გვიანი დიაგნოსტიკა და ჰოსპიტალიზაცია, პირველადი ჯანდაცვის ჩავარდნა და ვაქცინაციის დაბალი ტემპი — ეს 3 ძირითადი მიზეზია, რასაც საქართველოში კოვიდ-პაციენტების მაღალი სიკვდილიანობის მიზეზად მიიჩნევს ვატო სურგულაძე, ჯანდაცვის მენეჯმენტის ექსპერტი. მისი თქმით, ოჯახის ექიმის როლი მკურნალობის პროცესში მინიმალურ დონეზეც არ არის და ამ მიმართულებით სისტემამ რეალურად ვერ იმუშავა.
ცალკე პრობლემაა ექიმების დაბალი კვალიფიკაცია. როგორც სურგულაძე აღნიშნავს, ამ ყველაფერს ერთვის ისიც, რომ ექიმები გადაიღალნენ და მათ მიერ პაციენტების მკურნალობის მართვის პროცესი ნაკლებად ეფექტურია.
,,ინფიცირებული მოქალაქეების დიაგნოსტირება გვიანდება. ოჯახის ექიმის ინსტუტუტი ფაქტობრივად არ მუშაობს. მას არათუ კვირაში ერთხელ, ყოველდღიურად უნდა ჰქონდეს კომუნიკაცია პაციენტთან, რაც ვერ ხერხდება. სტუდენტები შეიყვანეს საველე ჰოსპიტალებში, იქ არაფერი ესაქმებათ, ოჯახის ექიმებისთვის უნდა მიემაგრებინათ, რათა მაქსიმალურად გაძლიერდეს ყოველდღიური მკურნალობა. ჰოსპიტალიზაცია გვიანდება და, შესაბამისად, ხალხი გვეღუპება. ამასთან, მედპერსონალის სიმცირეა, ვამბობთ, რომ ბევრს კვალიფიკაცია არ ყოფნის, მაგრამ ამავე დროს ექიმები მორალურად და ფიზიკურადაც გადაიღალნენ. ყველაზე მეტად მაინც პირველადი ჯანდაცვის პრობლემა დგას, რის გამოც ადამიანები გვეღუპებიან“, - ამბობს სურგულაძე.
მისი თქმით, თავიდანვე არასწორი იყო ონლაინ კლინიკების ჩართვა, რადგან რეალურად ვერც ამ სისტემამ იმუშავა.
,,ახლა პოლიკლინიკის ექიმები ჩართეს, მაგრამ ვერც ამას აქვს ეფექტი. ოჯახის ექიმს უნდა მიამაგრო სტუდენტი, რათა დაეხმაროს სხვადასხვა ტექნიკური საქმიანობის შესრულებაში. სულ ცოტა ხნის წინ დაფიქსირდა შემთხვევა, როცა ექიმმა კოვიდ-ინფიცირებულს გამუწერა წამალი და უთხრა, თვითონ უნდა მისულიყო საავადმყოფოშიო. ავადმყოფმა გაიკეთა 2 ნიღაბი, ჩაჯდა ტაქსიში და წავიდა. დიდი ალბათობით, დაავადებას ტაქსის მძღოლსაც გადასდებდა და კიდევ ვინ იცის, რამდენს! სისტემური პრობლემაა, რაც ხდება, უცოდინარი ხალხის უმოქმედობის შედეგია. ახლაც საუბარია, რომ გაამკაცრონ რეგულაციები, როცა არსებული შეზღუდვები არ სრულდება“, - აცხადებს ვატო სურგულაძე.
ჯანდაცვის მენეჯმენტის ექსპერტი იმუნიზაციის პროცესთან დაკავშირებით აცხადებს, რომ სრულად ვაქცინირებული მოქალაქეების 10% არაფერს ნიშნავს, სანამ ეს მაჩვენებელი, მინიმუმ, 40%-ს არ მიაღწევს, რადგან სხვა შემთხვევაში შეუძლებელია სასურველი შედეგი დადგეს.
სპეციალისტები საუბრობენ იმაზეც, რომ ინფიცირებულების მკურნალობის პროცესი არ მიდის ჯანსაღად და შემდეგ უკვე გართულებულ მდგომარეობას მედიკოსები ვერ ერევიან. ყველაზე მეტი მკითხვის ნიშანი კი იმუნიზაციის მიმართულებით არსებობს. ბიოქიმიკოსი, ამერიკის ფარმაკოგნოზიის საზოგადოების ნამდვილი წევრი, პროფესორი რამაზ გახოკიძე ამბობს, რომ ადამიანი თითქმის მთლიანად ხელოვნურ იმუნიტეტზე ხდება დამოკიდებული, რაც ერთ-ერთი დიდი შეცდომაა.
,,მასობრივად ხდება ინფიცირებულების გამოკეტვა, რაც იწვევს უჰაერობას და ეცემა იმუნიტეტი. მკურნალობისას საერთოდ ამოღებულია ბუნებრივი ბრძოლის საშუალებები, თაფლი, ასკილი და სხვა. ამ დროს ძლიერი იმუნიტეტი ნებისმიერ ვირუსთან ბრძოლის საუკეთესო საშუალებად არის მიჩნეული. მართალია, აცრებით და სხვადასხვა ვიტამინის საშუალებით იმუნიტეტის გაძლიერება მეტ-ნაკლებად შესაძლებელია, მაგრამ ბუნებასთან სიახლოვეს ალტერნატივა რეალურად არ აქვს. ადამიანის ორგანიზმი არასწორი ცხოვრების წესის გამო მოდუნებულია და ყველაზე სუსტ ვირუსთან გამკლავებაც კი უჭირს. მით უმეტეს ახლა, როცა კორონავირუსის ეპიდემია მძვინვარებს. მკურნალობის პროცესში სწორ კვებასთან ერთად, ზომიერი ფიზიკური დატვირთვაც საჭიროა, რაც ინფიცირების შემთხვევაშიც ძალიან მნიშვნელოვანია. რეკომენდაციების გაცემისას ექიმებმა სწორედ ეს ფაქტორები უნდა გაითვალისწინონ. ქიმიურად შექმნილ იმუნიტეტს ეფექტი არ აქვს და სარგებლის ნაცვლად, ჯანმრთელობისთვის საზიანოა“, - ამბობს გახოკიძე.
ცნობისთვის, ბოლო 24 საათში საქართველოში კორონავირუსის 5021 ახალი შემთხვევა დადასტურდა. დაავადებათა კონტროლის ეროვნული ცენტრის ინფორმაციით, გასულ დღე-ღამეში გარდაიცვალა კიდევ 58 პაციენტი.
რაც შეეხება ვაქცინაციის პროცესს, დღიურად, 24 აგვისტოს 28 196 მოქალაქე აიცრა.
სულ საქართველოში 1 038 292 აცრა გაკეთდა.
სულ მცირე 1 დოზით ვაქცინირებულია 719 380 ადამიანი - მოზრდილი მოსახლეობის 25.2%; სრულად ვაქცინირებულია 318 912 ადამიანი - მოზრდილი მოსახლეობის 11.2%
მარი ჩიტაია