კრიპტოვალუტის მწარმოებელი „ბი ეფ დი სის“ (bitfury-ს) მიერ მოხმარებული ელექტროენერგიის მოცულობა იზრდება. თუ 2020 წლის იანვარ-ნოემბერში კომპანიამ 109.8 მლნ კვტ-სთ ელექტროენერგია მოიხმარა, წელს ანალოგიურ პერიოდში მოხმარებული ელექტროენერგიის მოცულობამ 395.2 მლნ კვტ.სთ შეადგინა, ზრდა 260%-ია.

„ბი ეფ დი სის“ მიერ ელექტროენერგიის მოხმარების ზრდა ფაქტობრივად, დროში ემთხვევა ბიტკოინზე ფასის მატებას. კერძოდ, ბიტკოინმა გაძვირებას 2020 წლის ნოემბერში დაიწყო, მაშინ ფასმა 15 000-დოლარიან ნიშნულს პირველად გადააჭარბა, შესაბამისად, იმავე პერიოდში „ბი ეფ დი სიმ“ 13.064 მლნ კვტ.სთ ელექტროენერგია მოიხმარა, მაშინ როცა ოქტომბერში მოხმარებული ელ-ენერგიის მოცულობა მხოლოდ 0.075 მლნ კვტ.სთ იყო.

უკვე 2021 წლის იანვრიდან კი Bitfury-მა მოხმარებული ელექტროენერგიის მოცულობა ყოველთვიურად იზრდებოდა. წელს ყველაზე დიდი მოცულობის დენი კომპანიამ ოქტომბერში მოიხმარა - 41.031 მლნ კვტ.სთ. წელსვე, იანვრიდან დღემდე ბიტკოინის ღირებულება 28,985 დოლარიდან 46.688 დოლარამდე გაძვირდა.

აღსანიშნავია ისიც, რომ პირდაპირ მომხმარებლებს შორის, „ბი ეფ დი სი“ არის მეორე კომპანია, რომელიც ყველაზე მეტ ელექტროენერგიას მოიხმარს. კერძოდ, ესკოს სტატისტიკის მიხედვით, დღეს ქვეყანაში სულ ელექტროენერგიის 46 პირდაპირი მომხმარებელია, აქედან ყველაზე მეტი დენი 2021 წლის 11 თვეში „ზესტაფონის ფეროშენადნობთა ქარხანამ" მოიხმარა - 842.2 მლნ კვტ.სთ; მეორე ადგილზე კი 395.2 მლნ კვტ.სთ-ით სწორედ „ბი ეფ დი სია“. ეს კი პირდაპირი მომხმარებლების მიერ მოხმარებული ელექტროენერგიის 12,3%-ია. 2021 წლის 11 თვეში პირდაპირმა მომხმარებლებმა ჯამში 3199.7 მლნ კვტ.სთ ელექტროენერგია მოიხმარეს.

ცნობისათვის, Bitfury კაიმანის კუნძულების ოფშორშია რეგისტრირებული და ის მისი შვილობილი კომპანიების გავლით ოპერირებს. Bitfury Group LTD რეგისტრირებულია კაიმანის კუნძულებზე, კომპანიას ჰყავს შვილობილი კომპანია ლუქსემბურგში - Bitfury (Luxembourg) Sàrl, რომელსაც თავის მხრივ ჰყავს შვილობილი კომპანია ნიდერლანდებში - Bitfury Holding BV. სწორედ აღნიშნული ჰოლდინგი ფლობს საქართველოში ბიტკოინების მწარმოებელ კომპანიას „ბი ეფ დი სი ჯორჯიას.“

Bitfury ერთ-ერთი მსხვილი ბლოკჩეინ კომპანიაა, რომელიც კრიპტოვალუტების გამოშვებისთვის - "მაინინგისთვის" აწარმოებს მძლავრ ჩიპებს და კომპანიებს სთავაზობს სხვადასხვა სახის ბლოკჩეინ სერვისს.

bpn.ge