ქვეყანაში უკანონო ავტოსადგურების არსებობაზე დიდი ხანია საუბრობენ ტრანსპორტისა და ლოგისტიკის ექსპერტები. მთავრობამ კი საკითხი მხოლოდ ახლა გააქტიურა. დედაქალაქის მერიის ინფორმაციით, თბილისში არსებული საქალაქთაშორისო ავტოსადგურები ახლებურად მოეწყობა. დედაქალაქის მთავრობა უახლოეს მომავალში ტენდერს გამოაცხადებს. პროცესში ავტოსადგურების ტერიტორიის მესაკუთრეებიც ჩაერთვებიან.
ტრანსპორტისა და ლოგისტიკის სპეციალისტების შეფასებით, ახალი რეგულაციით რეალურად იცვლება ტექნიკური რეგლამენტი საქალაქთაშორისო მგზავრების გადაყვანისა და ბარგის გადატანის საკითხში და მათივე პროგნოზით, რეგულაციის შედეგი იქნება დიდწილად სექტორის მოწესრიგება. ექსპერტების მტკიცებით, არსებული ფორმით ავტოსადგირების ფუნქციონირება, ერთი მხრივ, უსაფრთხოებას აყენებს კითხვის ნიშნის ქვეშ, მეორე მხრივ, აზარალებს ეკონომიკას და ბიუჯეტს.
ტრანსპორტისა და ლოგისტიკის ექსპერტები "კომერსანტს" უხსნიან, რომ თვითნებურად გახსნილი უკანონო ავტოსადგურები მრავალმხრივ პრობლემას ქმნის: 1. აზარალებს, მომხმარებელს ართმევს კანონიერ ბიზნეს, კანონიერ ავტოსადგურს, რომელიც თითო მგზავრზე ბიუჯეტში იხდის ფულს 2. ბიუჯეტი კარგავს შემოსავლებს. 3. კითხვის ნიშნის ქვეშაა მგზავრების უსაფრთხოება, რადგან არ კონტროლდება ამ ავტოსადგურების მუშაობის ხარისხი და კანონთან შესაბამისობა, მათი ტრანსპორტის ტექნიკური გამართულობა და მძღოლების ჯანმრთელობის მდგომარეობა უშუალოდ რეისის განხორციელების წინ. ცალკე პრობლემაა ეკოლოგიური მდგომარეობა და ვიზუალური დისკომფორტი, ქაოსი, რაც, როგორც წესი, ასეთი სადგირების არსებობის ადგილებშია.
"სატრანსპორტო დერეფნის კვლევის ცენტრში " ფიქრობენ, რომ ავტოსადგურების ცივილური ფუნქიონირებისათვის, პირველ რიგში, მოსაგვარებელია ავტოსადგურების სერთიფიცირების საკითხი. ცენტრის პრეზიდენტი, პაატა ცაგარეიშვილი, "კომერსანტს " უხსნის, რომ ავტოსადგურების სერთიფიცირების საკითხის გადაწყვეტით, ავტომატიურად მოიხსნება, პარტიზანული ტიპის ავტოსადგომების მოწყობა გორი, გორი, ორი კაცი - გავდივართ, რაც ცივილური ტურიზმის განვითარებას დაეხმარება. ასეთ ვითარებაში, კი მარტივად იქნება შესაძლებელი, მეტროსადგურების გამოსასვლელებთან განლაგებული ავტოსადგომების სრულფასოვანი ფუნქიონირება.
"პრობლემის არსი მდგომარეობს შემდეგში: საავტომობილო ბაზარზე სრული ლიბერალიზაციის პირობებში, მოხდა სამარშრუტო ქსელის მითვისება ავტოსადგურების მესაკუთრეების მიერ, რომელთა თანხმობის გარეშე, ნებისხმიერი გარეშე გადამზიდავებისათვის, პრაქტიკულად შეუძლებელია ქვეყნის შიგნით რეგულარულ მარშრუტებზე საქმიანობის განხორციელება.
აღნიშნული პრობლემის მოსაგვრებლად, ჯერ კიდევ 2018 წელს საკანონმდებლო ინიციატივის სახით საქართველოს პარლამენტში ეკონომიკის სამინისტროს მიერ მომზადებული კანონმპროექტი დაფიქსირდა. 2019 წელს გათვალისწინებული იყო „ლიცენზიებისა და ნებართვების შესახებ“ კანონში ცვლილების შეტანა, რაც ვერ განხორციელდა. 2020 წელს ავტოსადგურები სერთიფიცირების მოლოდინში იყვნენ, თუმცა სახელმწიფომ ვერ უზრუნველყო საკანონმდებლო დონეზე ესოდენ მნიშვნელოვანი ცვლილების განხორციელება. დაპირება დაპირებად დარჩა," - განუცხადა "კომერსანტს" ცაგარეიშვილმა.
ცნობისთვის, სახმელეთო ტრანსპორტის სააგენტოს ინფორმაციით, თბილისში ჯამში 24 საქალაქთაშორისო ავტოსადგურია, აქედან პირველი კლასის ავტოსადგური მხოლოდ სამია - შპს „ოკრიბა“, სს „თბილისის ცენტრალური ავტოვაგზალი“ და შპს „ლილო ჩარტერი“. მეორე კლასისაა 6 ავტოსადგური, ხოლო მესამე კლასის - 15.
ავტორი: ბელა გელაშვილი