ევროპის რეკონსტრუირებისა და განვითარების ბანკის (EBRD) ცნობით, რუსეთის უკრაინაში შეჭრა 2022 წელს რუსეთის ეკონომიკის 10%-თ, ხოლო უკრაინის ეკონომიკის 20%-ით შემცირებას გამოიწვევს.
EBRD-ის პროგნოზითვე, საქართველოსა და სომხეთში ენერგორესურსებსა და მარცვლეულზე მაღალი ფასი შენარჩუნდება, ვინაიდან სომხეთსა და საქართველოს აქვთ მაღალი საექსპორტო წილი რუსეთში. რეგიონული განვითარების ბანკის მიხედვით, მიმდინარე მოვლენები საქართველოს ტურისტულ სექტორზეც მოახდენს გავლენას და მნიშვნელოვნად შეაფერხებს მას.
დოკუმენტის მიხედვით, მიუხედავად იმისა, რომ ინფრასტრუქტურული თვალსაზრისით უკრაინა მოკლევადიან პერსპექტივაში უფრო მეტად დაზარალდება, რუსეთი უფრო გრძელვადიანი გამოწვევის წინაშე დგას. მას შემდეგ, რაც რუსული ბაზრიდან დასავლური კომპანიების უდიდესი ნაწილი გავიდა, რუსეთის ეკონომიკა თითქმის სრულად იზოლირებულია. აქვე აღნიშნულია, რომ რუსეთში ეკონომიკური ვარდნა, სავარაუდოდ გადაიქცევა სტაგნაციის ხანგრძლივ პერიოდად.
ანგარიშში ხაზგასმულია, რომ მიმდინარე ომის ფონზე, უკრაინაში ბიზნეს სექტორის დაახლოებით 1/3 აღარ ფუნქციონირებს.
EBRD-ის პროგნოზის მიხედვით, თუ მომდევნო ორ თვეში ომი დასრულდება, უკრაინის მთლიანი შიდა პროდუქტი წელს 1/5-ით შემცირდება, მაშინ, როდესაც ომამდე უკრაინის ეკონომიკური ზრდის პროგნოზი 3.5% იყო. ხოლო 2023 წელს, რეკონსტრუქციული დახმარების შემთხვევაში, უკრაინის ეკონომიკა 23%-ით აღდგება.
ბანკის პროგნოზით უკრაინა ომმა იმითაც გაარარიბა, რომ მარაგების ძალიან დიდი ნაწილი განადგურებულია.
რაც შეეხება რუსეთს, რუსეთში ომის დასრულების შემდეგ, ეკონომიკური თვალსაზრისით, სიტუაცია კიდევ უფრო დამძიმდება.
EBRD-ის მთავარი ეკონომისტის, ბეატა იავორჩიკის, წინასწარი პროგნოზით, რუსეთში იქნება ნაკლები ინვესტიცია, ნაკლები საერთაშორისო ვაჭრობა, ნაკლებად იქნება რუსეთი ჩართული გლობალურ ღირებულებათა ჯაჭვში. ამ ყველაფრის შედეგად ქვეყანას ექნება დაბალი და გრძელვადიანი ეკონომიკური ზრდა.
EBRD-მა შეამცირა ზრდის პროგნოზები იმ 33 ქვეყანაში. უკრაინის გარდა, ამ სიაშია: ჩრდილოეთ აფრიკა, ცენტრალური აზია, კავკასია და ცენტრალური და აღმოსავლეთი ევროპა. გამონაკლისია აზერბაიჯანი და თურქმენეთი, რომლებიც გაზის მსხვილი მწარმოებლები არიან.