საქართველოში საახალწლო სუფრის მომზადება თითქმის ყველა ოჯახში გარდაუვალ აუცილებლობად ითვლება, მიუხედავად ფინანსური შესაძლებლობებისა. შესაბამისად, დეკემბრის თვის ბიუჯეტი განსაკუთრებულ გადანაწილებას საჭიროებს.
რა თანხებშია, შესაძლებელი საახალწლო სუფრის მომზადება - ამის გარკვევას „კომერსანტი“ აგრარულ ბაზარში, სუპერმარკეტებსა და ე.წ უბნის მაღაზიებში მოპოვებული ინფორმაციის საფუძველზე შეეცადა.
სავაჭრო ობიექტების უმეტესობაში ამბობენ, რომ წინა წლებისგან განსხვავებით, მომხმარებლების რაოდენობა გარკვეულწილად შემცირებულია და ამას გაზრდილ ფასებს უკავშირებენ. პროდუქტის სიძვირეს უჩივიან მომხმარებლებიც.
კომერსანტი საბურთალოზე მდებარე ერთ-ერთი უბნის მაღაზიის გამყიდველს გაესაუბრა. როგორც ნანა ხ. ამბობს. გასულ წლებში მას მომხმარებლების რაოდენობის გამო მაღაზიაში დამხმარე კონსულტანტის აყვანაც კი უწევდა, ახლა კი საქმეს თავადაც თავისუფლად აუდის. მისი თქმით, საახალწლოდ მაღაზიაში არც განსაკუთრებული მარაგი არ გაუკეთებია, რადგან მოთხოვნა არაა. შექმნილ ვითარებას კი ინფლაციას და გაძვირებულ პროდუქციას უკავშირებს.
რა დაგიჯდებათ საახალწლო სუფრა
დავიწყოთ მთავარი კერძებით.
საცივის ინგრედიენტები:
ინდაურის ფასი 90 ლარიდან იწყება და წონის მიხედვით 160 ლარამდეც ადის.
ნიგვზის ფასი 24 ლარიდან იწყება და ხარისხის მატებასთან ერთად ფასიც შესაბამისად იზრდება და თეთრი ნიგოზი 35-37 ლარიც ღირს.
1 კგ ქათამი 8-12 ლარია.
1 კგ გოჭის ფასი 25-35 ლარამდეა.
1 კგ ღორის სამწვადე 19-22 ლარის ფარგლებშია
1 კგ საქონლის ხორცი 16-19 ლარი.
იმერული ყველის ფასი ე.წ უბნის მაღაზიებში 18-19 ლარია, ზოგიერთ სუპერმარკეტში 20 ლარი. რაც შეეხება სულგუნს მისი ფასი 25 ლარს აღწევს.
თუ ხაჭაპურის გაკეთებასაც გეგმავთ გაითვალისწინეთ, რომ 1კგ ფქვილის ფასი 2 ლარიდან იწყება და 4,5 მდე ადის.
კიტრის და პომიდვრის ფასი 3.5 ლარიდან იწყება. რაც შეეხება სალათა „ოლივიეს“ მოსამზადებელ ინგრედიენტებს: 1 კგ კარტოფილი 1.7 ლარი, სტაფილო 1.5 ლარი ღირს. კონსერვირებული ბარდის ფასი 2.7-დან იწყება, კიტრის მწნილი 4.5-5.5 ლარი ღირს. 10 ცალი კვერცხის ფასი -4,5 -5.5 ლარია. 200 გრამიანი მაიონეზის ფასი საშუალოდ 3 ლარია, 100 გრ კამის ფასი 1.2 ლარი , 100 გრამი მწვანე ხახვის ფასი კი 1.7 ლარია.
გაყინული თევზის ფასი 12 ლარიდან იწყება, რაც შეეხება კალმახს ის 20 ლარი ღირს.
ბანანი 4.5 ლარი ღირს, კივი 3.5-4.0 ლარი, მანდარინის ფასი 1.5 ლარიდან იწყება და 4 ლარამდეც ადის, ფორთოხლის ფასი 3.0 ლარი და ზემოთაა.
რაც შეეხება ტკბილეულობას. საახალწლო სუფრის მთავარი ნუგბარის - ჩურჩხელის ფასი 3 ლარიდან იწყება და ზოგიერთ შემთხვევაში 7 ლარსაც აღწევს.
გოზინაყის დასამზადებლად თაფლის შეძენა (1კგ) 25 ლარიდან 35 ლარის ფარგლებში შეგეძლებათ. უკვე მზა გოზინაყის 1 ნაჭრის ფასი კი 1.8-დან იწყება და 3 ლარსაც აღწევს.
შოკოლადის კანფეტების ფასი 15-40 ლარის ფარგლებშია.
1 ბოთლი ღვინის ფასი მინიმუმ 8 ლარია, შუშხუნა ღვინის კი 10 ლარი. 0.5 ლ ლიმონათის ფასი კი 1.5 ლარიდან იწყება.