ევროკავშირის ერთიან როუმინგულ სივრცესთან საქართველოს მიერთების მიზნით სამუშაოები გააქტიურდა. პარლამენტში აღნიშნულ სივრცესთან საქართველოს მიერთების შესაძლებლობებთან დაკავშირებით რამდენიმე სამუშაო შეხვედრა უკვე გაიმართა.

როგორც „კომერსანტთან“ მცირე და საშუალო ტელეკომ-ოპერატორების ასოციაციის აღმასრულებელი დირექტორი უჩა სეთური აცხადებს, ევროკავშირის ერთიან როუმინგულ სივრცესთან მიერთებით საქართველოს მოსახლეობა დიდ სარგებელს ნახავს, რადგანაც მას როუმინგის ხარჯები მნიშვნელოვნად შეუმცირდება.

„საქართველო მუშაობს საკმაოდ ინტენსიურად აღმოსავლეთ პარტნიორობის ქვეყნებთან და შეგვიძლია ვთქვათ, რომ ევროპულ ქვეყნებთან ამ ვალდებულებების ამოქმედება საკმაოდ დადებითად წაადგება საქართველოს მომხმარებელს“, — განმარტავს სეთური.

მისი თქმით, კონკრეტული ვადები, თუ როდიდან უნდა ჩაერთოს საქართველოს ევროკავშირის ერთიან როუმინგულ სივრცეში გაწერილი არ არის, „თუმცა იდეა საკმაოდ კარგია“.

„ეს იმას ნიშნავს, რომ უცხოეთში ყოფნისას იღებთ მომსახურებას ისეთი პირობებით, რა პირობებითაც იღებდით სახლში. იქნება საკმაოდ მოხერხებული ტარიფები“, - განმარტავს სეთური.

რაც შეეხება ქართულ კომპანიებს, მოუწევთ თუ არა დამატებითი ინვესტიციების განხორციელება, მცირე და საშუალო ტელეკომ-ოპერატორების ასოციაციის აღმასრულებელი დირექტორი აცხადებს, რომ ინვესტიცია სავარაუდოდ ძალიან მიზერული იქნება.

„წინასწარ ამაზე გამიჭირდება საუბარი, რადგანაც სახელშეკრულებო ვალდებულებები იქნება გადასახედი კომპანიებთან ევროპაში. რაც შეეხება ინვესტიციების მოცულობას ალბათ მიზერულ ცვლილებებზე იქნება საუბარი.

ეს უკვე დატალებშია სანახავი, ეს მარტივი პროცესი არაა, მაგრამ როდესაც ვალდებულება ჩაეწერებათ კომპანიებს მათ მოუწევთ ამ მოთხოვნების სრულად დაკმაყოფილება“ —  ამბობს მცირე და საშუალო ტელეკომ ოპერატორების ასოციაციის აღმასრულებელი დირექტორი.

„კომერსანტმა“ უჩა სეთურს ჰკითხა ევროკავშირის ერთიან როუმინგულ სივრცესთან საქართველოს მიერთება, ხომ არ გამოიწვევს საქართველოს ბაზარზე ისეთი კომპანიების გაქრობას, რომელიც მსოფლიო ქსელში ჩართული საერთაშორისო SIM ბარათების დისტრიბუციას (ევროპული, ქართული, ბრიტანული და ამერიკული ნომრებით) ეწევიან.

როგორც უჩა სეთური ამბობს, ამ კომპანიებსაც გადაწყობა და არსებული პირობების გადახედვა მოუწევთ.

„ამოვიდეთ მომხმარებლის კომფორტულობის ამოცანიდან. ესაა მთავარი მიზანი, რათა მომხმარებელმა იგრძნოს ის სიკეთეები. რაც ევროკავშირის ერთიან როუმინგულ სივრცესთან მიერთებას ახლავს თან.

მათ მოუწევთ, ალბათ, პირობების გადახედვა, თუმცა ეს იმას არ ნიშნავს, რომ ისინი უნდა გავიდნენ ბაზრიდან“, — ამბობს სეთური.

შეგახსენებთ, რომ წინა კვირაში ევროპასთან ინტეგრაციის კომიტეტის თავმჯდომარის პირველმა მოადგილემ და თემატურ საკითხზე მომხსენებელმა ლევან ქარუმიძემ სატელეკომუნიკაციო მომსახურების სფეროს წარმომადგენლებთან სამუშაო შეხვედრა გამართა.

„ევროკავშირის ერთიან როუმინგულ სივრცესთან საქართველოს მიერთება იქნება კიდევ ერთი ხელშესახები სიკეთე, როგორც საქართველოს მოქალაქეებისთვის, რომლებიც ევროკავშირის წევრ სახელმწიფოებს სტუმრობენ, ასევე საქართველოში მყოფი უცხოელი ვიზიტორებისთვის“, - განაცხადა ლევან ქარუმიძემ.

საგულისმოა, რომ საქართველოს, EU-სა და აღმოსავლეთ პარტნიორობის სხვა ქვეყნებს შორის როუმინგული ტარიფების შემცირებაზე მუშაობა უკვე რამდენიმე წელია მიმდინარეობს.

პლატფორმა EU4Digital-მა როუმინგის ტარიფების ჰარმონიზების შესახებ პირველი კვლევა ჯერ კიდევ 2017 წელს მოამზადა, ხოლო 2019 წლის ნოემბერში გამოაქვეყნა დოკუმენტი, რომელიც ამ მიმართულებით სტანდარტებისა და ინფრასტრუქტურის ცვლილებებს განიხილავდა.