საქართველო უმუშევრობის დონით სამეზობლოში მეორეა. მიუხედავად ამისა, ბიზნესი მუდმივად კადრების მნიშვნელოვან დეფიციტზე საუბრობს.
რადიო ,,პალიტრასა“ და ,,პალიტრანიუსის“ გადაცემაში ,,საქმე“ ეკონომიკის დოქტორი, ირაკლი მაკალათია ფაქტს რამდენიმე მიზეზით ხსნის. მისი თქმით, მთავარი პრობლემა მაინც დამსაქმებლის მხრიდან შეთავაზებული დაბალი ანაზღაურებაა.
„პრობლემა ორ ფაქტორშია. ერთის მხრივ გვაქვს უმუშევრობა და ჭარბი მიწოდება, მეორეს მხრივ კი, განათლების სისტემა იმდენად მონოპოლიზებულია, რომ ბაზარს ვერ სთავაზობს შესაბამის კადრებს. ბიზნესი და განათლების ორგანო ერთმანეთთან თანხვედრაში ვერ მოდიან. ეს ქმნის კადრების დეფიციტს.
მიუხედავად ამისა, კადრების დეფიციტი იმდენად დიდია, რომ საბანკო სფეროც კი, დიპლომს ნაკლებად უყურებს. ბოლო პერიოდში, განსაკუთრებით გააქტიურდა ბიზნესმენების მხრიდან თემა, რომ კადრები არ მოდიან შეთავაზების მიუხედავად. მიზეზი მარტივია, როცა ამ ინფლაციის ფონზე დაბალ ხელფასს და არამიმზიდველ პირობებს სთავაზობ, ცხადია, ვერ მოიზიდავ სამუშაო რესურსს. ბიზნესმა უნდა გაზარდოს ხელფასი იმ დონემდე, სანამდეც მას ფუნქციონირების პრობლემა არ შეექმნება.
მეორე საკითხია ის, რომ ჩვენ მცირე ეკონომიკა და მცირე ბიზნესი გვაქვს და ბიზნესი სარგებლობს იმით, რომ შენ თუ არა, მეორე ან მეათე მოვა. ახლა ის უნდა გაკეთდეს, რომ ბევრი ბიზნეს სუბიექტი გაჩნდეს, რომელიც კონკურენციაში შევა ერთმანეთთან და ამ პირობებში იძულებული იქნებიან უკეთესი პირობები შესთავაზონ დასაქმებულებს. არის კიდევ ერთი ფაქტორი, ფინანსებზე ხელმისაწვდომობა, რის შემთხვევაშიც კომპანიას მეტი რესურსი უჩნდება მაღალკვალიფიციური კადრიც მოიყვანოს და მეტი ხელფასიც შესთავაზოს“, - განაცხადა მაკალათიამ ,,საქმეში“.
ირაკლი მაკალათია
