მთავრობა ანაკლიის ღრმაწყლოვანი პორტის მშენებლობას ინვესტორის გარეშე დაიწყებს. ამის პარალელურად ნავსადგურის ასაშენებლად ინტერესთა გამოხატვა გამოცხადდა. უწყებათაშორისი კომისიის გადაწყვეტილებით, ეკონომიკისა და მდგრადი განვითარების სამინისტრო რამდენიმე თვეში საერთაშორისო კონსულტანტების ჩართულობით, პროექტის საუკეთესო ინვესტორს გამოავლენს. პარალელურად, სახელმწიფო განაახლებს არსებულ საინჟინრო/გარემოსდაცვით კვლევებს და პორტისთვის საჭირო გარკვეულ სამშენებლო სამუშაოებს დაიწყებს.

მთავრობამ ანაკლიის ღრმაწყლოვანი პორტის პროექტში კერძო პარტნიორის შესარჩევად განზრახულობის განაცხადი უკვე გამოაქვეყნა, რომლის მიხედვით, პროექტისთვის 49%-იანი წილის მფლობელი კომპანია ან კონსორციუმი შეირჩევა. განაცხადის მიხედვით, ანაკლიის პორტის პროექტი 9 ფაზად უნდა განვითარდეს. პირველი ფაზის ოპერირება უნდა დაიწყოს მშენებლობის დაწყების თარიღიდან 3 წლის ვადაში.

„ანაკლიის ნავსადგურის პირველმა ფაზამ უნდა მიაღწიოს გამტარუნარიანობას, რომელიც საჭიროა ყოველწლიურად სულ მცირე ექვსასი ათასი (600,000) TEU ტვირთის დასამუშავებლად, რაც გულისხმობს შვიდი მილიონ რვაასი ათას (7,800,000) ტონას, საშუალოდ 13 ტონა/TEU გათვლით. კანდიდატის სურვილის შემთხვევაში, პირველი ფაზა შეიძლება მოიცავდეს დამატებითი ტვირთის დამუშავების რესურსს. პირველი ფაზის მომზადების, მშენებლობისა და დასრულების კონკრეტული ვადები დაზუსტდება წინადადებების წარმოდგენის შესახებ მოთხოვნაში (RfP), მაგრამ პირველი ფაზის ოპერირება უნდა დაიწყოს მშენებლობის დაწყების თარიღიდან სამი წლის ვადაში.

მე-2 -დან მე-9 ფაზების განვითარება დაიწყება, როდესაც: ნავსადგურის ყოველწლიური ტვირთბრუნვა მიაღწევს წინა ფაზის გამტარუნარიანობის 80%-ს და დამატებითი ტექნიკურ-ეკონომიკური კვლევა ჩატარდება კონცესიონერის მიერ, ასევე საერთაშორისო საფინანსო ინსტიტუტები (IFI)/გამსესხებლები მოიწონებენ შემდგომი ფაზის განხორციელებას“, — ნათქვამია განაცხადში.

ტექნიკური მოთხოვნები შემდეგია:

• კანდიდატს ან მისი კონსორციუმის წევრ(ებ)ს და/ან ქვეკონტრაქტორს უნდა ჰქონდეს განხორციელებული სულ მცირე ერთი ღრმაწყლოვანი ნავსადგურის/ტერმინალის, წლიური მინიმალური გამტარუნარიანობით 5 მილიონი ტონა, პროექტირება, მშენებლობა და მოვლა/პატრონობა.
• კანდიდატს ან მის კონსორციუმის წევრ(ებ)ს უნდა ჰქონდეს განხორციელებული ინვესტიცია სულ მცირე ერთ ეკონომიკური ინფრასტრუქტურის პროექტში ღირებულებით სულ მცირე 500 მილიონი აშშ დოლარი.
• კანდიდატს ან მის კონსორციუმის წევრ(ებ)ს და/ან ქვეკონტრაქტორს უნდა ჰქონდეს საკმარისი მენეჯერული და ორგანიზაციული შესაძლებლობები პროექტის განსახორციელებლად.
• კანდიდატი ან მისი კონსორციუმის წევრ(ებ)ი და/ან ქვეკონტრაქტორი, მიმდინარე პერიოდში, უნდა ოპერირებდეს სულ მცირე ორ საკონტეინერო ტერმინალს წლიური მინიმალური გამტარუნარიანობით თითოეულ ტერმინალზე 500,000 TEU.
• კანდიდატს ან მის კონსორციუმის წევრებს ერთობლივად (წილების პროპორციულად) უნდა ჰქონდეთ საკმარისი ფინანსური მდგომარეობა, რათა იმოქმედონ როგორც კერძო პარტნიორმა პროექტთან მიმართებაში.
• ალტერნატივის სახით, კანდიდატმა ან კონსორციუმის წევრმა უნდა წარმოადგინოს დამხმარე წერილი/განზრახულობის წერილები დამფინანსებლებისგან, რათა წარმოაჩინოს პროექტის დაფინანსებისთვის 500 მილიონი აშშ დოლარის მოზიდვის შესაძლებლობა.

პროექტის განხორციელების ვადები შემდეგია:

• განზრახულობის შესახებ განაცხადის გამოქვეყნება 20-02-2023
• დაზუსტებების შესახებ მოთხოვნის წარდგენის საბოლოო ვადა 21-04-2023
• კვალიფიკაციის შესახებ განაცხადის წარდგენის საბოლოო ვადა 19-05-2023
• კვალიფიციური კანდიდატების შეტყობინების საბოლოო ვადა 17-07-2023
• წინადადებების წარმოდგენის შესახებ მოთხოვნის საბოლოო ვადა 17-07-2023

„ბოლო წლების განმავლობაში სატვირთო მიმოსვლა მნიშვნელოვნად გაიზარდა და ნავსადგურები გადატვირთულია. ასევე არსებული ნავსადგურების სიღრმე არ არის საკმარისი Panamax ან VLC გემების მისაღებად. საჭიროა ახალი ღრმაწყლოვანი ნავსადგურის მშენებლობა, რომელიც ისარგებლებს სტრატეგიული მდებარეობით და ექნება პოტენციალი გაუმკლავდეს მზარდ გამტარუნარიანობას ევროპასა და აზიას შორის. ახალი ანაკლიის ნავსადგური დაიკავებს მნიშვნელოვან პოზიციას ტრანზიტული ჰაბის სახით. ანაკლიის ნავსადგურის მდებარეობა იქნება საქართველოს შავი ზღვის სანაპირო, სოფელ ანაკლიის მიმდებარედ. პროექტის სავარაუდო კაპიტალის ღირებულება 500 მილიონი აშშ დოლარია“, - ნათქვამია კერძო პარტნიორის შერჩევის პროცესის განზრახულობის შესახებ განაცხადში.