მკვეთრად გაზრდილი ინფლაციის ფონზე, აშშ-ის ფედერალურმა რეზერვმა მონეტარული პოლიტიკა გაამკაცრა. FED-ის კომიტეტის გადაწყვეტილებით, ქვეყანაში რეფინანსირების განაკვეთი დამატებით 75 საბაზო პუნქტით (0.75%) გაიზარდა. გამკაცრების შედეგად, ფედერალური რეზერვის ძირითადი განაკვეთები 3.75-4.0%-ის ფარგლებში განისაზღვრა, რაც ამერიკული სტანდარტებით უჩვეულოდ მაღალი მაჩვენებელია.
მონეტარული პოლიტიკის აგრესიულად გამკაცრების და რეფინანსირების განაკვეთის 75 საბაზო პუნქტით (+0.75%) გაზრდის გადაწყვეტილება მიიღო ინგლისის ცენტრალურმა ბანკმაც. რიგით მერვე გამკაცრების შედეგად, გაერთიანებულ სამეფოში რეფინანსირების განაკვეთმა 3%-იან ნიშნულს მიაღწია, რაც გასული 33 წლის უმაღლესი მაჩვენებელია.
რა გავლენა ექნება საქართველოზე აშშ-ს და ინგლისის ცენტრალური ბანკების მიერ მონეტარული პოლიტიკის გამკაცრებას, თემაზე „კომერსანტთან“ IDFI-ს ეკონომიკური და სოციალური მიმართულების ხელმძღვანელმა მიხეილ კუკავამ ისაუბრა.
„ინფლაცია მთელ მსოფლიოში დიდი გამოწვევაა. აშშ- ის ცენტრალური ბანკის უმთავრესი შეცდომა იყო, როდესაც ამერიკულ ბიზნესებს იმაზე მეტი ფული ასესხა, ვიდრე ეს გათვალისწინებული იყო. შესაბამისად მივიღეთ ის, რომ FED - ს ახლა უკვე რთული ვითარება დაუდგა და მუხრუჭზე ფეხის დაჭერა მოუხდა.
ჩვენი ეროვნული ბანკი იმავეს არ აკეთებს და ობლიგაციებს არ ყიდულობს, მიუხედავად იმისა, რომ ეს არის კაპიტალის ბაზრის განვითარებისთვის კრიტიკულად მნიშვნელოვანი. თუმცა მას ეს კანონში არ უწერია და აუტკივარი თავი ეროვნულმა ბანკმა რატომ უნდა აიტკივოს, ხოლო FED - ის მიერ მონეტარული პოლიტიკის გამკაცრება გასაგებია, იმის გათვალისწინებით , რომ მან დაუშვა ეს შეცდომა, მიუშვა სადავეები იმაზე მეტად, ვიდრე უნდა მოეშვა“, - აღნიშნა მიხეილ კუკავამ.
თიბისი ჯგუფის მთავარი ეკონომისტი ოთარ ნადარაია კი ამბობს, რომ აშშ-ის ფედერალური სარეზერვო სისტემის (FED) მიერ მონეტარული პოლიტიკის გამკაცრება საქართველოში უცხოურ ვალუტაში გაცემულ სესხებს აუცილებლად გააძვირებს.
„ჩვენი სესხების დაფინანსების მნიშვნელოვანი წყარო საერთაშორისო ბაზრებიდან მოდის და ის ავტომატურად აიწევს, როგორც დოლარში ასევე ევროში. თუმცა, ასევე ვფიქრობთ, რომ ადგილობრივ დეპოზიტებზეც უცხოურ ვალუტაში საპროცენტო განაკვეთი სავარაუდოდ მოიმატებს, მაგრამ არა იმდენად, როგორც საერთაშორისო ბაზრებზე. სესხები ფინანსდება ორივე რესურსით საერთაშორისო ბაზრებიდან მოზიდული სახსრებიდანაც და ადგილობრივი დეპოზიტებით“, — ამბობს ნადარაია.
Fed
