„კლასიკურ ავტომობილებთან დაკავშირებით, ჩვენ შემოგვაქვს ევროპული რეგულაციები“,- ამის შესახებ პარლამენტის ვიცე-სპიკერმა, კანონპროექტის ერთ-ერთმა ინიციატორმა არჩილ თალაკვაძემ „პალიტრანიუსის“ გადაცემაში „ბიზნეს პალიტრა“ განაცხადა.

საუბარია, ანტიკვარული და საკოლექციო მანქანების პოპულარიზაციის მიზნით, „ქართული ოცნების“ მიერ შემუშავებულ ცვლილებებზე.

როგორც არჩილ თალაკვაძე განმარტავს, საკანონმდებლო რეგულაცია მოიცავს 3 ძირითად საკითხს: კერძოდ, კანონში კლასიკური ავტომობილების ცალკე კატეგორიად განსაზღვრას; აღნიშნული ავტომობილების რეგლამენტაციას ისე, რომ მფლობელებს, სერვისში ჩართულ ადამიანებს, ნაკლები ბიუროკრატიული პრობლემები ჰქონდეთ; ასევე, გონივრული საბაჟო ტარიფის დაწესებას.

პარლამენტის ვიცე-სპიკერის განცხადებით, კლასიკური მანქანების პოპულარიზაცია, ეს არის, ტურიზმის, ეკონომიკისა და ბიზნესის ნაწილი, შესაბამისად, ქვეყანას სარგებლის მიღება არაერთ ასპექტში შეუძლია.

„როგორც სხვა ბევრს სფეროში, აქაც კლასიკურ ავტომობილებთან დაკავშირებით, ჩვენ შემოგვაქვს ევროპული რეგულაციები. კერძოდ, საკანონმდებლო ცვლილება მოიცავს 3 ძირითად საკითხს: პირველი, ეს არის კლასიკური ავტომობილების ცალკე კატეგორიად განსაზღვრა კანონში, რაც დღემდე ასე არ არის; მეორე, ეს არის ამ ავტომობილების რეგლამენტაცია ისე, რომ მფლობელებს, სერვისში ჩართულ ადამიანებს, ნაკლები ბიუროკრატიული პრობლემები ჰქონდეთ (ფლობის და საექსპლუატაციო სერვისის მიწოდების დროს); და, მესამე, ეს არის გონივრული საბაჟო ტარიფის დაწესება, რომელიც ითვალისწინებს, როგორც ჩვენს ეკონომიკურ მდგომარეობას ისე, თავად ამ სფეროს მნიშვნელობას საერთო კონტექსტში.

ამის წინაპირობები არის ის, რომ, პირველ რიგში რაც ყველაზე მნიშვნელოვანია, საქართველოს უკვე 2 წელია აქვს 2-ნიშნა ეკონომიკური ზრდა, ამის პარალელურად, ჩვენი ხელისუფლება ახორციელებს სატრანსპორტო სფეროში რეფორმებს, კერძოდ, ჩვენ დავაწესეთ შეღავათები და წავახალისეთ კანონის დონეზე, მაგალითად, ეკოლოგიურად უფრო დამზოგველი ავტომობილები, ელექტროავტომობილები, ჰიბრიდული ავტომობილები, შედარებით ახალი ავტომობილები, სადაც ზოგან გავანულეთ გადასახადები, ზოგთან კი დავაწესეთ მინიმალური, გონივრული გადასახადები იმისთვის, რომ ჩვენმა მოქალაქეებმა უფრო მეტად მიიღონ გადაწყვეტილებები ავტოპარკის განახლებასთან დაკავშირებით.

ამ ფონზე, ძვირდება ძველი ავტომობილები. მოგეხსენებათ, რომ ძველი ავტოპარკი არის გარემოსთვის უფრო დამაზიანებელი და ეს ცვლილებებიც, რომელიც კლასიკურ ავტომობილებს ეხება, სწორედ ამ კონტექსტიდან გამომდინარეობს. ჩვენ არ გვინდა, რომ ამ რეფორმებით დაზარალდეს და დაზიანდეს ისეთ მნიშვნელოვანი ცალკე სფერო, როგორიცაა კლასიკური ავტომობილები. ეს სფერო ყველგან, ევროპაში, ბრიტანეთშიც, აშშ-შიც ზუსტად ამ მიზეზებიდან გამომდინარეობს, ცალკე არის გატანილი და დარეგულირებული, სპეციალური შეღავათებიც კი აქვთ იმიტომ, რომ სინამდვილეში, ეს არ არის ყოველდღიური სატრანსპორტო საშუალებები, ეს არის უფრო ცალკე კულტურა, ეს არის ტურიზმის, ეკონომიკის, ასევე, სარეკლამო ბიზნესის ნაწილი და ძირითადად არა სატრანსპორტო, არამედ უფრო კულტურული საგამოფენო და ეკონომიკური დატვირთვის მქონე. ასეა საქართველოშიც.

მე მინდა მადლობა გადავუხადო ჩემს კოლეგებს, ვინც ჩემთან ერთად ინიციატორები იყვნენ ბატონი გიორგი ვოლსკი, ბატონ ბექა ოდიშარია, ბატონი ბექა დავითულიანი, ბატონი ბეჟან წაქაძე და ბატონი დავით კაჭარავა, ჩვენ ერთად შევიმუშავეთ ეს ცვლილებები და დავაინიცირეთ. პარლამენტში ასევე, ძალიან დიდი მადლობა უნდა გადავუხადო იმ თემს მთლიანად, ვინც დაინტერესებული იყო ამ მიმართულებით, ეს არის ისტორიული ავტომობილების ასოციაცია, ეს არის ასობით ადამიანი, ვინც ფლობს ან ჩართულია ძველი, ისტორიული კლასიკური ავტომობილების სფეროში.

დღეს სწორედ იმიტომ არის შემოთავაზებული ეს ცვლილებები, რომ რაც უფრო მეტად ვითარდება სატრანსპორტო სფეროში რეფორმები, პოლიტიკა, რაც უფრო მეტია ეკონომიკური ზრდა, უფრო მეტი ადამიანი ინტერესდება (ამ მიმართულებით). ძალიან საინტერესო ღონისძიებები იმართება, სადაც ისტორიული ავტომობილები არის ხოლმე გამოფენილი, არის ტურისტული ღონისძიებები, საავტომობილო ღონისძიებები, რომელსაც ათასობით ადამიანი ესწრება, რაც თავისთავად ქმნის ეკონომიკის რაღაც ნაწილს, და მეორე, მნიშვნელოვანი არის ის, რომ ჩვენ შემოგაქვს ევროპული რეგულაციები, ეს არის უკვე მსოფლიოში მიღებული. მაგალითად, ევროკავშირის ქვეყნებში არის ცალკე კატეგორია, ზოგან საერთოდ სიმბოლური გადასახადია დაწესებული იმპორტზე. ეს უკავშირდება სამუშაო ადგილებსაც, იმიტომ, რომ რაც მეტია ასეთი ავტომობილები, შესაბამისად, მასთან დაკავშირებული სერვისები, საინჟინრო, ტექნიკური მომსახურება , სტუდიები, სადაც რესტავრაცია ხდება, მიჰყვება ამ ყველაფერს და აქაც ადამიანები არიან დასაქმებული.

და კიდევ ერთი, გავიხსენოთ, თუნდაც წლევანდელი ორი დიდი კამპანია, „ვოლვოს და ტოიოტას ცენტრები თბილისში, რომლებმაც საკუთარი ახალი ხაზის წარდგენა და მარკეტინგული კამპანია მთლიანად დააფუძნეს თავის ძველ მოდელებზე, ისინი 60-70-იან წლებში იყო გამოშვებული. ეს ნიშნავს, რომ გარკვეულწილად ბრუნდება ეს ტენდენცია თუ მოდა საავტომობილო სექტორში და ჩვენ გვინდა, რომ საქართველომაც მაქსიმალურად გამოიყენოს ეს მიმართულება. მაქსიმალურად გახდეს ეკონომიკის, კულტურის ნაწილი. მე დარწმუნებული ვარ, რომ რაც უფრო განვითარდება ჩვენი ქვეყანა, დაუახლოვდება ევროპას და მეტი ეკონომიკა შევა თითოეულ ოჯახში, მით მეტი ადამიანი დაფიქრდება თუ როდის, როგორ და სად დახარჯოს თავისუფალი დრო, თუ რესურსები.

კლასიკურ ავტომობილად განისაზღვრება 40+ ასაკის ავტომობილი, მეორე, ცალკე რეგლამენტაციას მოიაზრებს, თუნდაც ტექნიკური დათვალიერების დროს, ფლობის და ექსპლუატაციის საკითხებში, რომ ამ სფეროში დამატებითი ბარიერები არ შეექმნათ მფლობელებს და იმ პროტოკოლებით მოხდეს ყველაფერი, როგორც ეს ხდება მსოფლიოში, მაშინდელი სტანდარტების გათვალისწინებით, რომ აქ რაღაც შეფერხებები არ იყოს. რაც შეეხება განბაჟების ტარიფს, დღემდე ის არის ძალიან მაღალი, 2,5 ლარია კუბურ სანტიმეტრზე, ხოლო ჩვენ ამ ცვლილებით გვსურს, რომ გადასახადი განისაზღვროს გონივრულ ფარგლებში, ეს არის 1,5 ლარი, ან ერთი ლარი კუბურ სანტიმეტრზე,- განაცხადა არჩილ თალაკვაძემ.

Bpn.ge