კონკურენციის ეროვნული სააგენტო USA2GEORGIA-სთან დაკავშირებით გადაწყვეტილება იანვრის ბოლოს გაასაჯაროებს. როგორც დღეს  სააგენტოს თავმჯდომარემ ირაკლი ლექვინაძემ განაცხადა, 2022 წლის 1-ელი ნოემბრიდან დღემდე, მას შემდეგ რაც მომხმარებელთა უფლებების დაცვის მიმართულებით კანონის აღსრულება დაიწყო, სააგენტომ მომხმარებლების მხრიდან 90-მდე განაცხადი მიიღო, საიდანაც 50-ზე მეტზე საქმის შესწავლა დაიწყო.

„USA2GEORGIA-ს წინააღმდეგ დაახლოებით, 15-მდე განაცხადი შემოვიდა. თემა ეხებოდა მომხმარებლებისთვის არსებული პირობების ცვლილებას ტრანსპორტირების საფასურის გამოთვლისას. იანვრის თვეში ჩვენ ამ კომპანიასთან დაკავშირებით მივიღებთ გადაწყვეტილებას. სამი შესაძლო გადაწყვეტილება შეიძლება იყოს აქ:

1.დაუდგინდეს კომპანიას მომხმარებელთა უფლებების დარღვევა, დროული არაინფორმირებულობის გამო და ასეთ შემთხვევაში, მიეცემა გონივრული ვადა იმისთვის, რომ გამოასწოროს ხარვეზი, აღადგინოს მომხმარებლების დარღვეული უფლება. თუ ეს გონივრულ ვადაში არ მოხდა, იქნება საჯარიმო სანქციები.

2.კომპანიამ მოახდინოს განმარტება და ახსნას ობიექტური გარემოებებით ის ცვლილება, რაც მომხმარებლის მიმართ განხორციელდა. ასეთ შემთხვევაში, კომპანია გამართლდეს და ვთქვათ, რომ ეს იყო ობიექტური გარემოებებით გამოწვეული.

3.პირობითი ვალდებულების აღება - კომპანიამ თქვას, რომ საქმის წარმოების კუთხით ვიზარებ, რომ არასწორი ინფორმირებულობის გამო, სათანადოდ არ უზრუნველყავი მომხმარებლების ინფორმირება, დარღვევა დაადასტუროს და აიღოს პირობითი ვალდებულება, რომ გონივრულ ვადაში აღადგენს დარღვეულ უფლებებს. ასეთ შემთხვევაში, საქმის წარმოება წყდება და ჩვენ ველოდებით კომპანიის მხრიდან მომხმარებლების მიმართ განხორციელებულ ნაბიჯებს. ამ სამი შესაძლო გადაწყვეტილებიდან ერთს ჩვენ იანვრის ბოლოს გამოვაცხადებთ. რაც შეეხება დანარჩენ საქმეებს, დაახლოებით, 80% ეხება ონლაინ ვაჭრობს სფეროებს. ძირითადი მომხმარებელი არის თბილისიდან. ძირითადი სექტორი კი არის საყოფაცხოვრებო ტექნიკითა და ტანსაცმლით ვაჭრობა. თემატიკა მრავალფეროვანია, მაგალითად: თანხის არ დაბრუნება, პროდუქციის წუნის აღმოჩენა, შეკეთებასთან დაკავშირებული პრობლემები, გარანტიასთან დაკავშირებული საკითხები“, - განაცხადა ირაკლი ლექვინაძემ.