ბიზნესთან კომუნიკაცია, პროაქტიური ჩართულობა კერძო სექტორის პრობლემებში და ბიუროკრატიის შემცირება - ამ ძირითად მიზნებზე ახალმა ბიზნესომბუდსმენმა რადიო ,,პალიტრასა“ და ,,პალიტრანიუსის“ გადაცემაში ,,საქმე“ ახალ პოსტზე პირველი ინტერვიუს დროს განაცხადა.
ოთარ დანელიას თქმით, ბიზნესომბუდსმენის ინსტიტუტს დელეგირების მაღალი ხარისხი აქვს და ყველა პრობლემურ საკითხზე მოახდენს კომუნიკაციას პრემიერთან, რაც საკითხების მოგვარების დროს შეამცირებს.
„პირველი, რითაც დავიწყებთ, ეს არის კომუნიკაცია ბიზნესთან. მოგეხსენებათ, აპარატს მუშაობა არ გაუჩერებია, მაგრამ მიუხედავად ამისა, ეს პოზიცია დიდი პერიოდით იყო ვაკანტური და ამან გარკვეულწილად ალბათ, გავლენა მოახდინა უშუალო კომუნიკაციაზე კერძო სექტორთან. აქვე, ამ პერიოდის განმავლობაში პროაქტიური მუშაობისთვის მადლობა ეკუთვნის აპარატის ყველა თანამშრომელს. პრემიერის დავალება ასეთია, მინიმუმამდე იქნას დაყვანილი ბიუროკრატია და მაქსიმალურად შევუწყოთ ხელი ბიზნესს, არა მხოლოდ უცხოური ინვესტიციების ნაწილში, არამედ ადგილობრივ ბიზნესს, რომელიც მსხვილ, კრიტიკულ მასას წარმოადგენს. ასე რომ, სამუშაო დიდია, როცა პანდემიაც ამძიმებს ფონს.
რამდენიმე ათეული საკითხია მიმდინარე, რომელიც წინა ომბუდსმენის დროსაც იყო და საჭიროებს მეტ ჩართულობას და კომპლექსურ გადაწყვეტას. ეს გადაწყვეტილებები ერთ ოთახში არ მიიღება. ამას სჭირდება მედიაცია, კოორდინაცია, მეტი შუამდგომლობა და ამაზე დაყრდნობით რაციონალური გადაწყვეტილებების მიღება.
სწორი კომუნიკაციით უნდა შევიდეთ ბიზნესთან ნდობაში. ასევე, საშინაო დავალებად გვრჩება იმ ბევრი რეგულაციის და დოკუმენტის სისრულეში მოყვანა, რომელიც პანდემიის გამო ვერ იქნა მიღებული. მე მაქვს დელეგირების მაღალი დონე, სადაც ანგარიშვალდებული ვარ პრემიერთან და ყველა პრობლემაზე, რომელიც ბიზნესთან იქნება დაკავშირებული, ცხადია, კომუნიკაციას მოვახდენ მთავრობის მეთაურთან. ეს კი მეტად გააადვილებს პრობლემის მოგვარებას“, - განაცხადა დანელიამ ,,საქმეში“.
შეგახსენებთ, საქართველოს პრემიერ-მინისტრმა ირაკლი ღარიბაშვილმა ბიზნესომბუდსმენად ოთარ დანელია 10 თებერვალს დანიშნა, რომელიც 2014 წელს, წინა პრემიერობის დროს, ღარიბაშვილის კაბინეტშივე იკავებდა სოფლის მეურნეობის მინისტრის პოსტს. შემდეგ მეცხრე მოწვევის პარლამენტის წევრი იყო. ბოლო პერიოდში კი, ეკონომიკისა და მდგრადი განვითარების მინისტრის მოადგილე გახლდათ.
წყარო: BPN.GE