„მე გული მწყდება, რომ ჩვენმა სექტორმა სახელმწიფო პროფესიული სასწავლებლების საჭიროებაში ვერ დავარწმუნეთ“- ამის შესახებ რადიო „კომერსანტის“ გადაცემა „აგროსექტორში“ „KTW“ ჯგუფის დამფუძნებელმა და დირექტორმა ზურაბ ჩხაიძემ განაცხადა. ბიზნესმენის განცხადებით, თუნდაც „კახური ტრადიციული მეღვინეობის“ მაგალითზე, სექტორს თითო რეგიონში 100 -მდე ადამიანის დასაქმება შეუძლია, თუმცა შესაბამისი კადრები არ არსებობენ.

„რაც უფრო მალე გვექნება ქვეყანაში პროფესიული სასწავლებელი, მით უფრო მალე შევძლებთ ადამიანების სექტორში ჩართვას, მარტო ჩვენ კომპანიაში ერთ რეგიონში 100 ვაკანსიაა. სულ თანამედროვე ტექნოლოგიები გვაქვს, გვყავს „VALTRA“— ს და „Wagner“— ის ტრაქტორები, რომელსაც მხოლოდ სწორი მართვის ცოდნა უნდა. გარდა ამისა გვჭირდება აგრონომები, მეღვინეები, ამას ყველაფერს სამზარეულომდე და სასტუმრომდე მივყავართ. სასტუმროს მენეჯმენტი სჭირდება და ეს ხალხი ვინც ამ სფეროებში დასაქმდება არ არსებობს, ამ საკითხში სახელმწიფოს ჩართულობა მნიშვნელოვანი იქნება“, -  აღნიშნა ზურაბ ჩხაიძემ.

ზურაბ ჩხაიძის განცხადებით, საქართველოში ვენახების ძველებური განაშენიანება მასიურად გვხვდება.

„ვფიქრობ, რომ მეღვინეობა ვენახიდან იწყება, ყველა ჩვენი ექსპერტი, პარტნიორი თუ უცხოეთიდან მოწვეული მეღვინე ღვინის ხარისხზე ზრუნვას ვენახის მოვლით იწყებს. არსებობს ახალი ტექნოლოგია, რომელსაც ხარისხობრივადაც და რაოდენობრივადაც მეტი ღვინის მოცემა  შეუძლია. ჩვენ ყოველ წელს ვსწავლობთ და ვეცნობით ახალ ტექნოლოგიებს, უცხოეთიდან ჩამოვიყვანეთ მეცნიერი, რომელმაც შვიდი ისეთი რჩევა მოგვცა, რომელიც არც კი ვიცოდით. არსებობს გასხვლის სპეციალური მეთოდოლოგია, რომელიც საქართველოში არ იციან. მსოფლიო ბანკის დაფინანსებით კახეთში ჩატარდა პროექტი, სადაც ჩვენმა მევენახეებმა, რომლებიც გასხვლაზე მუშაობენ მონაწილეობა მიიღეს“, - აღნიშნა ზურაბ ჩხაიძემ

ჩხაიძის განმარტებით, ვენახის მოვლა დიდი და რთული პროცესია, რომელიც მუდმივად ვითარდება დასიახლეები ინერგება, მისივე განცხადებით მსოფლიოს სხვადასხვა ქვეყანაში მოკრეფის და ყურძნის დახარისხების პროცესი საქართველოში არსებულისგან მნიშვნელოვნად განსხვავდება, რაც საბოლოოდ ღვინის ხარისხზეც აისახება.

„თვითონ მოკრეფის და ყურძნის დახარისხების პროცესიც მნიშვნელოვანია, ის კადრები სადაც ჩანს როგორ ხდება ყურძნის სატვირთო მანქანაში ჩაყრა, საქართველომ არც უნდა აჩვენოს. ევროპაში როდესაც ყურძენი დაიკრიფება მისთვის სპეციალიზირებული ყუთებია, რომელშიც ყურძენი არ შეილახება, შელახული ყურძნისგან უხარისხო ღვინო გამოდის. შვეიცარიაში ყურძნის კრეფას დილის ხუთ საათზე იწყებენ და 11 საათზე ამთავრებენ, რადგან ყურძენი მზისგან შეწუხებული არ იყოს“, -  აღნიშნა ზურაბ ჩხაიძემ

ჩხაიძე ამბობს, რომ ქართული ღვინო ჯერჯერობით დაბალ სეგმენტს მიეკუთვნება. მისივე განცხადებით, „გურამიშვილის მარანი“, რომელსაც KTW ჯგუფი უვლის და ოპერირებს, დაახლოებით 30 000 ბოთლს აწარმოებს და შეკვეთებიც წინასწარ აქვს. ბიზნესმენის განმარტებით ეს ნიშნავს იმას, რომ „გურამიშვილის მარნის“ სახით შეიქმნა გარკვეული სეგმენტი, რომელიც აქამდე არ არსებობდა. კომპანიის დირექტორი აცხადეს, რომ მეღვინეობის დარგი მუდმივად ვითარდება და მასში დასაქმებულ ტექნოლოგებს და მეღვინეებს მუდმივი ტრენინგები სჭირდებათ.

„კომუნისტების დროს ჩვენ დაგვხვდა 50 ტონიანი ავზები, მინდა ყველამ წარმოიდგინოს, რომ ავზში ღვინოს 3-5 გრადუსი ტემპერატურა ემატება, რაც იმას ნიშნავს, რომ მასა ფართოვდება, ხოლო ღამე ეს მასა ისევ იკლებს, როცა რამდენიმე თვე ღვინოს ესე შეაწუხებ ბაქტერიების გამრავლების რისკი ჩნდება. რაც შეეხება მუხის კასრს, მისი უამრავი პალიტრა არსებობს და ისეთ ქვეყნებში მზადდება, როგორებიც არის შვეიცარია, საფრანგეთი, იტალია, ამერიკა, პორტუგალია, ესპანეთი, ევროპული კასრები პირველ ადგილზეა და მათში  ფრანგული, იტალიური და შვეიცარული გამოირჩევა. აქაც მიმართულება უნდა ვიცოდეთ, თუ რომელ კასრში შეინახო ღვინო, ყველა მუხა ღვინოს თავისებურ გემოს აძლევს, ამ ყველაფერს მიმართულება ტექნოლოგმა უნდა მისცეს, რაც  მუდმივი პროცესია“, -  აღნიშნა ზურაბ ჩხაიძემ.

თაკო კვაჭანტირაძე