რუსული საქონლის შემოტანა, პირდაპირ გადაფუთვა  და გაგზავნა ჩვენი ქვეყნის სახელით, შეიძლება საქართველოსთვის სანქციების დაწესების საბაბი გახდეს. ამის შესახებ ,,კომერსანტთან“ ეკონომიკურ მეცნიერებათა დოქტორი, ანალიტიკოსი ნიკა შენგელია საუბრობს.

ის არ გამორიცხავს, რომ რუსმა ბიზნესმენებმა სცადონ თავიანთი საქონლის ევროპაში გატანა საქართველოს მეშვეობით. ასეთ შემთხვევაში, როგორც ანალიტიკოსი აღნიშნავს, ისინი შეეცდებიან გადაფუთონ რუსული პროდუქცია და ამ ფორმით გაიტანონ, რაც მთავრობამ არ უნდა დაუშვას და რუსეთის მოქალაქეებს არ მისცეს ამის შესაძლებლობა.

,,არ მგონია, აქამდე მივიდეს საქმე, თუმცა რისკი არსებობს და ალბათ პრევენციასაც მიმართავენ, რომ პრობლემა არ შეგვექმნას.  თუმცა თუ ნედლეულს შემოიტანს ვინმე, გადაამუშავებს და ახალ პროდუქტს შექმნის, ვერავინ შემოგვედავება და ამით შეიძლება გარკვეული სარგებელიც მივიღოთ. გვესმის მთავრობის განცხადება, რომ არ აპირებენ სანქციების დაწესებას რუსეთის მიმართ, ეს მოცემულობა გვაქვს, რაც ნიშნავს, რომ ბევრმა რუსმა ბიზნესმენმა შეიძლება საქართველო გამოიყენოს პროდუქტის ექსპორტისთვის. ამიტომ ხელისუფლება უნდა იყოს ყურადღებით, ასეთი რამ არ დაუშვან. შემოიტანონ ნედლეული, შექმნან საქონელი და ისე გაატარონ, ეს სხვა თემაა“, - ამბობს ანალიტიკოსი და დასძენს, რომ  სანქციებზე არანაკლებ შემაშფოთებელია ფასების ზრდის მკვეთრად ნეგატიური ტენდენცია, რაც პროდუქტზე ხელმისაწვდომობას გვირთულებს.

,,სამწუხაროდ, დიდ დაბრკოლებას გვიქმნის ფასების ზრდა, რაც გლობალური ტენდენციაა. განსაკუთრებით საწვავის ფასთან მიმართებაში, ვინაიდან შემდეგში იგი ჯაჭვური რეაქციით იწვევს სხვა პროდუქტებზე ფასების ზრდას. ამიტომ შემაკავებელი ნაბიჯები უნდა გადაიდგას, თუნდაც გადასახადების მიმართულებით,  ქვეყნებმა გადადგეს ეს ნაბიჯი და აქაც შესაძლებელია“, - ამბობს ,,კომერსანტთან“ შენგელია.

რუსეთი უკრაინაში 24 თებერვალს შეიჭრა და ფართომასშტაბიან ომს აწარმოებს, უკვე 22-ე დღეა.

რუსეთს  მსოფლიოს  მრავალმა ქვეყანამ სანქციები დაუწესა,  რის  მძიმე ეკონომიკურ შედეგებს ქვეყანა უკვე განიცდის. პირველ რიგში, ამან  გამოიწვია რუბლის გაუფასურება  და დაარღვია სავაჭრო და ფინანსური კავშირები დანარჩენ მსოფლიოსთან.

მარი ჩიტაია