ეკონომისტებმა, 1-დან (ძალიან უარყოფითი) 5-მდე (ძალიან დადებითი) სკალაზე, შეაფასეს რუსი, უკრაინელი და ბელარუსი მიგრანტების შემოსული ნაკადის ეფექტი საქართველოს ეკონომიკაზე - აღნიშნულის შესახებ საუბარია PMC RC-ის „საქართველოს ეკონომიკური კლიმატის“ შესახებ გამოქვეყნებულ ანალიტიკურ ინფორმაციაში, რომელიც ორგანიზაციამ 60 ექსპერტის ჩართულობით შეადგინა.
გამოკითხულმა ქართველმა ეკონომისტებმა დადებითად შეაფასეს მესამე კვარტალში საქართველოს მიმდინარე ეკონომიკური მდგომარეობა. ხოლო 2022 წლის მეორე კვარტალსა და 2021 წლის მესამე კვარტალში მიმდინარე ეკონომიკური მდგომარეობის შეფასებები უარყოფითი იყო.
ეკონომისტებს ასევე დადებითი მოლოდინი აქვთ საქართველოში მომდევნო ექვსი თვის ეკონომიკურ მდგომარეობასთან დაკავშირებით. ეს პროგნოზი მცირედით გაუარესდა 2022 წლის მეორე კვარტალთან შედარებით, მაგრამ მნიშვნელოვნად გაუმჯობესდა 2021 წლის მესამე კვარტალთან შედარებით.
ეკონომისტებმა შეაფასეს ის არხები, რომელთა გავლითაც მოსალოდნელია რომ რუსი, უკრაინელი და ბელორუსი ტურისტების ნაკადების ზრდა საქართველოს ეკონომიკაზე აისახება.
ექსპერტების უმეტესობა (80%) მიიჩნევს, რომ გაზრდილი მოხმარება მნიშვნელოვნად აისახება საქართველოს ეკონომიკაზე. ეკონომისტთა დიდი ნაწილი, (75% და 71%, შესაბამისად) თვლის რომ, ქირის ფასების ზრდა და უძრავი ქონების ფასების ზრდა (მიგრანტების მხრიდან უძრავ ქონებაზე გაზრდილი მოთხოვნის შედეგად), მნიშვნელოვან გავლენას მოახდენს საქართველოს ეკონომიკაზე.
იმავდროულად, რესპოდენტთა 65%-ი ვარაუდობს, რომ საქართველოს ეკონომიკაზე მნიშვნელოვან გავლენას იქონიებს უცხოური ვალუტის შემოდინება, რაც დაკავშირებულია იმასთან, რომ უკრაინელი და რუსი მიგრანტების დიდი ნაწილი დისტანციურად მუშაობს და ანაზღაურებას უცხოურ ვალუტაში იღებს.
გარდა ამისა, ეკონომისტების 42% ნაწილის შეფასებით მიგრანტების მიერ ახალი კომპანიების დაარსებამ, ხოლო 38%-ის აზრით კვალიფიციური მუახელის შემოდინებამ შეიძლება გარკვეული (არც ძალიან მნიშვნელოვანი, თუმცა არც უმნიშვნელო) გავლენა იქონიოს საქართველოს ეკონომიკაზე.
ეკონომისტებმა, 1-დან (ძალიან უარყოფითი) 5-მდე (ძალიან დადებითი) სკალაზე, შეაფასეს რუსი, უკრაინელი და ბელარუსი მიგრანტების შემოსული ნაკადის ეფექტი საქართველოს ეკონომიკაზე. რესპოდენტების დაახლოებით ნახევარი (48%) დადებითად ან ძალიან დადებითად აფასებს რუსი, უკრაინელი და ბელარუსი მიგრანტების შემოსული ნაკადის ეფექტს საქართველოს ეკონომიკაზე, როდესაც 20% ამ მოვლენას უარყოფითად ან ძალიან უარყოფითად უყურებს, ხოლო 32% კი ნეიტრალურ ძალიან უარყოფითი დამოკიდებულებას აფიქსირებს.
ეკონომისტებმა შეაფასეს ასევე რუსეთიდან მიღებული ფულადი გზავნილების ზრდის შესაძლო მიზეზები.
2022 წლის პირველი 8 თვის განმავლობაში, რუსეთიდან მიღებული ფულადი გზავნილები 266%-ით გაიზარდა, 2021 წლის შესაბამის პერიოდთან შედარებით და ჯამურად 0.96 მილიარდი აშშ დოლარი შეადგინა, რაც, მოცემულ პერიოდში, მთლიანი მიღებული ფულადი გზავნილების 40%-ს წარმოადგენდა. ამ ზრდის მიზეზად შეიძლება განიხილებოდეს არბიტრაჟი, რომელიც რუსეთზე დაწესებულ სანქციებს უკავშირდება. უფრო კონკრეტულად, აშშ დოლარზე შეზღუდული წვდომა რუბლის გაცვლით კურსზე აისახა, რის შედეგადაც, რუბლის ოფიციალური გაცვლითი კურსი და შავ ბაზარზე არსებული კურსი ერთმანეთისგან განსხვავდებოდა. ამის გამო, რუსეთის მოქალაქეების მნიშვნელოვანმა ნაწილმა საქართველოში რუბლის სახით თანხის გამოგზავნა, შემდეგ, აშშ დოლარში გადახურდავება, გადახურდავებული დოლარის რუსეთში დაბრუნება და მოგების მიზნით შავ ბაზარზე გაყიდვა დაიწყო.
გამოკითხულთა უმეტესობა (56%) თვლის, რომ მოცემული არბიტრაჟი შეიძლება იყოს რუსეთიდან მიღებული ფულადი გზავნილების გაზრდის მიზეზი და ამ პროცესმა შეიძლება ქართული ეკონომიკის ზრდის შეფერხება გამოიწვიოს. მეტიც, 32% თვლის, რომ საქართველოს ეროვნულმა ბანკმა უნდა სცადოს მოცემული არბიტრაჟის შეჩერება, ხოლო დარჩენილი 24% მიიჩნევს, რომ ეროვნული ბანკის ჩარევა საჭირო არაა, რადგან მოცემული პროცესი თავისით დარეგულირდება. გამოკითხული ეკონომისტების 28% საერთოდ არ მიიჩნევს არბიტრაჟს ფულადი გზავნილების გაზრდის მიზეზად.