პროდუქციის განთავსებისას ონლაინ მოვაჭრე ვალდებულია მიუთითოს ფასი. ეს უკვე „მომხმარებლის უფლებების დაცვის შესახებ“ კანონით რეგულირდება. მიუხედავად ამისა, დღესაც სოციალურ ქსელში მრავლად შეხვდებით განცხადებებს, სადაც ესა თუ ის პროდუქცია გასაყიდადაა გამოტანილი, თუმცა ფასი მითითებული არ არის. მომხმარებელს აინტერესებს და გასაყიდი პროდუქციის ქვეშ ხშირად შეხვდებით კომენტარებს: „რა ღირს?, „ფასი?“ და პასუხია: „პირადში მოგწერთ“ - რაც რეალურად დღეს დარღვევაა.

კონკურენციის ეროვნულ სააგენტოში „კომერსანტს“ უთხრეს, რომ მომხმარებლის უფლებების დაცვაზე სააგენტოში საკმაოდ ბევრი განაცხადი შედის, თუმცა კონკრეტულად ონლაინ ვაჭრობისას ფასის არ მითითებაზე სააგენტოში განაცხადი ჯერჯერობით არავის შეუტანია.

„ჯეპრას“ უფროსი კონსულტანტი კახა მაღრაძე კი ფიქრობს, რომ საზოგადოებას უფრო მეტი ინფორმაცია უნდა ქონდეს და იცოდეს თუ მსგავს სიტუაციებში ვის მიმართოს და ასე შემდეგ. მაღრაძის განმარტებით კი ფასის არ მითითებით „ინგეიჯმენტის“ გაზრდას ცდილობენ.

„კომენტარი და ლაიქშეარი ხომ „ინგეიჯმენტის“ ერთ-ერთი ფორმაა და ყველა რომ უწერს რა ღირს? რა ღირს? ეს მას უზრდის „ინგეიჯმენტის“. თუმცა ინგეიჯმენტი შესაძლოა გაზარდო და ცალკეული რიცხვები, მაგრამ ბრენდის, კომპანიის მიმართ, ან სავაჭრო ობიექტის მიმართ დამოკიდებულება აგრესიული ხდება. ეს ალბათ სოციალური მედიის მენეჯერების თემა უფროა, ვისი შრომაც „ინგეიჯმენტით“ და რიცხვებით ფასდება. იმათ არ აღელვებთ ბრენდის მიმართ ლოიალური დამოკიდებულება. თუმცა ბოლო პერიოდში ამ მარკეტერების დამოკიდებულება შეიცვალა, რადგანაც შესაბამისი კანონი შემოვიდა.

ჩემი აზრით, კონკურენციის სააგენტომ უნდა გააკეთოს ფართო კამპანია, რომ საზოგადოებამ უფრო მეტი ინფორმაცია მიიღოს და იცოდნენ, რომ ასეთ დროს სად მიწერონ ან დარეკონ“, - აცხადებს კახა მაღრაძე.

“მომხმარებლის უფლებების დაცვის შესახებ” კანონის შესაბამისად, მოვაჭრე ვალდებულია  - გასაყიდი ფასი მკაფიოდ და გასაგებად მიუთითოს, როგორც სავაჭრო ობიექტებში, ისე დისტანციურად (მათ შორის სოციალურ ქსელში) ვაჭრობის შემთხვევაში. მოვაჭრედ ითვლება -  ნებისმიერი პირი, რომელიც მრავალჯერად კომერციულ საქმიანობას ახორციელებს.

ფასის მითითება აუცილებელი არ არის, თუ:
- საქონლის მიწოდება მომსახურების ნაწილია; 
- საქონელი იყიდება აუქციონზე;
- გასაყიდად ხელოვნების ნიმუშია წარდგენილი.

▪️იმ საქონელზე, რომელიც წინასწარ არ არის შეფუთული და მომხმარებლის თვალწინ იწონება და იზომება, ასეთ შემთხვევაში, საკმარისია მხოლოდ ერთეულის ფასის მითითება. ერთეულის ფასის მითითება აუცილებელი არ არის, თუ იგი გასაყიდი ფასის იდენტურია.

▪️რაც შეეხება სარეკლამო პოლიტიკას - რეკლამაში, რომელშიც  გასაყიდი ფასია მითითებული, თვალსაჩინოდ უნდა ჩანდეს ასევე ერთეულის ფასი.

▪️იმ შემთხვევაში, თუ საქონლის ან მომსახურების ფასის შესახებ, ძირითადი ხარჯებისა და დამატებითი ხარჯების (მათ შორის, ტრანსპორტირების, გადაგზავნის, მონტაჟისა და სხვა) ფასის წინასწარ გამოთვლა შეუძლებელია − უნდა მიეთითოს მისი გამოთვლის წესის თაობაზე და ინფორმაცია იმის შესახებ, რომ შეიძლება დამატებითი ხარჯები წარმოიშვას.