საყოველთაო ინტერნეტიზაცია მიმდინარე ეტაპზეა. საყოველთაო ინტერნეტიზაციის პროგრამა რაჭა-ლეჩხუმსა და ქვემო სვანეთში, გურია-იმერეთისა და აჭარის მიმართულებებით ხორციელდება, აღნიშნულის შესახებ „კომერსანტს“ საყოველთაო ინტერნეტიზაციის განმახორციელებელი კომპანია ა(ა)იპ „ოუფენ ნეტიდან“ აცნობეს.
როგორც კომპანიაში განმარტავენ, 2025 წლისთვის, პროექტ Log in Georgia -ს ფარგლებში, რომელიც მსოფლიო ბანკისა და ევროპის საინვესტიციო ბანკის მხარდაჭერით ხორციელდება, ქვეყნის მასშტაბით, ოპტიკური ქსელით დაიფარება 1000-მდე დასახლებული პუნქტი, მათ შორის, მაღალმთიანი სოფლები, რომლითაც სარგებელს მიიღებს 500 000 ადამიანი.
სახელმწიფო პროგრამის განხორციელებით იქმნება შესაძლებლობა, რომ თითოეულმა ოჯახმა მიიღოს 100 მბ/წმ, ხოლო დაწესებულებებმა - 1გბ/წმ სიჩქარის ინტერნეტი.
პროექტ Log in Georgia-ს ფინანსური მხარდამჭერები არიან IBRD-ი (მსოფლიო ბანკი)- 35.7 მლნ ევრო და EIB (ევროპის საინვესტიციო ბანკი) - 34 მილნ ევრო.
სად ხორციელდება პროგრამა და რა კრიტერიუმებით შეირჩევა სამიზნე არეალები?
პროგრამის სამიზნე გეოგრაფიული არეალები განისაზღვრება კომუნიკაციების კომისიის მიერ მოწოდებული ე.წ. თეთრი ზონების და საქართველოს მთავრობის #375 დადგენილებით განსაზღვრული შემდეგი კრიტერიუმების შესაბამისად: ა) მოსახლეობის რაოდენობა (200 და მეტი); ბ) აღნიშნულ დასახლებულ პუნქტებში კომერციულ ოპერატორებს არ აქვთ უწყვეტი ოპტიკურ-ბოჭკოვანი ინფრასტრუქტურა და გ) არ გეგმავენ ასეთის მშენებლობას მომდევნო სამი წლის განმავლობაში.
სახელმწიფო პროგრამის ფარგლებში განხორციელებული და დასრულებული პროექტები:
პირველი და მეორე საპილოტე პროექტების ფარგლებში, ოპტიკურ-ბოჭკოვანი ინფრასტრუქტურა მოეწყო ოზურგეთისა და ქობულეთის მუნიციპალიტეტების 62 დასახლებულ პუნქტში, რაც მოიცავს 200 კმ-მდე ოპტიკურ ინფრასტრუქტურას და 40 000-მდე მოსახლისთვის ხარისხიან ინტერნეტთან წვდომისთვის უკვე შექმნილ შესაძლებლობას.
აღნიშნულ მუნიციპალიტეტებში „ოუფენ ნეტის“ ქსელის გამოყენებით, კერძო სექტორის მიერ, აქტიურად მიმდინარეობს მოსახლეობის ქსელში ჩართვა.
მიმდინარე მშენებლობები
ოპტიკური მაგისტრალის მშენებლობა აქტიურია რაჭა-ლეჩხუმსა და ქვემო სვანეთში, გურია-იმერეთისა და აჭარის მიმართულებებით.
აღნიშნული ასაშენებელი ინფრასტრუქტურის პარამეტრებია:
ტყიბული-ამბროლაური-ონი (ასაშენებელი ინფრასტრუქტურა- 150 კმ, დასახლებული პუნქტი -20, მოსახლეობა-11,000);
წყალტუბო-ცაგერი-ლენტეხი (ასაშენებელი ინფრასტრუქტურა-145 კმ, დასახლებული პუნქტი-21, მოსახლეობა - 10,000);
ჩოხატაური-სამტრედია ( ასაშენებელი ინფრასტრუქტურა - 140 კმ, დასახლებული პუნქტი - 20, მოსახლეობა - 9,900);
ქობულეთი - ხელვაჩაური (ასაშენებელი ინფრასტრუქტურა - 135კმ , დასახლებული პუნქტი - 37 მოსახლეობა - 38,300)
მიმდინარე ტენდერები
მიმდინარე ეტაპზე, პროექტ ''Log-In Georgia''-ს ფარგლებში, ოპტიკური ქსელის მშენებლობის მიზნით, მსოფლიო ბანკის შესყიდვის პროცედურებით გამოცხადებულია მორიგი ტენდერები: ჯვარი-მესტიისა და ზუგდიდი ხობის მიმართულებებზე:
http://tenders.procurement.gov.ge/public/?go=478105&lang=ge
http://tenders.procurement.gov.ge/public/?go=483544&lang=ge
ოპტიკური ქსელის მშენებლობის შემდგომი ეტაპი იქნება სამეგრელოსა და იმერეთის ნაწილი. ოუფენ ნეტში განმარტავენ, რომ სახელმწიფო პროგრამა ხელს უწყობს კერძო სატელეკომუნიკაციო ოპერატორებს, განავითარონ საკუთარი ბიზნესი, ოპტიკურ-ბოჭკოვანი ინფრასტრუქტურის მშენებლობის დასრულების შემდეგ, „ოუფენ ნეტი“ არ აწვდის მოსახლეობას ინტერნეტ-მომსახურებას, არამედ, ნებისმიერ ავტორიზებულ ტელეკომ-ოპერატორს აძლევს შესაძლებლობას, ისარგებლოს მაგისტრალზე ღია დაშვების მომსახურებით და მივიდეს საბოლოო მომხმარებლამდე.
პროექტი „ოუფენ ნეტის“ მიერ, ეკონომიკისა და მდგრადი განვითარების სამინისტროს ზედამხედველობითა და კომუნიკაციების კომისიის მხარდაჭერით ხორციელდება.