განათლების მინისტრის პოსტზე, გიორგი ამილახვარმა მიხეილ ჩხენკელი შეცვალა. „კომერსანტი“ დაინტერესდა რა ქონებას ფლობს განათლების ახალი მინისტრი. როგორც დეკლარაციიდან ირკვევა გიორგი ამილახვარი და მისი ოჯახი უძრავ ქონებას მხოლოდ საქართველოში ფლობენ.
გიორგი ამილახვრის საკუთრებაშია თბილისში, ყაზბეგის ქუჩაზე მდებარე 132,79 კვ.მ ბინა, 145,73 კვ.მ მანსარდა და 31,9 კვ.მ სარდაფი, რომელიც მინისტრმა 2006 წელს ჩუქებით მიიღო. ამავე მისამართზე მის საკუთრებაშია 76,92 კვ.მ არასაცხოვრებელი ფართი.
მინისტრი 25%-იან წილს ფლობს ჰოლში (დამხმარე ფართს), რომელიც 50,51 კვ.მ ფართს მოიცავს და თბილისის ცენტრალურ ნაწილში მდებარეობს. ამილახვარი ასევე ფლობს სოფელი შინდისში 2314 კვ.მ მიწის ნაკვეთს, რომელიც 2021 წელს 798 000 ლარად შეიძინა.
გიორგი ამილახვრის მეუღლის სახელზეა თბილისში ამაღლების ქუჩაზე 196,91 კვ.მ ფართის ბინა, ორი ავტოფარეხი და 10,31 კვ.მ დამხმარე ფართი.
მინისტრის დეკლარაციაში ასევე ვნახულობთ საათებს და ფერწერულ ტილოებსაც. ორი საათი ოჯახმა 2022 წელს შეიძინა. ასევე ოჯახის საკუთრებაშია 2 ფერწერული ტილო, რაშიც წყვილმა 2017 წელს 28000 ლარი გადაიხადა.
გიორგი ამილახვარმა, 2022 წელს 53 501,65 ლარი გამოიმუშავა. იმავდროულად არასაცხოვრებელი ფართის გაქირავებიდან 12 388,71 ლარის შემოსავალი მიიღო.
ქონებრივი დეკლარაციის თანახმად, გიორგი ამილახვრის მეუღლემ სახლის მშენებლობისთვის 350 000 ლარი დახარჯა. ასევე გადაიხადა შვილის სწავლის გადასახადი 25 000 ლარი და 5 900 დოლარი. ასევე 44 000 დოლარად გაყიდა ავტომობილო და საზღვარგარეთ მოგზაურობებისთვის დახარჯა 30 000 ლარი, ხოლო თავად გიორგი ამილახვარმა 25 000 ლარი. იმავდროულად წყვილმა 2022 წელს ტანსაცმელში 40 000 ლარი დახარჯა.
გიორგი ამილახვარი 1984 წლის 1-ელ იანვარს რუსეთში, კერძოდ მოსკოვში დაიბადა.
განათლების ახალმა მინისტრმა გიორგი ამილახვარმა პარლამენტის დეპუტატის რანგში ბოლო ქონებრივი დეკლარაცია მიმდინარე წლის 27 თებერვალს შეავსო.