2021 წელს ქართული თაფლის ექსპორტი 696%-ით გაიზარდა. მეფუტკრეთა გაერთიანების ხელმძღვანელი ალეკო პაპავა ამბობს, რომ გასული წელი სექტორისთვის გარღვევა იყო და „დაიმსხვრა მითი, რომ ქართული თაფლი ევროკავშირში ვერ გავიდოდა“.
„2021 წელი თაფლის სექტორისთვის გარღვევა იყო. პირველ რიგში, მოცულობით ყველაზე მეტი თაფლი გავიდა ქვეყნიდან და თან, ექსპორტის დაახლოებით 70% ევროპაში განხორციელდა. ამით დაიმსხვრა მითი, რომ ქართული თაფლი ევროკავშირში ვერ გავიდოდა... ვერ დავაკმაყოფილებდით ევროკავშირის სტანდარტს.
2021 წელს ასევე ყველაზე მნიშვნელოვანი იყო დიდ ბრიტანეთში ყოველწლიურ, ყველაზე პრესტიჟულ ფესტივალზე ქართული თაფლის წარდგენა, სადაც ოთხმა კომპანიამ ვერცხლის მედლები აიღეს. ეს პირველი მონაწილეობა იყო ქართული კომპანიების ასეთი მასშტაბის საერთაშორისო კონკურსში და დიდი წარმატებაა, რომ პირველი ცდა ასეთი რეზონანსული აღმოჩნდა.
გასაკვირი არცაა, რომ ქართული თაფლის მიმართ ინტერესი იზრდება, მაგრამ რჩება გამოწვევებიც. ახლა ჩვენი მთავარი მიზანია თაფლის დანაგვიანების მთლიანად აღმოფხვრა. სურსათის ეროვნულ სააგენტოსთან ერთად, საერთო მუშაობით დანაგვიანების მაჩვენებელი 54-56%-დან 6-8%-მდე ჩამოვიდა, მაგრამ მიზანი, დანაგვიანების სრული აღმოფხვრაა“, - განაცხადა პაპავამ.
მისივე თქმით, გარდა დაბინძურების აღმოფხვრისა, ახლა მთავარი გამოწვევა საწარმოო სიმძლავრეების გაზრდა. საბოლოოდ კი, საქართველოს აქვს პოტენციალი ნატურალური თაფლის წარმოება გააორმაგოს.
,,რაც შეეხება მიმდინარე წელს, ჩვენი მიზანია საწამოო სიმძლავრეების გაზრდა. თაფლის დიდი პარტიებით გასვლის პირველი დიდი ნახტომი განაპირობა სამტრედიაში, სოფელ ბარში, თაფლის საწარმოს გახსნამ, რომელსაც აქვს 20 ტონიანი ჰომოგენიზატორი, ანუ მას შეუძლია 20 ტონა ერთი და იგივე პარტიის მომზადება. ამით არის დიდი დაინტერესება და მსგავსი საწარმო საქართველოში 4-5 მაინც არის საჭირო. ჩვენ ვცდილობთ, ამ კუთხით დავაინტერესოთ კერძო სექტორი.
ასევე მეფუტკრეთა გაერთიანების ფარგლებში წლის განმავლობაში საქართველოს ყველა რეგიონში ვგეგმავთ საგანმანათლებლო ტრენინგის ჩატარებას, საუკეთესო პრაქტიკის დასანერგად. შეიძლება ცოტა ამბიციურადაც კი ჟღერს, მაგრამ ჩვენ შეგვიძლია ჩვენი ბუნებრივი პირობებიდან გამომდინარე ვაწარმოოთ 8 000 ტონამდე თაფლი. დღეს დაახლოებით 3 000-4 000 ტონამდე თაფლს ვაწარმოებთ“, - განაცხადა პაპავამ
შეგახსენებთ, გაიზარდა. საქსტატის ცნობით, 2021 წელს სხვადასხვა ბაზარზე 173 ტონა ქართული თაფლი გავიდა, ყველაზე მეტი, 143 ტონა კი, ევროპის ქვეყნებშია ექსპორტირებული.
წყარო: ,,ბიზნესპრესნიუსი“