წელს საცურაო აუზები სრული დატვირთვით მუშაობენ და ერთჯერადი შესვლის ფასი 40–დან 60 ლარამდე მერყეობს. „კომერსანტმა“ ვაკის, კრწანისის აუზების დაჯინო ფერედაისის მფლობელებთან გაარკვია, რამდენად დატვირთულია საცურაო აუზები, შენარჩუნდა თუ არა პანდემიამდელი ფასები და რა რეკომენდაციების დაცვა უწევთ პანდემიის ფონზე.
როგორც „კრწანისის“ საცურაო აუზის გენერალური მენეჯერი ანა ბერიძე ამბობს, აუზი სრული დატვირთვით მუშაობს და მისი ფასი სამუშაო დღეებში 45 ლარი, ხოლო შაბათ-კვირას 60 ლარია, რაც შეეხება რეკომენდაციებს, ანა ბერიძე ამბობს, რომ შრომის უსაფრთხოების სამსახური მათ შეზლონგებს შორის დისტანციის დაცვას სთხოვს.
„კრწანისის საცურაო აუზზე დატვირთვა ამინდების მიხედვით საკმაოდ აქტიურია, რაც შეეხება ფასებს, შაბათ-კვირას აუზზე სტუმრობა 60 ლარი დაგიჯდებათ, ხოლო სამუშაოდ ღეებში ერთი დღის საფასური 45 ლარია.
გვაქვს აბონემენტებიც, 7–დღიანი აბონემენტის ფასი არის 280 ლარი, 14 დღიანი 420 ლარი, მხოლოდ სამუშაო დღეებში ერთთვიანი აბონემენტის ფასი 550 ლარია დამხოლოდ შაბათ კვირას ერთ თვიანი აბონემენტი 320 ლარი დაგიჯდებათ. რეკომენდაციებს რაც შეეხება, მხოლოდ რაოდენობრივი შეზღუდვა გვაქვს, შეზლონები დისტანციის დაცვით უნდა განვალაგოთ, თუ გასულ წლებში 150 შეზლონგი გვეტეოდა, წელს მხოლოდ 80–ის განთავსება შეგვიძლია“, - აღნიშნა ანა ბერიძემ.
„ვაკის საცურაო აუზის“ საოპერაციო მენეჯერმა მიხეილ გოგოლაძემ გვითხრა, რომ მომხმარებელთა აქტივობა საკმაოდ მაღალია. რაც შეეხება ფასებს, აუზზე სტუმრობის ერთი დღის აფასური საშუალოდ 60 ლარია, თუმცა კლუბის წევრებისთვის შედარებით დაბალი ფასია. რაც შეეხება ერთთვიან აბონემენტებს, მისი ფასი 200 ლარიდან 300 ლარის ფარგლებშ მერყეობს.
„აქტივობა საკმაოდ მაღალია , რაც შეეხება ფასებს, ერთი დღის ფსი საშუალოდ 60 ლარია, თუმცა აბონემენტები განსხვავებულია. პანდემიიდან გამომდინარე, რაოდენობაზე დაგვიწესეს შეზღუდვა, რომელიც კვადრატულობის მიხედვით არის დადგენილი. თუმცა, ეს ჩვენ ნაკლებად გვეხება, რადგან ობიექტზე ფუნქციონირებს პროგრამა, რომელიც ადამიანების რაოდენობას ითვლის იმისათვის, რომ შენობაში რეკომენდირებულზე მეტი ადამიანის კონცენტრცია არ მოხდეს. რაც შეეხება ფასს, მიუხედავად იმისა რომ საოპერაციო ხარჯები თითქმის გაორმაგებულია, ჩვენ მაინც ვცდილობთ, რომ კლუბის წევრებისთვის საფასო პოლიტიკა არ შევცვალოთ“, - აღნიშნა მიხეილ გოგოლაძემ.
“ჯონო ფერედაისის” მარკეტინგის დეპარტამენტის ხელმძღვანელმა ქეთო მაჭავარიანმა აღნიშნა, რომ აქ სამუშაო დღეებში ერთჯერადი ვიზიტი 49 ლარია, ხოლო შაბათ-კვირას 59 ლარი. “ჯინო ფერედაისი” მომხმარებელს საოჯახო პაკეტებს – 2+1 , 2+2 სთავაზობს, რომელიც, როგორც მაჭავარიანი აღნიშნავს, საბოლოო ჯამში 30% -მდე ფასდაკლებას გულისხმობს.
“მინდა აღვნიშნო, რომ წინა წელთან შედარებით ფასმა მოიმატა, მაგრამ გამომდინარე იქიდან, რომ ობიექტი ერთი წელი დახურული იყო და რომ რეგულაციებს მომზადებულები დავხვედროდით, 1–მილიონიანი ინვესტიცია განვახორციელეთ. ამიტომ ფასების მცირედით გაზრდა მოგვიწია. თუმცა, მაინც ვამბობ იმას, რომ როდესაც საქართველოს ბაზარზე აუზზე შესვლა საშუალოდ 50 ლარია, “ჯინო ფერედაისი”, რომელიც მომხმარებელს მრავალ სერვისს სთავაზობს, ძვირი არ გამოდის.
რეკომენდაციებია მიხედვით გვაქვს შეზღუდვა რომ ერთდროულად ტერიტორიაზე 700 ადამიანზე მეტი არ გავაჩეროთ.
რეკომენდაციებით გათვალისწინებული წესების კონტროლის უზრუნველსაყოფად ადამიანური რესურსის გაზრდა მოგვიწია, დავამატეთ სივრცის მენეჯერები, რომლებიც აკონტროლებენ ყველაფერს, გაიარეს თუ არა მომხმარებლებმა დეზობარიერები, დაცულია თუ არა დისტანცია, დახურულ სივრცეში შემოვიდა თუ არა მომხმარებელი პირბადით და ა.შ.” - აღნიშნა ქეთი მაჭავარიანმა.
თაკო კვაჭანტირაძე