ჭიათურის სამთო-გამადიდრებელი კომბინატის საერთო საცხოვრებელი ის ადგილია, სადაც მაღაროელები სამუშაოს შემდეგ თავისუფალ დროს ატარებენ, სადილობენ და ხშირად დრო დასვენებისთვის და გართობისთვისაც რჩებათ. ეს პროფესია მსოფლიოში ყველაზე რისკიანად ითვლება, თავისი სპეციფიკით ურთულესია და უდიდეს ძალისხმევას საჭიროებს. საქართველოში ხშირად გვესმის კრიტიკული მოსაზრებები, თითქოს მაღაროელებს გაუსაძლის პირობებში უწევთ ცხოვრება.
რეალურად როგორ პირობებში მუშაობენ „ჯორჯიან მანგანეზში“ დასაქმებული ადამიანები და როგორია მაღაროელთა საერთო საცხოვრებელი, ე.წ. სანატორიუმი?
როგორც „ჯორჯიან მანგანეზის“ მიერ გავრცელებულ ინფორმაციაშია აღნიშნული, კომპანია თავად უზრუნველყოფს თანამშრომლების სამუშაო ადგილებამდე და უკან ტრანსპორტირებას, ასევე, მათ სამჯერად კვებას. ე.წ. სანატორიუმი, რომელიც ქალაქის მწვანე უბანში მდებარეობს 5 სართულისგან შედგება და ის ამ ეტაპზე 284 დასაქმებულს ემსახურება. 2-3 საწოლიანი ოთახები, გასახდელები, კეთილმოწყობილი სასადილო სამჯერადი კვბით - ეს ის არასრული ჩამონათვალია რაც ადგილზე მისვლის დროს დაგხვდებათ. შენობა, ასევე, აღჭურვილია ყველა საჭირო საყოფაცხოვრებო ტექნიკით, უკაბელო ინტერნეტითა და მაგიდის ტენისით. შენობაში მოწევა აკრძალულია. კორონავირუსის გავრცელების პრევენციის ფარგლებში აქ მკაცრად იცავენ მთავრობისა და ჯანდაცვის სამინისტოროს რეკომენდაციებსაც. ცოტა ხნის წინ კომპანიამ გადაწყვიტა, თავისი თანამშრომლებისთვის საცხოვრებელი პირობები გაეუმჯობესებინა, და ქვეყანაში გამოცხადებული საგანგებო მდგომარეობისა და პანდემიის დროს, მაშინ როცა შენობა მცირე დროით დაიკეტა, ე.წ. სანატორიუმში სარემონტო სამუშაოები ჩატარდა.
„პანდემიის დროს ჩატარებული სარემონტო სამუშაოების დროს, მაღაროელთა საერთო საცხოვრებელში, გარემონტდა სასადილო დარბაზი, სამზარეულო და სველი წერტილები, საცხოვრებელ ოთახებში კი კოსმეტიკური რემონტი ჩატარდა. რაც შეეხება შენობის გარე პერიმეტრს, მოიხრეშა და კიდევ უფრო კეთილმოეწყო. დამატებით შევიძინეთ საყოფაცხოვრებო ტექნიკა. დასაქმებულებს კვების კომპანია „გემო კვება“ ემსახურება - აღსანიშნავია, რომ რაციონი ყოველთვის ნოყიერია და პერიოდულად შესაბამისი სამსახურების მხრიდან კვების ხარისხის შემოწმებაც ხდება, მინდა გითხრათ ხარისხი სტანდარტებს სრულად აკმაყოფილებს. მინდა ხაზგასმით აღვნიშნო, რომ „ჯორჯიან მანგანეზისთვის“ კომპანიაში დასაქმებული ადამიანებისთვის, კომფორტული, უსაფრთხო გარემოს შექმნა და სტაბილურად მაღალი ხარისხის პროდუქციის შეთავაზება ერთ-ერთი მნიშვნელოვანი კომპონენტია“,- აღნიშნავს ჭიათურის სამთო-გამამდიდრებელი კომბინატის დირექტორი ივა ხეთაგური.
„პანდემიის გამო დაწესებულ შეზღუდვებს მკაცრად ვიცავთ. სასადილოში ორმეტრიანი დისტანცია დაცულია, სწორედ ამიტომ ერთ ჯერზე მხოლოდ სამოცი მაღაროელი სადილობს -დრო და გრაფიკი ისეთივე სიზუსტითაა განაწილებული როგორც მრავალფეროვანი რაციონი“,- აღნიშნავს ერთ-ერთი დასაქმებული.
როგორც „ჯორჯიან მანგანეზში“ აღნიშნავენ, გასული წლის მაისის გაფიცვების შემდეგ, კომპანიამ თანამშრომლების მიმართ გაცემული დაპირებები სრულად შეასრულა, მათ შორის შრომითი ანაზღაურების შესახებ მიცემული დაპირება. გასულ წელს კომპანიაში დასაქმებულებს ხელფასი 25%-ით, მიმდინარე წელს კი პანდემიისა და კრიზისის მიუხედავად, კომპანიას მუშაობა არც ერთი დღით არ შეუწყვეტია და მათ შრომითი ანაზღაურება, დამატებით 10%-ით გაეზარდათ.