„ბოლო წლებია ეროვნულ ბანკს არ მიეცა ნორმალურ და თანაბარ პირობებში მაკროეკონომიკური პოლიტიკის გატარების შესაძლებლობა“, - ამის შესახებ რადიო „კომერსანტის“ ეთერში პრეზიდენტის ადმინისტრაციის ყოფილმა ხელმძღვანელმა და „ჯეოქეისის“ მკვლევარმა გიორგი აბაშიშვილმა ისაუბრა. მისი თმით, კორონავირუსის რამდენიმე ტალღამ და ახლა უკვე რუსეთ-უკრაინის ომმა პოსტ საბჭოთა ქვეყნების ეკონომიკებზე დიდი გავლენა მოახდინა.
„ჯერჯერობით ფუნდამენტური ფაქტორების შედეგი მოკლე დროში ვერ დადგებოდა, ეს ყველაფერი გამოწვეულია მოლოდინებით და შესაბამისად ნეგატიურ მოლოდინებს ბაზარზე პანიკური ქცევა ახლავს თან, თუ ამას არ მოჰყვა გარკვეული ტიპის სტაბილიზაციის ნიშნები ან მეტი ინფორმაცია იმაზე, რომ სანერვიულო და საპანიკო არაფერი არ არის, თუ შესაბამის პირების მხრიდან ასეთი ტიპის მესიჯები არ მოყვა და ეს მოსახლეობამ არ დაიჯერა, ბუნებრივია პანიკას ჩახშობა გაუჭირდება. ინფლაციური მოლოდინების შემცირება ხდება მაშინ, როდესაც მოლოდინები სწორად არის მართული, მათ შორის საინფორმაციო კამპანიებიდან, ამისთვის საჭიროა კიდევ ფურო მეტად აქტიური კომუნიკაცია მოსახლეობასთან, თუ სად ვიმყოფებით, რა მდგომარეობაა იგივე მარაგებთან და სასურსათო უსაფრთხოებასთან დაკავშირებით და თუ ეს საინფორმაციო ნაკადები სწორად იქნება მიწოდებული, მე ვფიქრობ, რომ პანიკის წილი ნამდვილად გაქრება, რაც შეეხება სხვა ფუნდამენტურ ფაქტორებს გასაგებია რომ რისკები დარჩება და ამას ვერანაირი საინფორმაციო მართვა ვერ უშველის ვთქვათ ფულადი გზავნილების პოტენციურ შემცირებას, ექსპორტის შემცირებას და ტურისტების შემცირებას“, - აღნიშნა გიორგი აბაშიშვილმა.
აბაშიშვილის თქმით იმისათვის, რომ წლის ბოლომდე ზუსტი პროგნოზი დაისვას, უნდა ვიცოდეთ თუ როგორ განვითარდება ომი უკრაინაში, თუმცა მან ასევე აღნიშნა, რომ ეს საკითხი მთელი მსოფლიოსთვის კითხვის ნიშნის ქვეშ არის. აბაშიშვილმა ასევე აღნიშნა, რომ საქართველოსთვის ერთადერთი სწორი გზა არის პარტნიორებთან სტაბილურობის შენარჩუნება და საერთაშორისო ფინანსურ ინსტიტუტებთან კოორდინირებული მუშაობა.
„არსებულ ვითარებაში, მიუხედავად იმისა, თუ როდის დასრულდება კონფლიქტი, საბოლოო ჯამში რუსეთის პირისპირ დიდი ხნით დარჩება, რაც მსოფლიო ბაზარზე და ბევრი ქვეყნის ეკონომიკაზე გავლენას დიდ ხანს მოახდენს. ამიტომ, თუ ჩვენ გვინდა რომ სტაბილურობა შევინარჩუნოთ ამის ერთადერთი გზა არის ის, რომ ჩვენ პარტნიორებთან და საერთაშორისო საფინანსო ინსტიტუტების ჩართულობით შემდგომი ეკონომიკური პოლიტიკის, მათ შორის მაკროეკონომიკური სტაბილურობის უზრუნველსაყოფად და სხვადასხვა ტიპის პროექტების განსახორციელებლად გადავდგათ ნაბიჯები. თუ საერთაშორისო საფინანსო ინსტიტუტებთან და ჩვენ დასავლელ პარტნიორებთან ჩვენი მოქმედებები იქნება კოორდინირებული, მაშინ მე ვფიქრობ, რომ ქვეყანას უფრო დიდი შესაძლებლობა აქვს რომ პოზიტიური ეკონომიკური ზრდა შეინარჩუნოს, რომელიც მეტნაკლებად თავისუფალი იქნება განსაკუთრებული და სერიოზული რყევებისგან, სხვა შემთხვევაში ყველაზე დიდი რისკი, რომელიც შეიძლება ახლა იყოს, არის ის, რომ რუსეთთან დავრჩეთ პირისპირ, რაც ჩვენ არც ერთ შემთხვევაში არ უნდა დავუშვათ, შესაბამისად ნებისმიერი ნაბიჯი რუსეთთან ნებისმიერი ორმხრივი ეკონომიკური ურთიერთობის, თუნდაც თვითინიციატივები მათ შორის ცალკეული კომპანიების დონეზე პირდაპირი მნიშვნელობით დამღუპველია. ამიტომ მხოლოდ პარტნიორებთან და საერთაშორისო საფინანსო ინსტიტუტებთან კოორდინირებული მოქმედება არის გზა, რომელიც საქართველოს ეკონომიკის სტაბილურობას და განვითარების ნიშნების შენარჩუნებას შეუწყობს ხელს.
სამწუხაროდ, არის ცალკეული კომპანიების ინიციატივები, რომლებიც ქვეყნის იმიჯს აზარალებს, მაგალითად როდესაც ნებსით თუ უნებლიედ რაღაც ფორმით ჩვენ რუსეთს ვეხმარებით, ამ შემთხვევაში ვგულისხმობ აირზენას, რომელიც სანქციებიდან თავის არიდებას ცდილობს, ეს არის ის საკითხები, რომელზეც ფრთხილად უნდა ვიყოთ და ჩვენდა უნებურად ხელის შემწყობები არ უნდა გავხდეთ. მე მგონია, რომ სიფრთხილის პარალელურად ჩვენი დაცულობის ერთადერთი გზა არის კოორდინირებული ქმედებები ჩვენ უცხოელ პარტნიორებთან, მეტი აქტიურობა გვჭირდება ახლა ჩვენ ევროკავშირთან, მითუმეტეს როცა ლაპარაკია განაცხადზე გაწევრიანებასთან დაკავშირებით. კიდევ უფრო მეტი აქტიურობა გვჭირდება რომ სხვადასხვა ეკონომიკური აქტივობები გავატაროთ, დავუახლოოთ ჩვენი ეკონომიკა ევროპულ ბაზარს, რადგან განაცხადი დარჩება ჰაერში, თუ მას არ მიჰყვა სამუშაოები“, - აღნიშნა გიორგი აბაშიშვილმა.
მისივე თქმით, მიუხედავად იმისა, რომ ახლა ამისთვის არავის სცალია, საქართველომ უნდა ეცადოს და გააძლიეროს ურთიერთობები, როგორც სტრატეგიულ პარტნიორებთან ასევე აშშ-სთან და უნდა ეცადოს რომ საქართველოსა და აშშ-ს შორის თავისუფალ ვაჭრობაზე ხელშეკრულება ამოქმედდეს.
თაკო კვაჭანტირაძე