2022 წლის სამი კვარტლის განმავლობაში, ბაქო-თბილისი-ჯეიჰანის (BTC) საქმიანობის ფარგლებში BP-ს საოპერაციო დანახარჯი 74 მლნ დოლარზე მეტი იყო და კაპიტალური დანახარჯი კი 17 მლნ დოლარს აღემატებოდა. აღნიშნულის შესახებ საუბარია BP-ს ბიზნესსაქმიანობის 2022 წლის მესამე კვარტლის შედეგების ანგარიშში, რომელსაც BP-საქართველო ავრცელებს.

ირკვევა, რომ 2022 წლის 23 მარტს, BTC-მ მნიშვნელოვან შედეგს მიაღწია და სანგაჩალის ტერმინალიდან აზერბაიჯანის, საქართველოს და თურქეთის გავლით ტრანსპორტირებული ნავთობი ჯეიჰანის ტერმინალზე მე-5000 ტანკერი ჩაიტვირთა.

1768კმ სიგრძის მილსადენმა 2006 წლის ივნისში ფუნქციონირების დაწყებიდან 2022 მესამე კვარტლის ბოლომდე ჯამში 3.93 მილიარდი ბარელი ნედლი ნავთობი გაატარა (524 ტონაზე მეტი). 5163 ტანკერი დაიტვირთა და გაიგზავნა მსოფლიო ბაზრებზე.

2022 წლის პირველი სამი კვარტლის მანძილზე, დაახლოებით 164 მილიონი ბარელი (22 მილიონ ტონაზე მეტი) BTC-ის მიერ ექსპორტირებული ნედლი ნავთობი ჯეიჰანის ტერმინალზე 224 ტანკერში ჩაიტვირთა.

BTC ამჟამად ძირითადად აზერბაიჯანიდან აზერი-ჩირაგ-გუნაშლის (ACG) ნედლი ნავთობის და შაჰ-დენიზის კონდენსატის ტრანსპორტირებას ახორციელებს. BTC-ის საშუალებით ასევე გრძელდება კასპიის რეგიონის ნედლი ნავთობის და კონდენსატის სხვა მოცულობების ტრანსპორტირება.

აღსანიშნავია, რომ The BTC Co.-ს აქციონერები არიან: bp (30.1%); SOCAR (25.00%); MOL (8.90%); Equinor (8.71%); TPAO (6.53%); Eni (5.00%); TotalEnergies (5.00%), ITOCHU (3.40%); INPEX (2.50%), ExxonMobil (2.50%) და ONGCVidesh (2.36%).