წელს, 2021 წლის სეზონის მსგავსად, ფერმები 55 ათას ტონამდე თხილის მოსავალს ელოდებიან, თუმცა როგორი იქნება მისი ხარისხი ეს უცნობია.
საქართველოს თხილის მწარმოებელთა ასოციაციის აღმასრულებელი დირექტორი გიორგი თოდუა „კომერსანტთან“ ამბობს, რომ უხვი ნალექის გამო ვერ მოხერხდა თხილზე აგრო კალენდრით გათვალისწინებული ღონისძიებების ჩატარება და შესაბამისად პროდუქციის ხარისხის შესახებ დაზუსტებული ინფორმაცია ჯერ არ არსებობს.
„როცა მოსავალზე ვსაუბრობთ მნიშვნელოვანია,როგორც თხილის რაოდენობა ასევე ხარისხი. დღეის გათვლებით მოსავალი იმდენივე იქნება, რაც შარშან საუბარია, 55 ათას ტონაზე.
შარშანდელი მოსავლის უმეტესობა გაყიდულია, თუმცა დარჩენილია 3-4 ათასი ტონა იქიდან გამომდინარე საწყისი ფასი რაც იყო, შემდეგ ამ ფასს 2 ლარი დააკლდა და ფერმერებმაც პროდუქცია აღარ გაყიდეს და მომავალი სეზონისთვის გადაინახეს.
პროგნოზი კი გაქვს, რომ თხილი რაოდენობრივად იგივე იქნება რაც შარშან, მაგრამ აი ხარისხი როგორი იქნება ეს ჯერ არ ვიცით. ჯერჯერობით წამლობა მიმდინარეობს. გეტყვით, რომ დასავლეთ საქართველოში მოსავლის აღება დაიგვიანებს, იქიდან გამომდინარე რომ უხვი ნალექი იყო. პროდუქციის აღება სავარაუდოდ 15 აგვისტოდან დაიწყება.
ფერმერებს მოვუწოდებთ, რომ მოსავლის აღებამდე ჯერ კიდევ არის დრო და ამიტომ 2-ჯერ მაინც ჩაატარონ წამლობა მინიმუმ ფაროსანაზე, რათა მოსავალი არ გაუფუჭდეთ. უხვმა ნალექმა ნეგატიური ასახვა პოვა მოსავალზე და ის რამდენიმე წამლობა, რომელიც იმ პერიოდში იყო ჩასატარებელი ფერმერებმა სწორედ წვიმის გამო ვერ ჩაატარეს. თუ წამლობას განვახორციელებთ გვექნება უმაღლესი ხარისხის თხილი. მაღალი ხარისხის თხილის ფასი იქნება ყოველთვის მაღალი, - აცხადებს საქართველოს თხილის მწარმოებელთა ასოციაციის აღმასრულებელი დირექტორი გიორგი თოდუა.
ქართული თხილის გასაღების მთავარი ბაზარი გერმანია, იტალია და ესპანეთია.
„საქსტატის“ მონაცემებით, 2021 წლის განმავლობაში საქართველოდან 24,926.79 ტონა თხილის ექსპორტი განხორციელდა, რომლის საერთო ღირებულებამაც 118 მლნ 351 ათასი დოლარი შეადგინა. რაც შეეხება მიმდინარე წლის იანვარ-ივნისის მონაცემებს, საქართველოდან 8,372.37 ტონა 40 მლნ 816 ათასი დოლარის თხილისა და სხვა კაკლების ექსპორტი მოხდა.
გასულ წელს, კარგი თხილის ფასი ადგილზე 8-დან 9 ლარამდე, იყო, ხოლო საშუალო ხარისხის თხილის ღირებულება 6-დან 7 ლარამდე.
რაც შეეხება მიმდინარე სეზონის ფასს, ეს ჯერჯერობით უცნობია და ის დიდწილად იქნება დამოკიდებული თურქეთის მიერ ნაკარნახევ ფასზე, რადგანაც თურქეთის თხილის 70%-ის მწარმოებელი ქვეყანაა და სწორედ მასზეა დამოკიდებული ფასებიც. გიორგი თოდუა ამბობს, რომ თურქეთს წელსაც მაღალი მოსავალი აქვთ, თუმცა ჯერჯერობით წინასწარი პროგნოზები არ გამოქვეყნებულა.
„თურქეთს მალე გამოაქვეყნებს საკუთარ პროგნოზებს. როგორც იცით მსოფლიო მოხმარების თხილის 70%-ს თურქეთი აწარმოებს და შესაბამისადაც მათი დახმარებით დგება ფასებიც“, - ამბობს ასოციაციის ხელმძღვანელი.
საქართველოს თხილის მწარმოებელთა ასოციაციის აღმასრულებელი დირექტორის თქმით, ბოლო 2 წლის განმავლობაში სახეზეა თხილის პლანტაციების ზრდა. საუბარია 500 ჰა თხილის გაშენებაზე, რაც საშუალო და მსხვილ ფერმერებს დაახლოებით 5 მლნ ლარი დაუჯდათ.