სამეფოს სანქციების სიაში ჯერ არ შედის და პუტინთან კავშირს უარყოფს, აბრამოვიჩმა ცოტა ხნის წინათ ჩელსის საფეხბურთო კლუბის გაყიდვაზე განცხადება გააკეთა, რომელიც მან 2003 წელს შეიძინა. OCCRP-ის მონაცემთა ბაზა აჩვენებს, რომ მას, მინიმუმ, 7 მლრდ დოლარის აქტივები აქვს, მათ შორის არის ზღვისპირა ვილა პოპულარულ ფრანგულ რივიერაში, Bombardier-ის კერძო თვითმფრინავი და რამდენიმე უძრავი ქონება ლონდონის რაიონებში.
ალიშერ უსმანოვი - რუსეთის ერთ-ერთი უმსხვილესი სამთო-მეტალურგიული ჰოლდინგ „მეტალოინვესტის მფლობელი. რუს მილიარდერთა Forbes-ის 2021 წლის რეიტინგში უსმანოვი, 18.4 მლრდ დოლარის ქონებით, მე-7 ადგილს იკავებს. თავისი აქტივების დიდი ნაწილი უსმანოვმა ბუნებრივი წიაღისეულით იშოვა, თუმცა წლების განმავლობაში არაერთი სარფიანი ინვესტიცია განახორციელა, მათ შორის Facebook-ში, Apple-ში, Twitter-ში, Alibaba-სა და საფეხბურთო კლუბ Arsenal-ში.
იგორ სეჩინი - რუსული ნავთობგიგანტის, „როსნეფტის“ აღმასრულებელი დირექტორი, რომელსაც თვეში 295-390 ათას დოლარამდე ერიცხება.
ოლეგ დერიპასკა - 54 წლის მილიარდერი მსოფლიოში ალუმინის მეორე უმსხვილესი კომპანია Rusal-ის დამაარსებელია და 45%-იან წილს ფლობს. მისი ქონება შეფასებულია 2,3 მლრდ ფუნტ სტერლინგად. დერიპასკას დიდ ბრიტანეთში მრავალმილიონანი ფუნტის ქონების პორტფელი აქვს, რაც ვირჯინიის კუნძულების ოფშორულ კომპანიაზე არის გაფორმებული.