ზეთისხილის ნარგავი ბაღების მოცულობა საქართველოში ნელ-ნელა, მაგრამ მაინც ყოველწლიურად იზრდება. ამ ეტაპზე ქვეყანაში ზეთისხილის ნარგავი ფართობების მოცულობა უკვე 2 ათასი ჰექტარია და ინვესტირების მხრიდან დამატებით 3 ათას ჰა-მდე ბაღების გაშენებაზე ინტერესი უკვე არის.

სოფლის მეურნეობის სამინისტროს ინფორმაციით, „დანერგე მომავლის“ ფარგლებში ამ ბაღების გაშენებაში ბიუჯეტიდან 11 მილიონ ლარამდეა დახარჯული. ზეთისხილის პლანტაციები ძირითადად კახეთსა და ქვემო ქართლშია გაშენებული. ქვემო ქართლში 200 ჰექტარი, დანარჩენი 1800 ჰექტარი ნარგავი ბაღები კი კახეთში მდებარეობს.

„ზეთისხილის რთველი“ საქართველოში 10 ოქტომბრიდან დაიწყო. წელს მოსავლის საპროგნოზო მაჩვენებელი 250-300 ტონაა. ზეთისხილის ახალი ბაღები წელსაც გაშენდა, კომპანია „ქართულმა ზეთისხილმა“ ნარგავები დამატებით 500 ჰექტარზე გააშენა.

„წლევანდელი დარგული 3-4 წლის მერე მოგვცემს მოსავალს. ნერგებს ყოველ წელს ვრგავთ, ამიტომ მოსავალი და ზეთის ხილიდან შემოსავალი ყოველწლიურად იზრდება. ვფიქრობთ, რომ წელს მწვანე და შავ ზეთისხილს საკვებად წელს 50 ტონაზე მეტს დავამზადებთ და თვითონ ზეითუნის ზეთსაც 200 ტონა ზეთისხილიდან გადავამუშავებთ და მივიღებთ სადღაც 40-50 ტონა პროდუქციას“, - განაცხადა „ბიზნესპარტნიორთან“ საუბრისას „ქართული ზეთისხილის“ დამფუძნებელმა გიორგი სვანიძემ.

გარემოს დაცვისა და სოფლის მეურნეობის მინისტრის მოადგილე გიორგი ხანიშვილი ამბობს, რომ საქართველოში ზეთისხილის კულტურას დიდი პოტენციალი აქვს და ამიტომ ინვესტორთა მხრიდან ინტერესიც არსებობს.

„საქართველოს სავაჭრო სექტორში, ქსელებში უკვე გაოჩნდა ქართული ზეითუნის ზეთი. რაც იმპორტს ანაცვლებს და ვფიქრობთ, რომ ეს პერსპექტივა, რომელიც გვაქვს, დღეის მდგომარეობით ეს არის 2000 ჰა-მდე გაშენებული ბაღები, კიდევ უფრო გაძლიერდება. გვაქვს სხვადასხვა ფერმერებისგან, ინვესტირებისგან დაინტერესება. საუბარია დამატებით 2-3 ათასი ჰა-ს გაშენებაზე. მნიშვნელოვანია ვიცოდეთ, რომ სახელმწიფო მუშაობს იმ ფართობების გასარწყავიანებაზე სადაც დღეს ზეთისხილია გაშენებული და სადაც პოტენციურად შესაძლოა გაშენეს. ასე რომ ქართული ზეთისხილის კულტურას საქართველოში დიდი პოტენციალი აქვს“, - უთხრა მინისტრის მოადგილემ „ბიზნესპარტნიორს“.

აღსანიშნავია, რომ ქართული ზეთისხილი და ზეითუნის ზეთი ძირითადად ადგილობრივ ბაზარზე იყიდება და იმპორტი 22%-ით ჩანაცვლებულია. კომპანია „ქართული ზეთისხილი“, რომელიც ყველაზე მსხვილი მწარმოებელია, გეგმავს რომ წელს ეს მაჩვენებელი 38%-მდე გაზარდოს. ზეთისხილი და მისგან დამზადებული ზეითუნის ზეთი ექსპორტზე ბრაზილიასა და ჰოლანდიაში გადის. წელს საექსპორტო ბაზრებს ბაჰრეინიც დაემატება.