მას შემდეგ, რაც რუსეთის ფედერაციის გავლით ტრანზიტს ბევრი აღარ ირჩევს, შუა დერეფანი ყურადღების ცენტრში მოექცა. და თუ მისი პოტენციალი ჩრდილოეთ და დასავლეთ ევროპის ბაზრებისთვის დიდი არაა, ცენტრალური და აღმოსავლეთ ევროპისთვის, ისევე როგორც ცენტრალური აზიისთვის, ამ დერეფანს მნიშვნელობა აქვს.
როგორც RailFreight-ზე გამოქვეყნებული ინფორმაციიდან ირკვევა, ევროპის აბრეშუმის გზის სამიტის მონაწილეები, რომელიც გაიმართა 8 და 9 დეკემბერს დუისბურგში, იზიარებენ აზრს, რომ დიდია ინტერესი კასპიის ზღვის ალტერნატიული მარშრუტის მიმართ, მაგრამ ბევრი ასევე მიიჩნევს, რომ მარშრუტის სატრანზიტო დროსა და ღირებულებას დაბალი კონკურენტუნარიანობა აქვს.
DP World-ის მარკეტინგისა და საზოგადოებასთან ურთიერთობის ხელმძღვანელი ალექსანდრუ კრაჩიუნი მიიჩნევს რომ ჩრდილოეთის დერეფანს პერსპექტიულად უნდა შევხედოთ.
„DP World-მა კონსტანცას პორტიდან შიდა რეგიონებში ორი რეგულარული სარკინიგზო სატვირთო კავშირი დაამყარა – ერთი უნგრეთთან საზღვრამდე და მეორე უკრაინის მიმართულებით. შუა დერეფნის გავლით კონსტანცაზე ტვირთების გადაზიდვას აზრი აქვს იმ შემთხვევაში თუ დანიშნულების ადგილი წარმოადგენს აღმოსავლეთ ან ცენტრალურ ევროპას. კრიზისის დროს დერეფანი შეიძლება გამოყენებულ იქნას დასავლეთ ევროპაში ტვირთების გადასაზიდადაც“, - აცხადებს ალექსანდრუ კრაჩიუნი.
მან ასევე დაასახელა ახალი მარშრუტები, რომლებიც მომავალ წელს ამოქმედდება. პირველი გადის კონსტანცასა და დორნეშტს შორის უკრაინის საზღვართან. უკვე მომავალ წელს, DP World მზად არის კვირაში ხუთი რეისის უზრუნველყოფა მოახდინოს. თითოეულ მატარებელს 50 კონტეინერი გადააქვს და მგზავრობის დრო დაახლოებით 36 საათია. ეს მარშრუტი ომის დაწყებისთანავე შემუშავდა, როცა კონსტანცას პორტში უამრავი უკრაინული ტვირთი დაგროვდა.
სხვა მარშრუტი გადის კონსტანცას პორტსა და DP World-ის ტერმინალს შორის აიუდში, უნგრეთის საზღვართან კურტიჩისკენ მიმავალ გზაზე. აიუდადან, DP World ასევე გთავაზობთ მატარებლებს განრიგით. ამ ადგილს აქვს დიდი პოტენციალი, რადგან ტვირთის მიტანა შესაძლებელია რეგიონის ბევრ მიმართულებამდე.
როგორც ფოთში (საქართველო) APM Terminal-ის კომერციული დირექტორი იან რაულინსონი აცხადებს, შავი ზღვის მეორე მხარეს კიდევ ერთი დიდი პოტენციალის მქონე რეგიონია. ის ასევე მიიჩნევს, რომ შუა დერეფანი, როგორც დამაკავშირებელი ჩინეთსა და დასავლეთ ევროპას შორის, საკამათოა, მაგრამ ცენტრალური აზიის დანიშნულების ადგილის ან ამოსავალი წერტილის განხილვას დიდი აზრი აქვს.
„თუ თქვენ განიხილავთ საზღვაო მარშრუტს ცინგდაოდან ალმათამდე სუეცის არხისა და შავი ზღვის გავლით, მას ადვილად დასჭირდება ორი-სამი თვე, რკინიგზით 12-14 დღე სჭირდება. ანალოგიურად, თუ გადახედავთ ჰამბურგიდან ალმათის მიმართულებით გადაზიდვას ოკეანის გავლით, მოგზაურობის დრო არის ერთი თვე. ჩაჯექი მატარებელში და შეგიძლია ათი დღე დაისვენო. თქვენ უყურებთ ძალიან მიმზიდველ პროდუქტს“, – აღნიშნა იან როულინსონმა.
მისი თქმით, ცენტრალური აზია, როგორც დამოუკიდებელი ბაზარი, დიდი ხნის განმავლობაში უხილავი რჩებოდა მსოფლიოსთვის - „ის ყოველთვის ითვლებოდა რუსეთის ფედერაციის სატელიტ რეგიონად, მაგრამ რეგიონი ძალიან დასავლურია“. ახლა ბევრი დასავლური კომპანია დასახლდა ცენტრალურ აზიაში და დიდი სწრაფვა არსებობს დასავლური პროდუქტების მიმართ.
„APM განიხილავს ცენტრალურ აზიას, როგორც უკანასკნელ საკონტეინერო რეგიონს, რომელსაც აქვს უდიდესი პოტენციალი ლოგისტიკის თვალსაზრისით. რადგან მას ზღვასთან გასასვლელი არ აქვს, მიმოსვლა მხოლოდ რკინიგზით არის შესაძლებელი. მაგალითად, ყაზახეთი 60 მილიონი ტონა ტვირთის ექსპორტს ახორციელებს ევროპაში. მისი უმეტესი ნაწილი კვლავ მოძრაობს რუსეთის ფედერაციის გავლით, მაგრამ მისი შეცვლა შესაძლებელია შუა დერეფანით. ის ასევე შესაფერისია აღმოსავლეთით ყაზახეთისკენ მიმავალი ტვირთისთვის“, - აცხადებს იან როულინსონი.