მეტროსადგურ „ვარკეთილის“ მიმდებარე ტერიტორიაზე უკვე ძალიან დიდი ხანია, რაც საცობი, მოუწესრიგებელი ინფრასტრუქტურა, ხმაური და მტვერი ყოველდღიურობა გახდა. თუმცა, რამდენიმე თვის წინ თბილისის მერმა კახა კალაძემ განაცხადა, რომ აღნიშნული ტერიტორია ერთ-ერთი მოწესრიგებული და გალამაზებული სივრცე გახდება.
დანაპირების შესრულება, დედაქალაქის მთავრობამ გარე ვაჭრობის პრობლემის მოგვარებით დაიწყო. დღეს გარევაჭრობისთვის განკუთვნილი კონსტრუქციები მეტროს მიმდებარედ აღარ შეგხვდებათ, მაგრამ ნახავთ, რომ ტერიტორიაზე აქტიურად მუშაობს მძიმე ტექნიკა. რა ინფრასტრუქტურული სამუშაოები მიმდინარეობს ვარკეთილში? სწორედ ამ კითხვით მივმართეთ თბილისის მერიას.
ინფრასტრუქტურის განვითარების საქალაქო სამსახურში ამბობენ, რომ ვარკეთილის მეტროს მიმდებარე ტერიტორიის რეაბილიტაცია დასასრულს უახლოვდება. მათი ინფორმაციით, ჯავახეთის ქუჩაზე საჰაერო კაბელები მიწის ქვეშ განთავსდა, დამონტაჟდა გარე განათების ახალი ქსელი. უწყებაში ამბობენ, რომ ამ დროისთვის ეწყობა ახალი სატრანსპორტო კუნძულები, რომლებიც ადაპტირებული იქნება შშმ პირებისა და ფეხით მოსიარულეებისთვის. ფართოვდება და ეწყობა საფეხმავლო ბილიკები. სულ მალე კი გზის სავალ ნაწილზე ასფალტის ახალი საფარი დაიგება.
„პროექტის მიზანია, მეტრო ვარკეთილის მიმდებარე ტერიტორიაზე ინფრასტრუქტურა მთლიანად შეიცვალოს, მოწესრიგდეს და განახლდეს. მოგეხსენებათ, აღნიშნული ტერიტორია მოძრაობის მხრივ საკმაოდ დატვირთულია, პროექტის განხორციელების შედეგად, გადაადგილება როგორც ფეხით მოსიარულეებისთვის, ასევე ავტომობილებისა და საზოგადოებრივი ტრანსპორტისთვის გახდება კომფორტული და მოსახერხებელი. ტერიტორია გალამაზდება და მიიღებს თანამედროვე იერსახეს“, - აცხადებენ ინფრასტრუქტურის განვითარების საქალაქო სამსახური.
ინფრასტრუქტურის განვითარების საქალაქო სამსახურთან ერთად ადგილზე ტრანსპორტის საქალაქო სამსახურიც მუშაობს. უწყებაში ამბობენ, რომ მიმდინარე რეაბილიტაციის ფარგლებში ჯავახეთის ქუჩაზე გათვალისწინებულია ე.წ. ბასლეინის დახაზვა ორივე მიმართულებით. მათი თქმით, ამა ქუჩაზე ასევე, გათვალისწინებულია სამანქანო ორ-ორი ზოლი თითოეული მიმართულებით.
როგორც ტრანსპორტის საქალაქო სამსახურში ამბობენ ქვეითთა უსაფრთხო და კომფორტული გადაადგილებისთვის მოხდება ტროტუარების რეაბილიტაცია და დაიხაზება ქვეითთა ზებრა გადასასვლელები, რომელთა ნაწილიც საჭიროებისამებრ დარეგულირდება შუქნიშნებით. ასევე, მოწყობილი იქნება უსაფრთხოების კუნძულებიც.
„კომერსანტს“ მერიაში განუცხადეს, რომ ქუჩის პერიმეტრიდან გამომდინარე არ იგეგმება მიმდებარედ პარკირების მოწყობა.
მეტროსადგურ „ვარკეთილის“ მიმდებარე ტერიტორიაზე ინფრასტრუქტურული სამუშაოები მიმდინარე წლის თებერვალში დაიწყო და მაისის დასაწყისში დასრულდება. პროექტის განხორციელებისთვის კი ჯამში ერთ მილიონ ლარამდე დაიხარჯება.
ბაჩო ადამია