თბილისში, რესპუბლიკის მოედანზე, რუსთაველის 37-ში მდებარე კულტურული მემკვიდრეობის ძეგლის და მიმდებარე ტერიტორიის რეაბილიტიაცია-რესტავრაცია იგეგმება. სასტუმრო „ტელეგრაფის“ მშენებლობა (ყოფილი ფოსტის შენობაში) და მელიქ აზარიანცის სახლის რესტავრაცია არის მოედნის განვითარების მთლიანი კონცეფციის მთავარი ნაწილი.

„სილქ დეველოპმენტმა“ მელიქ აზარიანცის სახლის მიწისქვეშა სართულების დასუფთავება ცოტა ხნის წინ დაასრულა. წლების განმავლობაში მელიქ აზარიანცის შენობის შიდა ეზოში საყოფაცხოვრებო ნარჩენების დაგროვების გამო უმძიმესი მდგომარეობა შეიქმნა, მიწის ქვეშ მდებარე ორი სართულის, 2,000 კვადრატულ მეტრამდე ფართის სრულად გასაწმენდად 200 000 ლარამდე დაიხარჯა და შემსრულებელი სილქ როუდ უძრავი ქონების ერთ-ერთი კომპანია, ცენტრ პლაზაა, რომლის საკუთრებაშიც შედის შენობის დიდი ნაწილი.

„სილქ დეველოპმენტის“ აღმასრულებელი დირექტორი მამუკა შურღაია ამბობს, რომ რესპუბლიკის მოედანზე რამდენიმე მნიშვნელოვანი პროექტის განხორციელება იგეგმება.

„რესპუბლიკის მოედანზე სულ მალე, ახალი 5 ვარსკვლავიანი სასტუმრო „ტელეგრაფი“ გაიხსნება. ეს მოედნის განვითარების კონცეფციის ერთ-ერთი მნიშვნელოვანი ნაწილია. სასტუმროს პროექტში დაგეგმილია 60 მლნ ევროზე მეტი ინვესტირება. „ტელეგრაფის“ პროექტის დასრულების შემდეგ, რესპუბლიკის მოედნის განვითარებას მორიგი ეტაპია მელიქ აზარიანცის ისტორიული შენობის რეაბილიტაცია, რომლის დაახლოებით 2000 კვ. ნარჩენებისგან უკვე გავწმინდეთ. მოედნის განვითარების კონცეფციის მიხედვით დავიწროვდება სამანქანო გზა, მოედანი გახდება საფეხმავლო, გამწვანდება და შადრევნები მოეწყობა“, — აღნიშნა მამუკა შურღაიამ.

როგორც კომპანიაში აღნიშნავენ, პირველ ეტაპზე მოხდა პირველი და მეორე სადარბაზოს მიმდებარე ფართების გამაგრება და რეკონსტრუქცია. სრულად რეაბილიტირებულია სადარბაზოებს შორის განლაგებული ორი ერკერი. მოხდა ექვსი ერთეული ერკერის დროებითი ფიქსაცია და კონსერვაცია, შემდგომში მათი ჩამოშლის თავიდან ასაცილებლად. შეკეთდა დაზიანებული საკანალიზაციო მილები. ამჟამად, კომპანიის დაქირავებული სპეციალისტები შენობის გარშემო და მის ქვეშ საკომუნიკაციო და სანიაღვრე სისტემებს იკვლევენ. 

შოთა რუსთაველის გამზირზე 37 ნომერში მდებარე შენობის, კერძო მესაკუთრეებისგან გამოსყიდვის პროცესი სილქ როუდ ჯგუფმა ეტაპობრივად 2007 წლიდან დაიწყო და ამჟამად კომპანია მთლიანი ფართობის 80%-მდე ფლობს. დარჩენილ ფართში რჩებიან ბინების და კომერციული ფართების კერძო მესაკუთრეები.

შეთანხმებული პროექტის მიხედვით, „სილქ დეველოპმენტი“ მთლიანი ფართის უდიდესი ნაწილი კომერციული ფართი იქნება (8050 კვ.მ), 3000 კვ. მ-დეა საერთო სარგებლის ფართები, ხოლო მუზეუმი/გალერეა/სადეგუსტაციო 445 კვ.მ-ზე განთავსდება.