საქართველოს ხორბლისა და ფქვილის მწარმოებელთა ასოციაცია საქართველოს ხორბლის , ფქვილისა და პურის ბაზარზე დღეს არსებული რთული მდგომარეობის გამომწვევი მიზეზად რუსეთის ფაქტორს ასახელებს.

„2023 წლის დასაწყისში  რუსეთის მთავრობამ  ოფიციალურად განაცხადა  რომ უახლოესი წლების განმავლობაში რუსეთში საექსპორტო მცურავი ბაჟის მექანიზმი ხორბალზე   არ გადაიხედება  და მეტიც უახლოესი გეგმებით ხელი შეეწყობა მსოფლიო ბაზრებზე რუსული ფქვილის ექსპორტს რომლის სამიზნე მაჩვენებელი არსებული 900 000 ტონიდან  4 მილიონ ტონამდე ასვლაა , რაც პირველ რიგში ისევ და ისევ  გეოგრაფიული სიახლოვის გამო საქართველოზე  მკვეთრად უარყოფითად აისახება და  თუ არ იქნა მიღებული გადამჭრელი ზომები პრობლემები გრძელვადიანი გახდება.

 აქედან გამომდინარე  საჭიროა ახალი ხედვა ამ გამოწვევებთან გასამკლავებლად -დღევანდელი  რეალობიდან გამომდინარე იმისათვის,  რომ ერთის მხრივ  დაცული იყოს ქვეყნის სასურსათო უსაფრთხოება და გვქონდეს მთელი წლის განმავლობაში ხორბლის გარდამავალი ორთვიანი   მარაგები  და მეორე მხრივ პურის ფასი მაქსიმალურად იყოს დაზღვეული და ფერმერებს ჰქონდეს მოტივაცია ხორბლის მოყვანის და შესაბამისად გაიზარდოს ქვეყნის თვითუზრუნველყოფის მაჩვენებელი“- ნათქვამია განცხადებაში.

საქართველოს ხორბლისა და ფქვილის მწარმოებელთა ასოციაცია მთავრობას შეთავაზებას უკეთებს, რომლის მთავარი მიზანს პურის ფასის შენარჩუნების გარანტია წარმოადგენს და რაც ასოციაციის აზრით, მისაღებია როგორც სახელმწიფოსათვის, ასევე წისქვილკომბინატების, პურის მწარმოებელი ინდუსტრის, ფერმერების და მოსახლეობისათვის.

„შეთავაზება გულისხმობს:

დაწესებულ იქნას დამაბალანსებელი საიმპორტო მოსაკრებელი იმპორტირებულ ფქვილზე, რაც გაათანაბრებს ფქვილისა და ხორბლის იმპორტის საგადასახადო რეჟიმებს.

ფქვილის იმპორტზე დამაბალანსებელი მოსაკრებლის შემოღების შემთხვევაში წისქვილკომბინატები შეძლებენ მუშა პროცესის აღდგენას და იღებენ შემდეგ ვალდებულებებს:

1. წისქვილკომბინატების მიერ ე.წ. „მასობრივი მოხმარების“ პურზე ფასის გარანტირებულ შენარჩუნებას.

2. ადგილობრივი ფერმერებისაგან 2022 წლიდან დარჩენილი ჩაუბარებელი ხორბლის მოსავლის გარანტირებული შესყიდვას ხარისხების შესაბამის ფასად (დღეს წისქვილების გაჩერების ფონზე , ხორბლის შესყიდვის შეთავაზებული ფასი საერთოდ არ არსებობს) -რაც უზრუნველყოფს შეჩერებული საგაზაფხულო სამუშაოების დაწყებას.

3. ქვეყანის სასურსათო უსაფრთხოების უზრუნველყოფას ( ხორბლით 2 თვიანი გარდამავალი მარაგების შექმნით).

ზემოაღნიშნული შეთავაზება პროცესში ჩართულ ყველა მხარეს აძლევს შემდეგ დადებით ეფექტს:

1. ფქვილის იმპორტიორებსა და ადგილობრივ წისქვილკომბინატებს ეძლევათ მუშაობის საშუალება გათანაბრებულ კონკურენტულ გარემოში.

2. მოსახლეობის ფართო ფენებისათვის გარანტირებულია ე. წ. „ მასობრივი მოხმარები“ პურის ფასი.

3. ნარჩუნდება წისქვილკომბინატებში მომუშავე 3000-მდე ადამიანის სამუშაო ადგილები.

4..უზრუნველყოფილია ადგილობრივი ფერმერების მიერ 2022 წლის ადგილობრივი დარჩენილი ხორბლის მოსავლის რეალიზაცია და 2023 წლის საგაზაფხულო სამუშაოების დაწყება ,შემდგომი წლების ხორბლის მოსავლის ზრდის მოტივაცია და ადგილობრივი მოსავლის გარანტირებული ჩაბარება წისქვილკომბინატებში.

5. უზრუნველყოფილია ქვეყნის სასურსათო უსაფრთხოება. გარანტირებულია ხორბლით 2 თვიანი გარდამავალი მარაგების არსებობა.

6. უზრუნველყოფილია უახლოეს წლებში საქართველოს მთავრობის მიერ დაანონსებული სტრატეგიით ადგილობრივი ხორბლის მოსავლის თვითუზრუნველყოფის მაჩვენებლის ზრდა.

7. სახელმწიფოსაგან სიტუაციის დასაბალანსებლად არც წისქვილკობინატების და არც ფერმერების მიერ არ მოითხოვება საბიუჯეტო თანხები მათ შორის არც რაიმე სახის სუბსიდირება, არამედ პირიქით ბიუჯეტი ივსება, როგორც ფქვილზე საიმპორტო გადასახადის მოსაკრებლით, ასევე ადგილობრივი წისქვილკომბინატების სტაბილური მუშაობის შედეგად გადახდილი გადასახადებით.

კიდევ ერთხელ აღვნიშნავთ, რომ შეთავაზება არის ყველა მხრივ დაბალანსებული და წარმოადგენს წარმოქმნილი სიტუაციაში პრობლემის უმტკივნეულოდ გადაწყვეტის გზას, ვინაიდან მასში გათვალისწინებულია როგორც წისქვილკომბინატების და ფერმერების ,ასევე პურის მწარმოებლების და მოსახლეობის ინტერესები, სახელმწიფოს სტრატეგიული ინტერესების გათვალისწინებით“, - განმარტავენ ასოციაციაში.