პირველი მარტიდან თბილისის მერიის ურბანული განვითარების საქალაქო სამსახური მოქალაქეებს ერთი ფანჯრის პრინციპით - საჯარო სამართლის იურიდიული პირის სტატუსით მოემსახურება.

„საქართველოს მენაშენეთა ასოციაციის“ წარმომადგენელი თორნიკე აბულაძე აღნიშნულ ცვლილებას მნიშვნელოვნად მიიჩნევს და აცხადებს, რომ კომუნიკაციასთან დაკავშირებული პრობლემები მოგვარდება, რადგან გაიზრდება თანამშრობლების რიცხვი და დაჩქარდება ის სამუშაოები, რომელიც დროში  ჭიანურდებოდა.

თორნიკე აბულაძე მიიჩნევს, რომ ბიუროკრატიასთან დაკავშირებულ პრობლემას, რომელსაც ურბანულ სამსახურში აწყდებიან,  ახალი გადაწყეტილება შეცლის. შესაბამისად, გამოასწორებს, როგორც კომუნიკაციის,ასევე საქმის დროულად განხილვის პროცესს.

“ურბანული სამსახურის სსიპ აუცილებლად უნდა არსებობდეს. ერთი ფანჯრის პრინციპის პრობლემა გვაქვს და ეს ცხადია. ცვლილება შეცვლის იმ მხარეს, რომ გაეზრდებათ ხელფასები თანამშრომლებს, ეს მათ მისცემს მოტივაციას იმუშაონ. როდესაც 4 ადამიანი აკეთებს 24 საქმეს და ამაში არ უწყობენ ხელს, მათი დაინტერესებაც დაბალია, რადგან არ აქვთ შესაბამისი ანაზღაურება. როგორც კი ეს მხარე მოწესრიგდება, გაიზრდება თანამშრომლების რაოდენობა და 1 ადამიანი, რომელსაც საქმე თავზე ეყარა და ვერ ასწრებდა დროულად კონკრეტული საქმის გაკეთებას, შეუმსუბუქდება სამუშაო და ვადებში ჩაჯდება. კონკრეტული საქმის განხილვას თუ სჭირდება 3 თვე, ისინი კადრების ნაკლებობის გამო უნდებოდნენ 1 წელი. აი ეს შეიცვლება და თავისთავად მოგვარდება ის ძირითადი პრობლემები.“-ამბობს თორნიკე აბულაძე.

შეგახსენებთ, რომ 2020 წლის მარტიდან თბილისის მერიის ურბანული განვითარების საქალაქო სამსახურის საჯარო სამართლის იურიდიული პირის სტატუსით ამუშავებაზე,  მუნიციპალიტეტის მთავრობის სხდომაზე დედაქალაქის მერმა, კახა კალაძემ ისაუბრა.

 კახა კალაძის განცხადებით, ზონალური საბჭო სწრაფ ტემპში, თუმცა ქალაქისთვის საზიანო გადაწყვეტილებებს აფორმებდა და ლეგიტიმაციას აძლევდა ყველა იმ მშენებლობას, რაც დღემდე ქალაქის პრობლემად დარჩა.

ნათია ლომიძე