საქართველოს უძრავი ქონების ეროვნული ასოციაცია მთავრობას საპოლიციო წესის აღსადგენად საკანონმდებლო ცვლილებების დაუყოვნებლივ მიღებას სთხოვს. როგორც რადიო „კომერსანტის“ ეთერში გადაცემა „კომერსანტის დილა“-ში ასოციაციის თავმჯდომარემ ვაჟა მებაღიშვილმა განაცხადა, პრობლემა საკმაოდ აქტუალურია და მისი სწრაფად გადაწყვეტაა საჭირო.
მისი განმარტებით, რუსეთ-უკრაინის ომის ფონზე უცხო ქვეყნის მოქალაქეების გააქტიურებულმა მიგრაციამ საქართველოს დიდ ქალაქებში გასაქირავებელი უძრავი ქონების მესაკუთრეებს გარკვეული პრობლემები შეუქმნა, რა დროსაც გახშირდა ფაქტები, ქირით დაკავების შემთხვევაში ურჩი გადამხდელების შესახებ.
„ჩვენ უძრავი ქონების ეროვნული ასოციაცია 2015 წლიდან ვფუნქციონირებთ და გვყავს საკმაოდ ბევრი წევრი კომპანიები. აქედან გამომდინარე ჩნდება რამდენიმე ლეგიტიმური კითხვა: როდესაც ქონების მესაკუთრეები გვიკავშირდებიან, მათ ებადებათ ასეთი აზრი, რომ რამდენად რისკების შემცველია გაქირავება, რადგანაც ინფორმაცია ურჩი გადამხდელების შესახებ საკმაოდ გააქტიურდა.
გაქირავება გახდა საკმაოდ აქტუალური ბიზნესი და ჩვენს გარშემო ძალიან ბევრი ადამიანი ამ გზით შოულობს შემოსავალს და საკმაოდ გავრცელებული ფორმაა. კითხვა რაც აქტიურად ისმის არის, რომ ურჩი გადამხდელების შემთხვევაში რა რისკები და რა დაზღვევა არსებობს. შემიძლია ორი მომენტი გამოვყო, ერთი ეს არის მოლაპარაკების გზით. ხშირ შემთხვევაში ეს მუშაობს და ხდება ისე, რომ შესაძლებელია დამქირავებელთან დალაპარაკება, სიტუაციის ახსნა და გაშვება შენი საკუთრებიდან. და მეორე, უფრო რთული გზა, რაც არის სამართალწარმოება. იურისტები გვეუბნებიან, რომ ამ პროცედურებს დაახლოებით 2-3 წელი დასჭირდება, რაც ვითარებას ართულებს.
ასეთი სცენარი, რომ წარმოვიდგინოთ: დავუშვათ შეიძინეთ ქონება იპოთეკით. ბანკის წინაშე აიღეთ ვალდებულება და ამ დროს ამ ქონების გაქირავებიდან მიღებული შემოსავალი მიდიოდა ამ ქონების სესხის დასაფარად.
შესაბამისად თქვენს საკუთრებაში შესულია უცხო ადამიანი. თქვენ მას ბინიდან ვერ აგდებთ და ამ დროს ბანკში ვალი ჩვეულებრივად გერიცხებათ. ეს ვითარებას ართულებს და შესაძლოა ქონება დაიკარგოს კიდეც. ქონების მესაკუთრე დაუცველ მდგომარეობაშია“, - ამბობს უძრავი ქონების ეროვნული ასოციაციის თავმჯდომარე.
ვაჟა მებაღიშვილის თქმით, ევროპის უძრავი ქონების ასოციაციამ სამიტი ჩატარდა, სადაც სწორედ მსგავსი საკითხები იქნა განხილული, რადგანაც ანალოგიურმა პრობლემებმა მოიმატა ევროპაშიც. მისი თქმით, ევროპის უძრავი ქონების ასოციაციამ მთავრობებს პრობლემის დროული გადაჭრისკენ მოუწოდეს.
პრობლემა რაზეც მებაღიშვილი ყურადღებას ამახვილებს დისკრიმინაციული მიდგომებია.
„ქვეყანაში შემოსული მიგრანტები იგებენ, რომ ამ გზით შესაძლოა დაეპატრონონ სხვის საკუთრებას. ძალიან ცუდი ტენდენციაა. მგონია რომ მთავრობის ნებაც იქნება და ჩაერთვებიან. ნუ გახდება ეს საკითხი პოლიტიკური პოპულიზმის თემა, უბრალოდ აუცილებელია რაღაცნაირად დაფიქრება, რათა მივხვდეთ იმას, რომ რისკების ქვეშ ვაყენებთ ჩვენი ქვეყნის მოქალაქეებს.
როდესაც უცხო ქვეყნის მოქალაქე შემოდის სამართალწარმოების დაწყება საკმაოდ რთულია და რიგ შემთხვევებში წარმოუდგენელიც კი. თუ ვსაუბრობთ ქვეყნის მოქალაქეზე აქ შეიძლება სხვადასხვა მექანიზმები ამოქმედეს, მაგალითად ქონების დაყადაღება და სხვა“, - ამბობს მებაღიშვილი.
მისივე განმარტებით, უძრავი ქონების გაქირავებაზე ფასები ნარჩუნდება და არის საკმაოდ მაღალი.