2 წლის განმავლობაში PSP მის მფლობელობაში არსებული არაპროფილური ბიზნესებიდან გამოსვლას გეგმავს. აღნიშნულის შესახებ განცხადება კომპანიამ 17 აგვისტოს გაავრცელა. ამ ეტაპზე საუბარია PSP-ს მფლობელობაში არსებული სს „ქართული ლუდის კომპანიის“ 12,39%-იანი წილის (7001000 აქცია) გასხვისებაზე.
კომპანიაში აცხადებენ, რომ PSP-ს მმართველმა გუნდმა გადაწყვიტა საექსპორტო პოტენციალის გაზრდის მიზნით გააფართოვოს ფარმწარმოების ნაწილი და საქმიანობის კონცენტრირება სრულად მოახდინოს ფარმაცევტული სექტორის განვითარებაზე.
კომერსანტი დაინტერესდა რა ეტაპზეა ამ დროისათვის PSP-ს მიერ სს „ქართული ლუდის კომპანიაში“ არსებული წილის გასხვისების საკითხი.
როგორც ირკვევა, PSP-ს საკუთარი განზრახვის შესახებ სს „ქართული ლუდის კომპანიის“ ბორდს აცნობა, თუმცა კონკრეტული მოლაპარაკებები ჯერჯერობით არ დაწყებულა.
როგორც PSP-ს მიერ გავრცელებულ ინფორმაციაში იყო აღნიშნული, სს „ქართული ლუდის კომპანია“ ერთ-ერთი ძლიერი ქართული წარმოებაა, რომელიც წლებია ფართოდ ითვისებს საექსპორტო პოტენციალს სხვადასხვა წარმატებული ბრენდებით („ზედაზენი“, „რაგნარი“, „რავი“, „სვიანი“; ამერიკული ლიცენზიის საფუძველზე: „მილერი“, „ბავარია“, „ჰარპი“, „ჰოლსტენი“ და ა.შ. და არაალკოჰოლური სასმელების ფართო ჩამონათვალით: ლიმონათი „ზედაზენი“, ნატურალური წვენი „ჩერო“, ცივი ჩაი გურიელი, RC Cola, RC ლაიმი, RC მანგო, წყალი „ზენი“ და სხვ.) და ასევე ფლობს სუპერმარკეტების ქსელ „მაგნიტის“ 20%-იან წილს.
„კომერსანტი“ ასევე დაინტერესდა გეგმავს თუ არა PSP-ს კლინიკების და სადაზღვევო ბიზნესებიდან გასვლასაც. კომპანიის საზოგადოებასთან ურთიერთობის ხელმძღვანელმა ნათია ნათია ხაბეიშვილმა „კომერსანტს“ უთხრა, რომ ამ დროისათვის PSP-ს მიერ მიღებულია გადაწყვეტილება მხოლოდ „ქართული ლუდის კომპანიის“ წილის გასხვისებაზე.