სახელმწიფო ბიუჯეტის თანახმად, წელს ცენტრალური საარჩევნო კომისია 74.5 მილიონი ლარით ფინანსდება. აქედან არჩევნების ჩატარების ღონისძიებებზე 45 მილიონი ლარია განკუთვნილი. ეს 2020 წლის საპარლამენტო არჩევნებთან შედარებით 5 მილიონი ლარით ნაკლებია.

ცესკოს ინფორმაციით, არჩევნების ჩასატარებლად საქართველოში სრულ მზადყოფნაშია 3 664 საარჩევნო უბანი, გამონაკლის შემთხვევაში შექმნილი 9 უბანი და სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფი ამომრჩევლების არჩევნებში მონაწილეობის უზრუნველყოფის მიზნით შექმნილი 70 სპეციალური უბანი. ამომრჩეველთა საერთო რაოდენობა 3 497 345-ს შეადგენს.  ამომრჩევლები აირჩევენ 64 საკრებულოს 2068 წევრს (როგორც პროპორციული, ისე მაჟორიტარული წესით) და 64 მერს.

ექსპერტები ამბობენ, რომ არჩევნების გაციფრულებით ბიუჯეტი მილიონობით თანხას დაზოგავს. მათი განმარტებით, არცევნების გაციფრულება მის ბლოკჩეინ სისტემით ჩატარებას გულისხმობს. ბლოკჩეინ არჩევნები ყველაზე დემოკრატიულ არჩევნებადაა აღიარებული, თუმცა მისი დანერგვა საქართველოს საარჩევნო სისტემაში, როგორც ჩანს, არც ხელისუფლებას სურს და არც ოპოზიციას.

ციფრული ეკონომიკის მესვეურები და ტრადიციული ეკონომიკის სპეციალისტები დიდი ხანია საუბრობენ, რომ ბლოკჩეინ სისტემის ამოქმედებით არჩევნების გაყალბების შანსი ნულს უტოლდება და გამოათავისუფლებს საარჩევნო ხარჯს, რომელიც ყოველწლიურად იზრდება. მათივე რეკომენდაციით, ეს მოგვცემს შესაძლებლობას დაზოგილი მილიონები მივმართოთ ბევრად საჭირო პროგრამებზე, როგორიცაა სოციალური პროგრამები, საგანმანათლებლო და სხვა, რაც ქვეყნის ეკონომიკას ბევრად მეტ სარგებელს მოუტანს.

ციფრული არჩევნები კიდევ უფრო მიმზიდველი ხდება პანდემიისას, რადგან ხმის მისაცემად ხალხის მობილობა არ იქნება საჭირო, რაც კორონავირუსის გავცელების რიკს არჩევნების მიზეზით ნულამდე დაიყვანს.

ეკონომიკის ექსპერტი ნიკა შენგელია კომერსანტს უხსნის, რომ ბლოკჩეინით არჩევნების ჩატარება იდეალური იქნებოდა, თუმცა არ აქვს იმედი, რომ ეს მოხდება.

ბლოკჩეინით არჩევნების ჩატარება იქნება იდეალური რამ, შედეგების გაყალბების საწინააღმდეგოდ. სამწუხაროდ, ხელისუფალისათვის ასეთი სახის არჩევნების ჩატარება ჯერჯერობით მიუღებელი ჩანს. მიუღებლობა გამოიხატება იმაში, რომ გაყალბების მანიპულების საშუალებას ნულამდე ამცირებს,- გვეუბნება ექსპერტი და ციფრული არჩევნების სიკეთეებზე საუბრისას ხაზს უსვამს იმასაც, რომ ბლოკჩეინით საარჩენო ხარჯები გაცილებით ნაკლები იქნება, ვიდრე დღევანდელი სახით ჩატარებული არჩევნების დროს აქვს ბიუჯეტს. 

მთავარია, დაინერგოს ეს სისტემა და შემდეგ საჭირბოროტო საკითხების რეფერენდუმის სახით გადაწყვეტაც რომ მოუნდეთ, პრობლემა არ იქნება, რადგან ორგანიზება და შედეგების დათვლა, ფაქტობრივად, რაიმე სერიოზული ფინანსური რესურსების მობილიზაციას არ მოითხოვს, - აცხადებს შენგელია.

ციფრული არჩევნების საჭიროებაზე დიდი ხანია საუბრობს კომერსანტთან ექსპერტი ვეფხია გიორგაძეც. მისი თქმით მხოლოდ ციფრული არჩევნებით იქნება გარანტირებული დემოკრატიულობის მაღალი ხარისხი და, რაც მთავარია, ყველაზე ეკონომიურიც. გიორგაძე ამბობ, რომ ბლოკჩეინ არჩევნებში ანულირდება საარჩევნო ხარჯი, რითაც ბიუჯეტი სოლიდურ თანხას დაზოგავს. გიორგაძე ყურადღებას ამახვილებს იმაზეც, რომ ციფრულ არჩევნებში ჩართვა შეეძლებათ ემიგრანტებსაც, აფხაზ და ოს ძმებსაც, რაც ჩვენს ინეგრაციას შეუწყობს ხელს. 

შეგახსენებთ, 2019 წლის პრეზიდენტის არჩევნები ქვეყნის ბიუჯეტს 55 მილიონი ლარი დაუჯდა. უშუალოდ საარჩევნო ღონისძიებებზე დაახლოებით 40 მილიონი ლარი დაიხარჯა. დანარჩენი 15 მილიონი კი, ბიუჯეტს პოლიტიკური პარტიების შენახვა დაუჯდა.  ცესკომ 2020 წლის ოქტომბრის საპარლამენტო არჩევნების ჩასატარებლად 42,760,652 ლარი დახარჯა

ავტორი: ბელა გელაშვილი