ელექტრომობილების მწარმოებელი Tesla თურქეთის ბაზარზე შესვლას გეგმავს. ამის შესახებ თურქეთის მრეწველობისა და ტექნოლოგიების მინისტრმა მუსტაფა ვარანკმა შეერთებულ შტატებში კომპანიის მენეჯმენტთან მოლაპარაკების შემდეგ განაცხადა. მინისტრმა აღნიშნა, რომ კარგი ურთიერთობა დამყარდა თურქეთის ლიდერ რეჯეფ თაიფ ერდოღანსა და Tesla-ს აღმასრულებელ დირექტორს ილონ მასკს შორის.
„Tesla ადრეც გამოთქვამდა თურქეთში ინვესტიციების განხორციელების ინტერესს, მათ შორის დამტენი სადგურების შექმნის კუთხით, მაგრამ პროცესი გადაიდო კომპანიის შიდა განვითარების გამო“, - განაცხადა მინისტრმა.
როგორც TRT-ი მინისტრზე დაყრდნობით წერს, თურქეთს აქვს ძალიან სერიოზული სისტემა ინვესტორების სტიმულირებისთვის, განსაკუთრებით კვლევისა და განვითარების კუთხით.
„ჩვენ მივესალმებით ინვესტიციებს. Tesla-თვის მნიშვნელოვანია ბაზარზე წვდომა, ჩვენთვის მნიშვნელოვანია ინვესტიციები ტექნოლოგიასა და წარმოებაში. ჩვენ წარვადგინეთ წინადადებები. ამჟამად Tesla-ს ჰყავს მომწოდებლები თურქეთიდან“, - ციტირებს TRT მინისტრს.
ადგილობრივი მედიის ცნობით, Tesla-მ თურქეთში იურიდიული პირი Tesla Motorlari უკვე დააფუძნა.