რა იგეგმება რესპუბლიკური საავადმყოფოს შენობასა და პერსონალთან დაკავშირებით, ამის შესახებ დღეს ჟურნალისტებთან ჯანდაცვის მინისტრმა ზურაბ აზარაშვილმა ისაუბრა. მისი თქმით, რესპუბლიკურის თანამშრომლები  სხვადასხვა კლინიკებში გადანაწილდებიან, ვინც ვერ დასაქმდება, მათ იგივე სახელფასო ანაზღაურება შეუნარჩუნდებათ.

„ჩვენ იმდენად მასშტაბურ პროექტს ვგეგმავთ, რომ იქ შეუძლებელია სამშენებლო პროცესის პარალელურად თუნდაც ამბულატორიის ნაწილი დარჩეს და გააგრძელოს მუშაობა, ამიტომ სამედიცინო პერსონალს, ყველა თანამშრომელს ჩვენ გადავანაწილებთ სხვადასხვა კლინიკაში, იგივე პოზიციებზე, იგივე ანაზღაურებით. ვის გადანაწილებასაც  ვერ შევძლებთ, ვინც არ იქნება დასაქმებული, იმ პერიოდში გავაგრძელებთ იგივე სახელფასო ანაზღაურების გადახდას, “- აღნიშნა ზურაბ აზარაშვილმა.

რაც შეეხება შენობას, მინისტრი ამბობს, შენობის მდგომარეობიდან გამომდინარე ყველაზე ოპტიმალური ვარიანტი ახალი შენობის აშენებაა.

„რაც შეეხება რესპუბლიკური საავადმყოფოს შენობას, მოგეხსენებათ, რომ ნაწილის დემონტაჟი აუცილებელია, იმიტომ რომ ეს შენობა არის 70-იანი წლების დასაწყისში აშენებული, 50 წელზე მეტი ხნისაა და შესაბამისი ექსპლუატაციის ვადები აქვს. ის ინვესტიცია, რაც გადაკეთებისა და ასევე მდგრადობასთან არსებული პრობლემების გამო იქ შეიძლება წასულიყო, ვერანაირად ვერ იქნება ფინანსურად და ხარჯთეფექტურობის კუთხით გამართლებული. შესაბამისად მხოლოდ დავტოვებთ შედარებით ახალ ნაწილს ამ შენობის, სადაც განთავსდება ექიმების და ადმინისტრაციის კაბინეტები, ხოლო ამ შენობის მიმდებარედ აშენდება ახალი კლინიკა, რომელიც იქნება იმ სტანდარტების, რომელიც უნდა დააკმაყოფილოს ყველა კლინიკამ 2025 წლიდან.

შესაბამისად იმაზე საუბარი, რომ ან რესპუბლიკური საავადმყოფო სადმე გადადის, ან პერსონალს სადმე უშვებენ, არის ყველანაირ აზრს მოკლებული, “- განაცხადა ზურაბ აზარაშვილმა.