რუსეთი ხორბალზე ექსპორტის გადასახადს 15,5%-ით ამცირებს. თუ როგორ აისახება ეს საქართველოს ბაზარზე ამ კითხვით „კომერსანტი“  საქართველოს ხორბლისა და ფქვილის მწარმოებელთა ასოციაციის ხელმძღვანელს ლევან სილაგავას  დაუკავშირდა. მისი თქმით, ცვლილება თავისთავად  ცხადია, რომ ბაზარზე იმოქმედებს, მაგრამ არა იმდენად, რომ საქართველოში ხორბლის იმპორტი აქტიურად დაიწყოს.

„რუსეთიდან ხორბლის ბაზარზე არამარტო საექსპორტო  გადასახადი, ასევე  რუბლის კურსის ცვლილებაც, რომელიც  გაუფასურებულია მოქმედებს, ამ ორი ფაქტორის ურთიერთ შედეგად  ხდება ფასის ჩამოყალიბება, ეს რა თქმა უნდა დადებითი ტენდენციაა, მაგრამ  არა იმდენად, რომ საქართველოში ხორბლის შემოსვლა აქტიურად დაიწყოს. იმისათვის, რომ ხორბლის იმპორტმა კონკურენცია ფქვილის იმპორტს გაუწიოს საექსპორტო გადასახადი  დაახლოებით 30-40 დოლარის ფარგლებში უნდა იყოს. იმიტომ რომ  ფქვილზე საექსპორტო გადასახადი არის  0  და ახლა  ხორბალზე გამოცხადებულია 68 დოლარი, აქამდე იყო 80 დოლარი.  რა თქმა უნდა ეს 12 დოლარი საკმაოდ დიდი ჩამოსვლა, თუმცა ეს  არ  არის  ის, რაც საქართველოში ფქვილის  საპირწონედ ხორბლის შემოსვლას მასიურად შეუწყობს ხელს. 

თუმცა  ტენდენცია დადებითია, იმიტომ რომ  რუსეთში მოსავალი საკმაოდ  დიდია,  რუსი  ანალიტიკოსები  წერენ, რომ ძალიან  დიდი  ზედმეტობაა და მათ გადამეტების  ეშინიათ, რადგან ეს ფასებს  აწვება.რუსეთის  დაახლოებით 100 000 ზე ფერმერმა, ფერმერთა კომპანიამ და ასოციაციამ რუსეთის პრეზიდენტ პუტინს მიმართა, რომ საექსპორტო გადასახადი საერთოდ მოიხსნას, თუ რომელიმე განხორციელდება თავისთავად ცხადია, რომ ხორბლის ექსპორტი უფრო აქტიური გახდება, ეს მხოლოდ საქართველოს თემა არ არის,  თვითონ რუსებსაც  აწუხებთ, რადგან ჭარბი მოსავალია და ისინი ხორბალს ვერ ყიდიან“  - აღნიშნა ლევან სილაგავამ.

სილაგავას თქმით, თუ  საქართველოს  ბაზარს განვიხილავთ შეიძლება ითქვას, რომ მცირე და საშუალო წისქვილებისთვის გარკვეული რაოდენობის ხორბალი გარკვეულწილად შემოდის, რადგან მცირე და საშუალო წისქვილები უფრო მოქნილები არიან და ადგილობრივ მოსავალსაც მოიხმარენ.

„ფასის დაბალანსების შედეგად დადებითი ტენდენცია არის და რამდენიმე მცირე  და საშუალო წისქვილმა მუშაობა დაიწყო, ასევე აქტიურად  გრძელდება ფქვილის იმპორტიც და ეს  ყველაფერი საქართველოს ბაზარზე ფაქტობრივად უკვე აისახა, ფქვილი გაიაფებულია,  დაახლოებით თვენახევრის წინ ჩვენთან ერთი ტომარა ფქვილის ფასი 87-90 ლარი იყო, დღეს მისი ფასი 75 ლარის ფარგლებშია, საქართველოს ბაზარზე ტენდენცია კარგად გამოიკვეთა“, -  აღნიშნა ლევან სილაგავამ.

თაკო კვაჭანტირაძე